ގްރީން ބަލިކޮށް، ބުރު ހަތަރު ވަނައިގައި

މިހާރު ކުރިއަށްދާ ދިރާގު ދިވެހި ޕްރިމިއަރ ލީގުގައި ކުލަބު ގްރީން ސްޓްރީޓްސްއާ ދެކޮޅަށް ކުޅުނު މެޗުން މޮޅުވެ، ބުރު ސްޕޯޓްސް ކުލަބުން ލީގު ތާވަލްގެ ހަތަރު ވަަނައިގައި ދެމި އޮވެއްޖެ އެވެ.

ހޯމަ ދުވަހުގެ ރޭ، ގަލޮޅު ރަސްމީ ދަނޑުގައި ކުޅުނު މެޗު ބުރުން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ބުރުން އެއް ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ. ދެ ވަނަ ހާފުގައި ގްރީން އިން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 37 ވަނަ މިނެޓުގައި ބުރަށް ލީޑު ނަގައިދިނީ ބިދޭސީ ކުޅުންތެރިޔާ ހުޑްސަން ޖީސުސް އެވެ. އޭގެ ފަހުން މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި މުޙައްމަދު ނާއިމް ވަނީ ބުރުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް ބުރުން ވަނީ ތިން ވަނަ ލަނޑެއް ޖަހައި އިތުރަށް ލީޑު ފުޅާ ކޮށްފަ އެވެ. އެ ލަނޑު ބުރަށް ޖަހައިދިނީ ޢަަބްދުﷲ ޔާމީން އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ގްރީންގެ ހަމައެކަނި ލަނޑު ޖެހީ ބިދޭސީ ކުޅުންތެރިޔާ އެލްސައީދު އެވެ. 

ލީގުގައި ކުލަބު އީގަލްސް އިން ވަނީ ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުން 2-0 އިން މޮޅުވެފަ އެވެ. މެޗުގެ ފުރަތަމަ ހާފުގެ ފަހު ވަގުތުގައި އީގަލްސްގެ ބިދޭސީ ކުޅުންތެރިޔާ އިބްރާހިމް ލެބީ ޖެހި ލަނޑުން އެ ޓީމު ލީޑު ނެގިއިރު، އޭގެ ތިން މިނެޓު ފަހުން އީގަލްސްގެ ދެ ވަނަ ލަނޑު ޖެހީ ޒައިން ޒަފަރު އެވެ.

މިހާތަނަށް ކުޅެފައިވާ 13 މެޗުން އީގަލްސް އަށް 19 ޕޮއިންޓު ލިބޭއިރު، އެ ޓީމު އޮތީ ލީގު ތާވަލްގެ ހަ ވަނަ މަގާމުގަ އެވެ. ދެ ވަނަ ބުރުގައި އީގަލްސްގެ ނަތީޖާތައް ދަށްވެފައި ވީ ނަމަވެސް، ފަހުން ކުޅުނު ދެ މެޗުން ވެސް މޮޅުވެ އެ ޓީމުން މި ވަނީ ހަމަޖެހުމެއް ހޯދައިފަ އެވެ. ގްރީން އަތުން މޮޅުވެ ބުރު ހަތަރު ވަަނައިގައި އޮތީ މިހާތަނަށް ކުޅެފައިވާ 13 މެޗުން 23 ޕޮއިންޓާ އެކު އެވެ.