ދެ ވަނަ ބުރުގައި ނިއު ރޭޑިއަންޓާއި އޮޑި ހަމަހަމަ

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ނިއު ރޭޑިއަންޓް ސްޕޯޓްސް ކުލަބާއި، އޮޑި ސްޕޯޓްސް ކުލަބު ބައްދަލު ކުރި މެޗު އެއްވަރު ވެގެން ނިމިއްޖެ އެވެ.

އަންގާރަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. ނަމަވެސް، މެޗުގައި ދެ ޓީމަށް ވެސް ވަނީ ލަނޑު ޖަހަން ފުރުސަތު ތަކެއް ލިބިފަ އެވެ.

މެޗުގެ ފުރަތަމަ ހާފުގައި ނިއު ރޭޑިއަންޓުގެ އަލީ ފާޞިރު (ސެންޓޭ) އަށް ލިބުނު ފުރުސަތުގެ ބޭނުން ނުކުރެވުނުއިރު، ބިދޭސީ ކުޅުންތެރިޔާ ގޯމެސް ޑަ ސިލްވާ އަށް ލިބުނު ފުރުސަތު ވެސް ބޭނުމެއް ނުކުރެވުނެވެ. އޭގެ ފަހުން ވެސް މެޗުގައި ނިއު ރޭޑިއަންޓް އިން ވަނީ ލަނޑު ޖަހަން ވަރަށް މަސައްކަތް ކޮށްފަ އެވެ. އޮޑި އަށް ވެސް ލަނޑު ޖަހަން ފުރުސަތު ލިބުނުއިރު، ފުރުސަތުގެ ބޭނުމެއް ނުކުރެވުނެވެ.

މެޗުގެ ފަހު ވަގުތުގައި ނިއު ރޭޑިއަންޓް އިން ވަނީ ވަރަށް ބޮޑަށް ކުރިއަށް ޖެހިގެން ލަނޑު ޖަހަން މަސައްކަތް ކޮށްފަ އެވެ. ފަހު ވަގުތުގެ ތެރޭގައި ވެސް ނިއު ރޭޑިއަންޓް އަށް ވަނީ ލަނޑު ޖަހާނެ ދެ ފުރުސަތެއް ލިބިފަ އެވެ. އެގޮތުން ބަދަލު ކުޅުންތެރިޔެއްގެ ގޮތުގައި ކުޅެން ނިކުތް އަލީ އަޝްފާޤު (ދަގަނޑޭ) ފޮނުވާލި ހަމަލާ އޮޑީގެ ގޯލު ކީޕަރު ވަނީ މަތަކޮށްފަ އެވެ.

މެޗުން ލިބުނު އެއް ޕޮއިންޓާ އެކު، އޮޑި އޮތީ ދެ ވަނައިގަ އެވެ. އެއީ މިހާތަނަށް ކުޅެފައިވާ 13 މެޗުން 29 ޕޮއިންޓާ އެކު އެވެ. އޮޑި އަތުން ހޯދި ޕޮއިންޓާ އެކު، ތިން ވަނައިގައި ނިއު ރޭޑިއަންޓް އަށް ލިބެނީ 24 ޕޮއިންޓެވެ. ލީގުގެ ފުރަތަމަ ބުރުގައި ވެސް މި ދެ ޓީމު ވާދަކޮށްފައިވާއިރު، އެ ފަހަރު އޮޑިން ވަނީ ނިއު ރޭޑިއަންޓް ބަލިކޮށްފަ އެވެ. 

މި ދެ ޓީމު އެއްވަރުވެފައިވާއިރު، ލީގު ތާވަލްގެ އެއް ވަނައިގައި އޮތް މާޒިޔާާ ސްޕޯޓްސް އެންޑް ރެކްރިއޭޝަން އަށް ވަނީ ފައިދާ ލިބިފަ އެވެ. އެއް ވަނައިގައި މާޒިޔާ އޮތީ އެ ޓީމު ކުޅެފައިވާ 13 މެޗުން 37 ޕޮއިންޓާ އެކު އެވެ.