ޖިލް ބައިޑަން: ބަހުސްގައި ޖޯއަށް ސްޓްރޯކެއް ޖެހެނީ ކަމަށް ހީވި

އެމެރިކާގެ ކުރީގެ ފަސްޓް ލޭޑީ ޖިލް ބައިޑަން ވިދާޅުވި ގޮތުގައި، 2024 ވަނަ އަހަރުގެ ރިޔާސީ ބަހުސްގައި ރައީސް ޖޯ ބައިޑަންގެ ފަރާތުން ފެނުނު އާދަޔާ ހިލާފު ބަލިކަށިކަމުގެ ސަބަބުން، އެމަނިކުފާނަށް ސްޓްރޯކެއް ޖެހެނީ ކަމަށް އޭނާއަށް ހީފުޅުވިއެވެ.

ބީބީސީގެ އެމެރިކާ ޕާޓްނަރު، ސީބީއެސް ނިއުސްއަށް ދެއްވި އިންޓަވިއުއެއްގައި ޖިލް ބައިޑަން ވިދާޅުވީ، "އަހަރެން ވަރަށް ބިރުގަތް، ސަބަބަކީ އޭގެ ކުރިންވެސް އަދި އޭގެ ފަހުންވެސް ޖޯ އެފަދަ ހާލަތެއްގައި ހުއްޓާ ދުވަހަކުވެސް ފެނިފައި ނުވާތީ،" ކަމަށެވެ.

އެ ހާދިސާއާ ގުޅޭގޮތުން އިތުރަށް ވާހަކަދައްކަވަމުން ޖިލް ވިދާޅުވީ، "ވީގޮތެއް އަހަންނަކަށް ނޭނގޭ. އެ މަންޒަރު ބަލަން ހުރިއިރު ހިތަށް އެރީ، '...އޭނާއަށް ސްޓްރޯކެއް ޖެހެނީ ބާވައޭ'. އެކަމުގެ ސަބަބުން އަހަރެން އިންތިހާއަށް ބިރުގަތް،" ކަމަށެވެ.

ރިޕަބްލިކަން ކެންޑިޑޭޓް ޑޮނަލްޑް ޓްރަމްޕާ ދެކޮޅަށް ބޭއްވި ބަހުސްގައި ބައިޑަންގެ ފަރާތުން ފެނުނު ދަށް ނަތީޖާއާ ގުޅިގެން، ޑިމޮކްރެޓިކް ޕާޓީގެ މެންބަރުންގެ ފަރާތުން ކެންޑިޑޭޓްކަމުން ވަކިވުމަށް ބައިޑަންއަށް ބޮޑު ފިއްތުންތަކެއް ކުރިމަތިވިއެވެ. ނަތީޖާއެއްގެ ގޮތުން، ބައިޑަން ރިޔާސީ ރޭހުން ވަކިވެވަޑައިގެން، އޭރުގެ ނައިބު ރައީސް ކަމަލާ ހަރިސްއަށް ތާއީދުކުރެއްވިއެވެ.

ޖިލް ބައިޑަން ވަނީ ޑެލަވެއާގެ ސެނެޓަރެއްގެ ގޮތުގައި ހޭދަކުރެއްވި ދުވަސްވަރުން ފެށިގެން ރައީސްކަމުގެ ދައުރާ ހަމައަށް، ވޭތުވެދިޔަ އެތައް އަހަރެއްގެ ތެރޭގައި ފިރިކަލުންގެ އަރިހުގައި ސާބިތުކަމާއެކު ހުންނަވާފައެވެ.

ބައިޑަންގެ ރައީސްކަމުގެ ދައުރުގައި އެމަނިކުފާނަށް އެންމެ ބޮޑަށް ނުފޫޒު ފޯރުވި މުޝީރުންގެ ތެރޭގައި ޖިލް ހިމެނޭއިރު، 2024 ވަނަ އަހަރުގެ ރިޔާސީ ރޭހުން ވަކިވުމަށް އެންމެ ފަހުން ބައިޑަންއަށް ބާރުއެޅުއްވި ބޭފުޅުންގެ ތެރޭގައިވެސް އޭނާ ހިމެނެއެވެ.

