ވިކްޓަރީ އިން ގްރީން ބަލިކޮށްފި

ދިރާގު ދިވެހި ޕްރިމިއާ ލީގުގައި ކުލަބު ގްރީން ސްޓްރީޓްސްއާ ދެކޮޅަށް ކުޅުނު މެޗުން މޮޅުވެ، ވިކްޓަރީ ސްޕޯޓްސް ކުލަބުން އެ ޓީމުގެ ރަނގަޅު ފޯމު ދަމަހައްޓައިފި އެވެ. 

ގްރީންއާ ދެކޮޅަށް ކުޅުނު މެޗު ވިކްޓަރީ އިން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ވިކްޓަރީ އިން ތިން ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ. ދެ ވަނަ ހާފުގައި ގްރީން އިން ވެސް ވަނީ ލަނޑެއް ޖަހައިފަ އެވެ. 

މެޗުގެ ފުރަތަމަ ހާފުގެ 16 ވަނަ މިނެޓުގައި ވިކްޓަރީ އަށް ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ މިލޯސް ލެޗުނީ އެވެ. އޭގެ ނުވަ ވަނަ މިނެޓު ފަހުން ވިކްޓަރީގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އަލީ ޝާމިސް އެވެ. 

މެޗުގެ ފުރަތަމަ ހާފުގެ އިތުރު ވަގުތުގައި ވިކްޓަރީ އިން ވަނީ ތިން ވަނަ ލަނޑެއް ވެސް ޖަހައިފަ އެވެ. ވިކްޓަރީ އަށް ލިބުނު ޕެނަލްޓީ ކާމިޔާބުކޮށް، އެ ލަނޑު އެ ޓީމަށް ޖަހައިދިނީ ލެޗުނީ އެވެ. ދެ ވަނަ ހާފު ފަށައިގެން ހަތަރު ވަނަ މިނެޓުގައި ޢަބްދުﷲ މިދުހަތު ފަހުމީ ވަނީ ވިކްޓަރީގެ ހަތަރު ވަނަ ލަނޑު ޖަހައިފަ އެވެ.

މެޗުގައި ވިކްޓަރީ އިން ހަތަރު ލަނޑު ޖެހި ފަހުން، ގްރީން އިން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ. އެގޮތުން މެޗުގެ 77 ވަނަ މިނެޓުގައި އެ ލަނޑު ގްރީން އަށް ޖަހައިދިނީ ރިލްވާން ވަޙީދު އެވެ.  

މޮޅާއެކު ވިކްޓަރީ އޮތީ ލީގު ތާވަލްގެ ހަ ވަނަ މަގާމުގަ އެވެ. އެއީ މިހާތަނަށް ކުޅެފައިވާ 12 މެޗުން 19 ޕޮއިންޓާ އެކު އެވެ. ލީގުގެ ދެ ވަނަ ބުރުގައި ވިކްޓަރީ އިން ވަނީ ހުރިހާ މެޗަކުން މިހާތަނަށް މޮޅުވެފަ އެވެ. އެގޮތުން ދެ ވަނަ ބުރުގެ ފުރަތަމަ މެޗުގައި ކުލަބު އީގަލްސްގެ މައްޗަށް ކުރި ހޯދިއިރު، ދެ ވަނަ މެޗުގައި ވަނީ ނިއު ރޭޑިއަންޓް ސްޕޯޓްސް ކުލަބު ވެސް ބަލިކޮށްފަ އެވެ. ތިން ވަނަ މެޗުގައި ގްރީން ބަލިކޮށް، ވިކްޓަރީ އިން މި ވަނީ މޮޅުވުން ދަމަހައްޓައިފަ އެވެ.