އީރާން އިން އެކުލަވާލަން މަސައްކަތް ކުރާ އެއްބަސްވުމާ މެދު އެމެރިކާ ހިތްހަމައެއް ނުޖެހޭ: ޓްރަމްޕް

އީރާން އާއެކު އެކުލަވާލުމަށް މަސައްކަތް ކުރާ އެއްބަސްވުމާ މެދު އެމެރިކާ އަދި ހިތްހަމަ ނުޖެހޭ ކަމަށާއި، އެ ޤައުމާ ދެކޮޅަށް އަޅާފައިވާ ދަތި ކުރުމުގެ ފިޔަވަޅު ތަކަށް ލުއި ދިނުމާ މެދު މިހާތަނަށް މަޝްވަރާ ކޮށްފައި ނުވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެމެރިކާގެ ރިޔާސީ ގަނޑުވަރު ވައިޓް ހައުސްގައި ބޭއްވި ކެބިނެޓު ބައްދަލުވުމެއްގައި ނޫސްވެރިންނާ ވާހަކަ ދައްކަވަމުން ޓްރަމްޕް ބުދަ ދުވަހު ވިދާޅުވީ، އީރާން އިން އޮތީ އެމެރިކާ އާއެކު އެއްބަސްވުމަކަށް އައުމަށް ވަރަށް ބޮޑަށް ބޭނުން ވެފައި ކަމަށެވެ. ނަމަވެސް މިހާތަނަށް އެދެވޭ ނަތީޖާ އަކާ ހަމައަށް ދެވިފައި ނުވާ ކަމަށާއި، އެއްބަސްވުމުގެ ކަންކަން މިހާރު ހުރި ގޮތުން އެމެރިކާ ހިތްހަމަ ނުޖެހޭ ކަމަށް ޓްރަމްޕް ވިދާޅުވި އެވެ. އަދި ކުރިއަށް އޮތް ތަނުގައި އެމެރިކާ ބޭނުންވާ ގޮތަށް ކަންކަން ހަމަޖެހިގެން ދާނެ ކަމަށް އުންމީދު ކުރައްވާ ކަމަށާއި، އެހެން ނޫން ނަމަ އެ މަސައްކަތް އެއްކޮށް ނިންމާލަން ޖެހިދާނެ ކަމުގެ އިންޒާރު ވެސް ޓްރަމްޕް ވަނީ ދެއްވާފައި އެވެ.

އީރާން އާއެކު އެކުލަވާލުމަށް މަސައްކަތް ކުރާ އޮނިގަނޑުގެ ދަށުން ހޮރްމޫޒް ކަނޑު އޮޅި ވަގުތުން ހުޅުވާލެވޭނެ ކަމަށް ޓްރަމްޕް ވިދާޅުވި އެވެ. ނަމަވެސް އެ ސަރަހައްދުގެ ކޮންޓްރޯލް އެއްވެސް ފަރާތަކަށް ނޯންނާނެ ކަމަށް އޭނާ ފާހަގަ ކުރެއްވި އެވެ. ޓްރަމްޕް ވިދާޅުވީ އެމެރިކާ އިން އެ ސަރަހައްދު ބަލަހައްޓާނެ ކަމަށާއި، ނަމަވެސް އެއްވެސް ބަޔަކަށް އެތަން ކޮންޓްރޯލް ކުރުމުގެ ފުރުސަތު ނުދޭނެ ކަމަށެވެ. މިއީ މިހާރު ކުރިއަށްދާ މަޝްވަރާ ތަކުގެ މުހިންމު ބައެއް ކަމަށާއި، އީރާން އިން އެ ސަރަހައްދު ކޮންޓްރޯލް ކުރަން ބޭނުންވި ނަމަވެސް އެކަން އެގޮތަށް ނުވާނެ ކަމަށް ޓްރަމްޕް ވިދާޅުވި އެވެ.

މީގެ އިތުރުން އީރާން އިން ރައްކާ ކޮށްފައިވާ މަތީ މިންވަރަކަށް ފައްކާ ކޮށްފައިވާ ޔުރޭނިއަމްގެ ރަސްމީ ރިޒާވް، ރަޝިޔާ ނުވަތަ ޗައިނާއާ ހަވާލު ކުރުމަކީ ވެސް އެމެރިކާ އިން ރުހޭ ކަމެއް ނޫން ކަމަށް ޓްރަމްޕް ވިދާޅުވި އެވެ.

މި ބައްދަލުވުމުގައި ވާހަކަ ދައްކަވަމުން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، އީރާން އާއެކު ކުރިއަށްދާ މަޝްވަރާ ތަކުގައި ކޮންމެ ވެސް ވަރެއްގެ ކުރިއެރުން ތަކެއް ލިބެމުންދާ ކަމަށެވެ. އަދި މަޝްވަރާ ތަކަށް ދެ ފަރާތުން ވެސް ޝައުގުވެރިކަން ފާޅު ކުރަމުންދާ ކަމަށް އޭނާ ވިދާޅުވި އެވެ. ރޫބިއޯ އިތުރަށް ވިދާޅުވީ، ކުރިއަށް އޮތް ގަޑިއިރުތަކާއި ދުވަސް ތަކުގެ ތެރޭގައި އިތުރު ކުރި އެރުމެއް ލިބޭތޯ ވަރަށް ގާތުން ބަލަމުންދާނެ ކަމަށެވެ.