ފަލަސްތީނުގެ ހައްގުގައި ވަކާލާތު ކުރައްވާ އަލްބަނީޒްއާ ދެކޮޅަށް އެމެރިކާގެ ދަތިކުރުމުގެ ފިޔަވަޅު އަލުން އިއާދަކޮށްފި
ފަލަސްތީނުގެ މައްސަލަތަކާ ބެހޭ އދ. ގެ މަންދޫބު ފްރަންސެސްކާ އަލްބަނީޒްއާ ދެކޮޅަށް އެމެރިކާ ސަރުކާރުން އަޅާފައިވާ ދަތިކުރުމުގެ ފިޔަވަޅުތައް، ކޯޓު އަމުރަކާ ގުޅިގެން އަލުން އިއާދަކޮށް އޭނާ ބްލެކްލިސްޓް ކޮށްފި. އިޒްރޭލުން ޣައްޒާގައި ހިންގަނީ ނަސްލު ނައްތާލުމުގެ އަމަލުތަކެއް ކަމަށް ތުހުމަތުކުރައްވާ އަލްބަނީޒްއާ ދެކޮޅަށް މި ފިޔަވަޅު އެޅީ، އޭނާ ޔަހޫދީންނާ ދެކޮޅު ވާހަކަ ފަތުރާ ކަމަށް ބުނެ. ނަމަވެސް، އެމެރިކާއާއި އިޒްރޭލުން ކުރާ މި ހުރިހާ ތުހުމަތުތަކެއް އޭނާ ވަނީ ދޮގުކުރައްވާފައި.
ސްވިޒަލޭންޑްގެ ޖެނީވާގައި ހުންނަ އދ. ގެ މަރުކަޒުގައި 2026 މާރިޗު 24 ވަނަ ދުވަހު ބޭއްވި ހިއުމަން ރައިޓްސް ކައުންސިލްގެ ބައްދަލުވުމުގެ ތެރެއިން ބޭއްވި ނޫސްވެރިންގެ ބައްދަލުވުމެއްގައި، ފަލަސްތީނުގެ ބިންތަކުގެ އިންސާނީ ހައްގުތަކާ ބެހޭ އދ. ގެ ހާއްސަ ރެޕަޓުއާ ފްރަންޗެސްކާ އަލްބަނީޒް ބައިވެރިވެވަޑައިގަންނަވަނީ. | ރޮއިޓާސް
އިޒްރޭލަށް ވަރަށް ބޮޑަށް ފާޑުވިދާޅުވަމުން ގެންދަވާ، ފަލަސްތީނުގެ މައްސަލަތަކާ ބެހޭ އދ. ގެ މަންދޫބު ފްރަންސެސްކާ އަލްބަނީޒްއާ ދެކޮޅަށް އެމެރިކާ ސަރުކާރުން ކުރިން އަޅާފައިވާ ދަތިކުރުމުގެ ފިޔަވަޅުތައް، އެ ފިޔަވަޅުތައް ހުއްޓުވުމަށް ކޯޓަކުން ނެރުނު އަމުރެއް އިސްތިއުނާފީ ކޯޓަކުން ބާތިލުކުރުމާ ގުޅިގެން، ބުދަ ދުވަހު އަލުން އިއާދަކޮށްފިއެވެ.
އެމެރިކާގެ ޓްރެޜަރީ ޑިޕާޓްމަންޓުގެ ވެބްސައިޓުގައި އާންމުކޮށްފައިވާ ނޯޓިސްއެއްގައިވާ ގޮތުން، އަލްބަނީޒްއާ ދެކޮޅަށް އަލުން ފިޔަވަޅު އެޅުމުން އޭނާ ވަނީ ދުނިޔޭގެ ކޮންމެ ތަނެއްގައި ހުރި ނަމަވެސް ބްލެކްލިސްޓް ކުރެވިފައެވެ. މީގެ ސަބަބުން ބޮޑެތި ކްރެޑިޓް ކާޑުތައް ބޭނުންކުރުމާއި ބޭންކިން މުއާމަލާތްތައް ހިންގުން އޭނާއަށް ވަނީ މުޅިން މަނާވެފައެވެ.
އިޓަލީއަށް ނިސްބަތްވާ އަލްބަނީޒް އަކީ، އިޒްރޭލުން ހިފާފައިވާ ފަލަސްތީނުގެ ބިންތަކުގައި އިންސާނީ ހައްގުތަކާ ބެހޭ އދ. ގެ ހާއްސަ ރެޕަޓުއާގެ ހައިސިއްޔަތުން، އިޒްރޭލުން ފަލަސްތީނު މީހުންނާ މެދު އަމަލުކުރާ ގޮތަށް މެދުކެނޑުމެއް ނެތި ވަރަށް ބޮޑަށް ފާޑުވިދާޅުވަމުން ގެންދަވާ ބޭފުޅެކެވެ.
އެމެރިކާގެ ޓްރެޜަރީން މި ފިޔަވަޅު އަލުން އަޅާފައިވަނީ، މި މައްސަލައިގެ އަސްލަށް ބަލައި ގޮތެއް ނިންމެންދެން، ކުރިން ނެރެފައިވާ އަމުރު ތަންފީޒުކުރުން ފަސްކުރުމަށް އިސްތިއުނާފީ ކޯޓުން މިދިޔަ ހުކުރު ދުވަހު ނެރުނު އަމުރަކާ ގުޅިގެންނެވެ.
މި މައްސަލަ ކޯޓަށް ހުށަހަޅާފައިވަނީ އަލްބަނީޒްގެ ފިރިކަލުން މަސިމިލިއާނޯ ކާލީއެވެ. އޭނާ މި މައްސަލަ ހުށަހެޅީ އެމެރިކާގެ ރައްޔިތެއް ކަމަށްވާ އެ ދެމަފިރިންގެ ކުޑަކުދި ދަރިފުޅުގެ ހައްގުގައެވެ.
އޮކްޓޫބަރު 7، 2023 ގައި ހަމާސްއިން ދިން ހަމަލާތަކަށްފަހު، އިޒްރޭލުން ޣައްޒާގައި ހިންގަމުންދާ ނުރައްކާތެރި އަސްކަރީ ހަރަކާތްތަކަކީ ނަސްލު ނައްތާލުމުގެ އަމަލުތަކެއް ކަމަށް ތުހުމަތުކުރައްވާ ބޭފުޅުންގެ ތެރޭގައި އަލްބަނީޒް އިސްކޮށް ހިމެނިވަޑައިގަންނަވައެވެ.
މިދިޔަ އަހަރުގެ ޖުލައި މަހު އަލްބަނީޒްއާ ދެކޮޅަށް ފިޔަވަޅު އަޅާފައިވާކަން އިއުލާނުކުރައްވަމުން، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، އޭނާ ގެންދަވަނީ "ލަދުކުޑަ ގޮތެއްގައި ޔަހޫދީންނާ ދެކޮޅު ވާހަކަތައް ފަތުރައި، ޓެރަރިޒަމަށް ތާއީދުކޮށް، އެމެރިކާއާއި އިޒްރޭލާއި ހުޅަނގުގެ ގައުމުތަކަށް ފާޅުގައި އިހާނެތިކޮށް ހިތަމުން" ކަމަށެވެ.
އިޒްރޭލުންނާއި އެމެރިކާއިން އޭނާގެ މައްޗަށް ކުރާ ޔަހޫދީންނާ ދެކޮޅުވެރިވުމުގެ (އެންޓިސެމިޓިޒަމް) ހުރިހާ ތުހުމަތުތަކަކަށް އަލްބަނީޒް އިންކާރު ކުރައްވައެވެ.
