އަނެއްކާ ވެސް އީރާނަށް އިޒްރޭލުން ހަމަލާ ދީފާނެ ކަމުގެ އިންްޒާރު ޓްރަމްޕް ދެއްވައިފި

 އީރާނުން މިސައިލް އަދި ނިއުކްލިއަރ ޕްރޮގްރާމްތައް ތަރައްގީ ކުރުން ހުއްޓާނުލާ ނަމަ، އިޒްރޭލުން އަނެއްކާ ވެސް އީރާނަށް އަވަސް ހަމަލާއެއް ދިނުމަށް ތާއީދުކުރެއްވުމަށް ތައްޔާރަށް ހުންނެވި ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ ފްލޮރިޑާގައި ހުންނަ ޓްރަމްޕް ގެ މާރ-އަ-ލާގޯ އެސްޓޭޓް ގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަށް މަރުޙަބާ ވިދާޅުވުމަށް ބޭއްވި ހަފްލާ ގައި ނޫސްވެރިންނަށް ވާހަކަ ދައްކަވަމުންނެވެ.

"އީރާނުން އަނެއްކާވެސް ބާރު ގަދަ ކުރަން އުޅޭ ކަމަށް އިވެއެވެ. އަދި އެކަން އެގޮތަށް ކުރާނަމަ، އަހަރެމެން އެމީހުން ބަލިކުރަންޖެހެއެވެ." ޓްރަމްޕް ވިދާޅުވި އެވެ.

ނަތަންޔާހޫ އާއެކު ބޭއްވި ބައްދަލުވުމަށް ފަހު ޓްރަމްޕް އިތުރަށް ވިދާޅުވީ، އީރާނުގެ ބާރު ނައްތާލައްވާނެ ކަމަށެވެ.

އިޒްރޭލުގެ ބޮޑުވަޒީރު ނަތަންޔާހޫ އާ ޓްރަމްޕް ވަރަށް ބޮޑަށް އެއްބަސްވެ ތާއީދުކުރައްވާ ފަދަ މޭރުމަކުން ޓްރަމްޕް ވަނީ ވާހަކަފުޅު ދައްކަވާފަ އެވެ. 

ޓްރަމްޕް ވިދާޅުވީ، އިޒްރޭލާއި ފަލަސްތީނުގެ ޙަމާސްއާ ދެމެދު އެކުލަވާލެވިފައިވާ ހަނގުރާމަ ހުއްޓާލުމުގެ އެއްބަސްވުމުގެ ދެވަނަ ފިޔަވަހި އަވަހަށް ފެށޭނެ ކަމަށް އުންމީދުކުރައްވާ ކަމަށެވެ. ނަމަވެސް "ހަމާސްގެ ހަތިޔާރު ނައްތާލަންޖެހޭނެ" ކަމަށް ޓްރަމްޕް ވިދާޅުވިއެވެ.

ނަތަންޔާހޫ އަށް ތައުރީފުކުރައްވައި ނޫސްވެރިންނާ ދެއްކެވި ވާހަކަފުޅުގައި ޓްރަމްޕް ވިދާޅުވީ ނުބައި ބޮޑުވަޒީރަކު ހުރިނަމަ އިޒްރޭލު ދެމި އެއް ނޯންނާނެ ކަމަށެވެ.

ނަތަންޔާހޫ ގެ މައްޗަށް އުފުލާފައިވާ ކޮރަޕްޝަނާ ގުޅޭ ދައުވާތަކުން މާފު ދެއްވުމަށް ވިސްނަމުން ގެންދާ ކަމަށް އިޒްރޭލުގެ ރައީސް އައިޒެކް ހަރޒޯގް، ވިދާޅުވި ކަމަށް ވެސް ޓްރަމްޕް ވިދާޅުވި އެވެ.  ނަމަވެސް އޭގެ ކުޑައިރުކޮޅެއް ފަހުން، ހަރޒޯގް ގެ އޮފީހުން ބުނީ، ނަތަންޔާހޫ އަށް މާފު ދިނުމަށް ޓްރަމްޕް ހުށަހެޅުއްވި ފަހުން، އެމެރިކާގެ ރައީސް ޓްރަމްޕް އާ އިޒްރޭލުގެ ރައީސް އެއްވެސް ވާހަކަ އެއް ދައްކާފައި ނުވާނެ ކަމަށެވެ.

ޓްރަމްޕް އިތުރަށް ވިދާޅުވީ، ސީރިއާގެ ކުރީގެ ވެރިޔާ ބައްޝާރުލް އަސަދު ފާއިތުވި އަހަރުގެ ފަހުކޮޅު މަގާމުން ވަކިކުރި ފަހުން، ނަތަންޔާހޫގެ ސަރުކާރުން ސީރިއާގެ ސިޔާދަތަށް ނިސްބަތްވާ ސަރަހައްދުތަކަށް ގަވައިދުން އަރައިގަނެފައިވީ ނަމަވެސް، އިޒްރޭލަށް ސީރިއާ އާއެކު ރަނގަޅު ގުޅުމެއް ބޭއްވޭނެ ކަމަށް އުންމީދުކުރައްވާ ކަމަށެވެ.

އިޒްރޭލާއި ޙަމާސްއާ ދެމެދު އޮކްޓޯބަރު މަހު ހަނގުރާމަ ހުއްޓާލުމުގެ އެއްބަސްވުމެއްގައި ސޮއިކޮށްފައިވީ ނަމަވެސް، އެއްބަސްވުމާ ޚިލާފުވުންތައް ގިނަވެފައިވާ ކަމަށް ރިޕޯޓްތައް ބުނެއެވެ. އަދި ދިގު މުއްދަތުގެ ލަނޑުދަނޑިތައް ހާސިލުކުރުމުގައި އެއްވެސް ކުރިއެރުމެއް ފެނިފައެއް ނުވެއެވެ.