ޔޫވީ ބަލިކޮށް، މާޒިޔާ އިން އެއް ވަނައިގައި ލީޑު ފުޅާ ކޮށްފި

ދިރާގު ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އިން ލީޑު ފުޅާ ކޮށްފި އެވެ. 

ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި މާޒިޔާ އިން އެއް ލަނޑު ޖެހިއިރު، ދެ ވަނަ ލަނޑު އެ ޓީމުން ޖެހީ ފަހު ހާފުގަ އެވެ. މާޒިޔާ އިން ދެ ލަނޑު ޖެހި ފަހުން، ޔޫވީ އިން ވަނީ މެޗުގައި އެ ޓީމުގެ ހަމައެކަނި ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ހަމްޒާ މުޙައްމަދު (ހަމްޕު) އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ނާއިޒު ޙަސަން (ދާދު) ވަނީ މާޒިޔާގެ ދެ ވަނަ ލަނޑު ޖަހައިފަ އެވެ. 

މެޗުގައި ޔޫވީ އިން އެ ޓީމުގެ ހަމަ އެކަނި ލަނޑު ޖެހީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. މާޒިޔާގެ އޭރިޔާ ބޭރުން ލިބުނު ފުރުސަތެއްގައި ތިރި ތިރިން ފޮނުވާލައިގެން އެ ލަނޑު ޖެހީ ޔޫވީގެ ބިދޭސީ ކުޅުންތެރިޔާ މުޙައްމަދު ސާމިރު އެވެ.

ލީގުގައި ވިކްޓަރީ ސްޕޯޓްސް ކުލަބާއި، ކުލަބު ވެެލެންސިއާ ބައްދަލު ކުރި މެޗު ނިމުނީ 1-1 އިން އެއްވަރު ވެގެންނެވެ. މެޗުގައި ވެލެންސިއާގެ ބިދޭސީ ކުޅުންތެރިޔާ ސްޓެފަން ބްލޯންކް ޖެހި ލަނޑާ އެކު، އެ ޓީމުން ލީޑު ވެސް ނެގި އެވެ. ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ސަފްރާޒް އިބްރާހީމް ޖެހި ލަނޑުން ވިކްޓަރީ އިން ވަނީ ނަތީޖާ ހަމަހަމަ ކޮށްފަ އެވެ.

މޮޅާއެކު މާޒިޔާ އިން ވަނީ ލީގު ތާވަލްގެ އެއް ވަނައިގައި ނުވަ ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 13 މެޗުން މާޒިޔާ އަށް ލިބެނީ 37 ޕޮއިންޓެވެ. މާޒިޔާ އަށް ވުރެ އެއް މެޗު މަދުން ކުޅެގެން ދެ ވަނައިގައި އޮތް އޮޑި ސްޕޯޓްސް ކުލަބަށް ލިބެނީ 28 ޕޮއިންޓެވެ. ތިން ވަނައިގައި ނިއު ރޭޑިއަންޓް ސްޕޯޓްސް ކުލަބަށް ލިބެނީ 23 ޕޮއިންޓެވެ.

ވިކްޓަރީ އަތުން ހޯދި ޕޮއިންޓާ އެކު ވެެލެންސިއާ އޮތީ ލީގު ތާވަލްގެ ނުވަ ވަނަ މަގާމުގަ އެވެ. އެއީ މިހާތަނަށް ކުޅެފައިވާ 13 މެޗުން އަށް ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ވިކްޓަރީ އަށް 20 ޕޮއިންޓު ލިބޭއިރު، އެ ޓީމު އޮތީ ފަސް ވަނައިގަ އެވެ.