ރިޔާސީ އިންތިޚާބުގެ މަސްތަކެއް ކުރިން، 2024 ވަނަ އަހަރުގެ ޖޫން މަހު ބޭއްވި ބަހުސްގައި ރައީސް ބައިޑަންގެ ފަރާތުން ފެނުނު ތުރުތުރުލުމާއި ބަލިކަށިކަމާ ގުޅިގެން ޑިމޮކްރެޓުން ވަނީ ކަންބޮޑުވުން ފާޅުކޮށްފައެވެ. ނަމަވެސް، އޭރު ބައިޑަންގެ ކެމްޕޭން ޓީމުން ބުނަމުން ދިޔައީ ޑިމޮކްރެޓިކް ކެންޑިޑޭޓްގެ ގޮތުގައި ބައިޑަން ދެމިހުންނަވާނެ ކަމަށާއި، ޑޮނަލްޑް ޓްރަމްޕާއެކު ދެވަނަ ބަހުސަކަށް ނުކުންނަވާނެ ކަމަށެވެ.

ދެވަނަ ދައުރަކަށް ވާދަކުރެއްވި ބައިޑަން އާއި ޓްރަމްޕްގެ އެ ބަހުސްގައި، އިމިގްރޭޝަނާއި، އިގްތިސާދާއި، އަދި އަބޯޝަން ނުވަތަ ދަރިވައްޓާލުމުގެ ހައްގުތަކާ ގުޅޭ މުހިންމު މައުލޫމާތުތަކާ މެދު ދެ ބޭފުޅުން ބަހުގެ ހަމަލާތައް ބަދަލުކުރެއްވިއެވެ.

އެ ބަހުސްގައި ބައިޑަންގެ އަޑު ހުރީ ކުރަކިވެފައެވެ. އެކަމާ ގުޅިގެން ބައިޑަންގެ ޓީމުން ބުނީ އެއީ އެމަނިކުފާނު ބަލިވެ އުޅުއްވާތީ ކަމަށެވެ. އަދި ބަހުސްގެ ތެރެއިން ބައެއް ވަގުތުތަކުގައި ވާހަކަދައްކަވަން އުޅުއްވައި، ބުނަން އުޅުނު އެއްޗެއް ހަނދާން ނެތިފައިވާ ފަދަ މަންޒަރުތަކެއްވެސް ފެނިގެންދިޔައެވެ.

ބަހުސަށްފަހު އެޓްލާންޓާގައި ބޭއްވި އެއްވުމެއްގައި ޖިލް ބައިޑަން ވަނީ ފިރިކަލުން ސްޓޭޖަށް ތައާރަފުކޮށްދެއްވައި، ޓްރަމްޕާ ދެކޮޅަށް ބައިޑަން ދެއްކެވި ހިތްވަރަށް ތައުރީފު ކުރައްވާފައެވެ.

އެއްވެފައި ތިބި މީހުންނާ މުޚާތަބުކޮށް ޖިލް ވިދާޅުވީ، "ޖޯ، ތިބާ ވަރަށް ފުރިހަމަ މަސައްކަތެއް ކޮށްފި. ހުރިހާ ސުވާލަކަށް ޖަވާބު ދީފި. ހުރިހާ ހަގީގަތްތަކެއް ތިބާއަށް އެނގޭ،" ކަމަށެވެ.

ނަމަވެސް، އެހެން ދިމާދިމާލުން ޑިމޮކްރެޓިކް ޕާޓީގެ ލީޑަރުންނާއި ފަންޑުކުރާ ފަރާތްތަކުން ދިޔައީ އޭރުގެ ރައީސް ބައިޑަންގެ ފަރާތުން ފެނުނު ކަންކަމާ މެދު ކަންބޮޑުވުން ފާޅުކުރަމުންނެވެ. އާންމުކޮށް ބައިޑަންއަށް ފާޑުވިދާޅުނުވާ ކަމަލާ ހަރިސްވެސް ވަނީ، ބަހުސް ފެށުނުއިރު ބައިޑަންގެ ފަރާތުން ފެނުނީ "ލަސް ދުވެއްޔެއް" ކަމަށް އެއްބަސްވެވަޑައިގެންފައެވެ.

ބައިޑަންގެ ސިއްހީ ހާލަތާއި، ނަފްސާނީ ދުޅަހެޔޮކަމާއި، އަދި އޭރު އުމުރުފުޅުން 81 އަހަރުވެފައިވުމުން އުމުރާ މެދު ވޯޓުލާ މީހުންގެ މެދުގައި އޮތް ކަންބޮޑުވުންތައް އެ ބަހުސްގެ ތެރެއިން ވަރަށް ބޮޑަށް ފާހަގަވެގެންދިޔައެވެ.

