ޔޫވީ އަތުން މޮޅުވެ، އީގަލްސް ކުރިއަށް ޖެހިލައިފި

ދިރާގު ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން މޮޅުވެ، ކުލަބު އީގަލްސް އިން ލީގު ތާވަލްގައި ކުރިއަށް ޖެހިލައިފި އެވެ. 

ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އީގަލްސް އިން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި އީގަލްސް އިން ދެ ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ. ދެ ވަނަ ހާފުގައި ޔޫވީ އިން ވެސް ވަނީ ލަނޑެއް ޖަހައިފަ އެވެ.

މެޗުގެ ފުރަތަމަ ހާފުގެ 32 ވަނަ މިނެޓުގައި އީގަލްސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އީގަލްސް އަށް ޖަހައިދިނީ ޒައިން ޒަފަރު އެވެ. އޭގެ ފަހުން 41 ވަނަ މިނެޓުގައި އީގަލްސްގެ މުޙައްމަދު ޞަބާހު މަންސޫރު ވަނީ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު ޔޫވީ އިން ވަނީ ލަނޑެއް ޖަހައި ފަރަގު ކުޑަ ކޮށްފަ އެވެ. އެގޮތުން މެޗުގެ 59 ވަނަ މިނެޓުގައި ޔޫވީ އަށް އެ ލަނޑު ޖަަހައިދިނީ އެ ޓީމުގެ ބިދޭސީ ކުޅުންތެރިޔާ މުޙައްމަދު ސާމިރު އެވެ. ނަމަވެސް، އޭގެ ފަހުން އީގަލްސް އިން ވަނީ އިތުރު ދެ ލަނޑު ޖަހައިފަ އެވެ. 

މެޗުގެ 64 ވަނަ މިނެޓުގައި ޒައިން ވަނީ އީގަލްސްގެ ތިން ވަނަ ލަނޑު ޖަަހައި އިތުރަށް ލީޑު ފުޅާ ކޮށްފަ އެވެ. އޭގެ ފަހުން މެޗުގެ ފުރިހަމަ ވަގުތު ހަަމަވާން ދެ މިނެޓަށް ވެފައި ވަނިކޮށް، އީގަލްސްގެ ހަތަރު ވަނަ ލަނޑު ޖެހީ އިބްރާހީމް މަހުދީ ޙުސެއިން (ފޭދޫ އިއްބެ) އެވެ.

މޮޅާއެކު އީގަލްސް އިން ވަނީ ލީގު ތާވަލްގެ ފަސް ވަނަ މަގާމަށް ޖެހިލައިފަ އެވެ. އެއީ މިހާތަނަށް ލީގުގައި ކުޅެފައިވާ 14 މެޗުން 22 ޕޮއިންޓާ އެކު އެވެ. އީގަލްސް އިން ފަސް ވަނަ އަށް ޖެހިލިއިރު، ކުރިން ފަސް ވަަނައިގައި އޮތް ވިކްޓަރީ ސްޕޯޓްސް ކުލަބު ވަނީ ހަ ވަނަ އަށް ވެއްޓިފަ އެވެ. ލީގުގައި މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށް ކުޅުނު މެޗުން އެ ޓީމު ބަލިވެފައިވާއިރު، ހަ ވަނައިގައި އޮތީ 14 މެޗުން 20 ޕޮއިންޓާ އެކު އެވެ.