ހަމާސްގެ ކޮމާންޑަރަކު ޝަހީދު ކޮށްލާފައިވާ ކަމަށް އިޒްރޭލް އިން ބުނެފި
ޓެލެގްރާމް މެދުވެރިކޮށް އިޒްރޭލްގެ އަސްކަރިއްޔާ އިން ނެރުނު ބަޔާނެއްގައި ބުނެފައި ވަނީ، އަންގާރަ ދުވަހު ޣައްޒާގެ ދެކުނުގެ ސަރަހައްދު ތަކަށް ދިން ހަމަލާއެއްގައި ޝަހީދު ކޮށްލާފައި ވަނީ ހަމާސްގެ ނުޚްބާ ސެލްގެ ކޮމާންޑަރެއް ކަމަށްވާ ސަޤްރު އަބޫ ކަރީމް ކަމަށް. އިޒްރޭލް އިން ތުހުމަތު ކުރާ ގޮތުގައި އޭނާ އަކީ ކިސޫފިމް ސަރަހައްދަށް ހަމަލާ ދިން ހަނގުރާމަވެރިންގެ އިސް މީހާ.
އިޒްރޭލްގެ ހަމަލާ ތަކުގައި މީގެ ކުރިން ޝަހީދު ކޮށްލި ހަމާސްގެ ކޮމާންޑަރެއްގެ ޖަނާޒާގެ ތެރެއިން (ފައިލް ފޮޓޯ). | ރޮއިޓާސް
ހަމާސް ޖަމާއަތުގެ ކޮމާންޑަރަކު ޝަހީދު ކޮށްލާފައިވާ ކަމަށް އިޒްރޭލް އިން ހާމަ ކޮށްފި އެވެ.
ޓެލެގްރާމް މެދުވެރިކޮށް އިޒްރޭލްގެ އަސްކަރިއްޔާ އިން ނެރުނު ބަޔާނެއްގައި ބުނެފައި ވަނީ، އަންގާރަ ދުވަހު ޣައްޒާގެ ދެކުނުގެ ސަރަހައްދު ތަކަށް ދިން ހަމަލާއެއްގައި ޝަހީދު ކޮށްލާފައި ވަނީ ހަމާސްގެ ނުޚްބާ ސެލްގެ ކޮމާންޑަރެއް ކަމަށްވާ ސަޤްރު އަބޫ ކަރީމް ކަމަށެވެ. އިޒްރޭލް އިން ތުހުމަތު ކުރާ ގޮތުގައި އޭނާ އަކީ ކިސޫފިމް ސަރަހައްދަށް ހަމަލާ ދިން ހަނގުރާމަވެރިންގެ އިސް މީހާ އެވެ.
މީގެ އިތުރުން މި ހަމަލާގައި ހަމާސްގެ މުވާސަލާތީ ކަންކަމާ ބެހޭ އޮޕަރޭޓިވްއެއްގެ ގޮތުގައި މަސައްކަތް ކުރާ އެހެން މެމްބަރަކު ވެސް ޝަހީދު ކޮށްލާފައިވާ ކަމަށް އިޒްރޭލް އިން ވަނީ ބުނެފައި އެވެ. ނަމަވެސް، މިކަމާ ގުޅޭ ގޮތުން ހަމާސްގެ ފަރާތުން މިހާތަނަށް ވަކި އެއްޗެއް ބުނެފައި ނުވެ އެވެ.
އިޒްރޭލް އިން ޣައްޒާގެ އެކި ސަރަހައްދު ތަކަށް ދެމުންދާ ހަމަލާތައް ވަރުގަދަ ކޮށްފައިވާއިރު، ހަމާސްގެ އިސްވެރިންނާއި ކޮމާންޑަރުންނަށް އަމާޒުކޮށް ގިނަ ހަމަލާ ތަކެއް ދަނީ ދެމުންނެވެ. މި ހަމަލާ ތަކުގައި ޣައްޒާގެ އާންމު ރައްޔިތުންގެ ގިނަ ބަޔަކު ވެސް ދަނީ ޝަހީދު ކުރަމުންނެވެ.
2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހުން ފެށިގެން އިޒްރޭލް އިން ޣައްޒާގައި ދެމުން އަންނަ ހަމަލާ ތަކުގައި މިހާތަނަށް 72000 އަށް ވުރެ ގިނަ މީހުން ވަނީ ޝަހީދު ކޮށްލައިފަ އެވެ. އިޒްރޭލްގެ ހަމަލާ ތަކުގައި ޣައްޒާގެ ބޮޑު ބައެއް ސުންނާފަތި ވެފައިވާއިރު، ކޮންމެ ދުވަހަކު ވެސް އިޒްރޭލް އިން އަންނަނީ އެތައް ހަމަލާ ތަކެއް ދެމުންނެވެ.
މަސްދަރު: އަލް ޖަޒީރާ