އެމެރިކާގެ މީޑިއާތަކުގެ ބޮޑު ފާޑުކިޔުމެއް ބައިޑަންއަށް އަމާޒުވިއިރު، ރައީސްކަމުގެ މަސްއޫލިއްޔަތު އަދާކުރުމުގެ ގާބިލުކަމާ މެދުގައާއި، 2024 ވަނަ އަހަރުގެ ނޮވެމްބަރު މަހު ބާއްވަން ހަމަޖެހިފައި އޮތް އިންތިޚާބު ކާމިޔާބު ކުރުމުގެ ފުރުސަތާ މެދު ސުވާލު އުފެދުނެވެ.

އިންތިޚާބަށް އެންމެ މަސްތަކެއް ވެފައި ވަނިކޮށް، މަގާމުގައި ހުންނެވި ރައީސް ބައިޑަންގެ ބަދަލުގައި ޑިމޮކްރެޓިކް ޕާޓީން އެހެން ކެންޑިޑޭޓަކު ނެރުމަކީ ނާދިރު ކަމެއްގެ ގޮތުގައި އޭރު ބެލެވުނެވެ. އަދި އާ ކެންޑިޑޭޓަކު ހޮވުމުގެ އުނދަގޫ މަރުހަލާގެ ސަބަބުން، ވައިޓް ހައުސް ކާމިޔާބު ކުރުމަށް ޕާޓީން ކުރާ މަސައްކަތަށް ހުރަސް އެޅިދާނެ ކަމަށްވެސް ބެލެވުނެވެ.

ނަމަވެސް، ބަހުސްގައި ފެނުނު ދަށް ނަތީޖާއާއި، އޭގެ ފަހުން ބޭއްވި ނޭޓޯ ސަމިޓުގައި ހެއްދެވުނު ގޯސްތަކާއި، އަދި ކޮވިޑް ޖެހުމަށްފަހު ފެނުނު ބަލިކަށިކަމުގެ ސަބަބުން، އެންމެ ފަހުން ބައިޑަންއަށް ޖެހިވަޑައިގަތީ ކެންޑިޑޭޓްކަން ދޫކޮށްލެއްވުމަށެވެ.

އިންތިޚާބަށް ތިން މަހަށް ވެފައި ވަނިކޮށް ޑިމޮކްރެޓިކް ޓިކެޓާ ހަވާލުވެވަޑައިގެންނެވި ކަމަލާ ހަރިސްއަށް، އެންމެ ފަހުން ޓްރަމްޕްގެ މައްޗަށް ކުރިހޯއްދެވޭ ގޮތެއް ނުވިއެވެ.

އިންތިޚާބުން ނާކާމިޔާބުވުމާ ގުޅިގެން، ކަމަލާ ހަރިސް ވަނީ އޭނާގެ ކުރީގެ ބޮސް ބައިޑަންއަށް ފާޑުވިދާޅުވެފައެވެ. ދެވަނަ ދައުރަކަށް ކުރިމަތިލެއްވުމަށް ބައިޑަން ނިންމެވި ނިންމެވުމަކީ "ޒިންމާދާރުކަން ކުޑަ" ނިންމުމެއްގެ ގޮތުގައި އޭނާ ސިފަކުރެއްވިއެވެ.

ކަމަލާ ހަރިސްގެ ހަނދާނީ ފޮތުގައި ލިޔުއްވާފައިވަނީ، "'އެއީ ޖޯ އާއި ޖިލްގެ ނިންމުމެއް' ކަމަށް އަހަރެމެން އެންމެން ދިޔައީ ތަކުރާރުކޮށް ބުނަމުން، އެއީ ހީވަނީ އަހަރެމެން އެންމެން ތިބީ ހިޕްނޮޓައިޒްވެފައި ހެން،" ކަމަށެވެ. "އެއީ ހިތްތިރިކަން ހެއްޔެވެ؟ ނުވަތަ ޒިންމާދާރުކަން ކުޑަވުން ހެއްޔެވެ؟ މާޒީއަށް ބަލާއިރު، އަހަރެން ގަބޫލުކުރަނީ އެއީ ފަރުވާކުޑަކަން ކަމަށް،" ކަމަލާ ލިޔުއްވާފައިވެއެވެ.