ހަމާސްގެ މަގުބޫލު ތަރުޖަމާނު އަބޫ އުބައިދާ ޝަހީދުވެފައިވާކަން ހަމާސް އިން ކަށަވަރުކޮށް ދީފި

 ހަމާސް ގެ ތަރުޖަމާނު އަބޫ އުބައިދާ ޝަހީދުވެފައިވާކަން ޙަމާސްގެ އަސްކަރީ ވިންގުން ކަށަވަރު ކޮށްދީފި އެވެ.

ހޯމަ ދުވަހު އެ ޖަމާއަތުން މިކަން އިއުލާނު މި ކުރީ އިޒްރޭލުން އޭނާ އަށް ޓާގެޓް ކޮށް ޣައްޒާ އަށް ދިން ވައިގެ ހަމަލާއެއްގައި އޭނާ ޝަހީދުވެފައިވާ ކަން އިޒްރޭލުން އިއުލާނު ކުރިތާ އެތައް މަސްތަކެއް ފަހުންނެވެ.

އިއްޒައްދީން އަލް-ޤައްސާމް ބްރިގޭޑްސް އިން އެ ޖަމާޢަތުގެ ޓެލެގްރާމް ޗެނަލްގައި ޝާއިއުކުރި ވީޑިއޯ ބަޔާނެއްގައި ބުނެފައިވަނީ "އެތައް މިލިއަން މީހުންގެ ލޯބި ލިބިފައިވާ....އަލް-ޤައްސާމް ބްރިގޭޑްސްގެ މަތިވެރި ކޮމާންޑަރު އަދި ތަރުޖަމާނު، އަބޫ އުބައިދާ،" ޝަހީދުވެފައިވާ ކަމަށެވެ.

އިޒްރޭލުން އޮގަސްޓު 30 ގައި ޣައްޒާ އަށް ދިން ހަމަލާއެއްގައި އަބޫ އުބައިދާ ޝަހީދުކޮށްލާފައިވާ ކަމަށް އިއުލާނުކޮށްފައިވެ އެވެ.

އަބޫ އުބައިދާގެ އަސްލު ނަމަކީ ހުޒައިފާ ސަމީރު އަލް-ކަހްލޫތު އެވެ.

ހަނގުރާމައިގެ ތެރޭގައި ޣައްޒާގެ ރައްޔިތުންނާއި، އަރަބި އަދި ބައިނަލްއަޤްވާމީ މީޑިއާތަކުން އޭނާގެ ވާހަކަތަކަށް އިންތިޒާރު ކުރަމުން ގެންގޮސްފައިވެއެވެ. އެއީ ހަމާސް ގެ ފަރާތުން އެކިއެކި ކަންކަމުގައި ސިޔާސަތުތައް އާންމު ކުރާ މައިގަނޑު ފަރާތުގެ ގޮތުގައި އޭނާ ފާހަގަ ކުރެވިފައިވާތީ އެވެ. އޭނާ މެދުވެރިކޮށް ހަމާސްގެ އަސްކަރީ ވިންގުން ހާމަކުރާ ރަސްމީ ބަޔާންތަކަށާއި، ހާއްސަކޮށް ހަނގުރާމައިގެ ހާލަތުގައި ރަހީނު ކޮށްފައި ތިބި މީހުން ބަދަލު ކުރުމުގެ އޮޕަރޭޝަންތަކާ ބެހޭ މައުލޫމާތުތަކަށް ގިނަ ބަޔަކު އިންތިޒާރު ކުރަމުން ދިޔަކަން ފާހަގަ ކުރެވެއެވެ.

1985 ވަނަ އަހަރުގެ ފެބުރުއަރީ މަހުގެ 11 ވަނަ ދުވަހު އުފަންވި ޣައްޒާގެ އުތުރުގައިވާ ޖަބާލިއާ ރެފިއުޖީ ކޭމްޕްގައި ބޮޑުވި އަބޫ އުބައިދާ ވަނީ ވަރަށް ޅަ އުމުރުގައި ހަމާސްއާ ގުޅި، ފަހުން އިއްޒައްދީން އަލް-ޤައްސާމް ބްރިގޭޑްސްގެ މެންބަރަކަށް ވެފަ އެވެ.

ފަހުން އޭނާވަނީ އެ ޖަމާޢަތުގެ ހަމައެކަނި ތަރުޖަމާނުގެ މަގާމު ފުރާފަ އެވެ. އޭނާގެ ވީޑިއޯ ބަޔާންތައް ހުށަހަޅާފައި ވަނީ އަސްކަރީ ހެދުމުގައި، އަބަދުވެސް އޭނާގެ މޫނު ރަތް ކަފިއްޔާ އަކުން ނިވާކޮށްގެން ހުރެ އެވެ.

އިޒްރޭލުން އެތައް ފަހަރަކު އޭނާގެ ފުރާނަ ދުއްވާލުމަށް އެތައް މަސައްކަތެއް ކޮށްފައިވެ އެވެ.

އަބޫ އުބެއިދާ މަޝްހޫރުވެފައިވަނީ އޭނާގެ ވަރުގަދަ އަދި އަސަރުގަދަ ތަޤުރީރުތަކުންނެވެ. އޭގެތެރޭގައި އިޒްރޭލަށް ދޭ އިންޒާރުތަކާއި އަސްކަރީ އޮޕަރޭޝަންތަކުގެ އިއުލާނުތައް ހިމެނެ އެވެ.

"ގިނަ އަހަރުތަކެއް ވަންދެން، ހަމާސްގެ އޮފިޝަލުންގެ ތެރެއިން ވެސް ވަރަށް މަދު ބަޔަކަށް ނޫނީ އޭނާގެ އައިޑެންޓިޓީ ނޭނގޭ،" ކަމަށް ހަމާސްގެ އޮފިޝަލަކު  އޭއެފްޕީ އަށް ބުންޏެވެ.

ހަމާސް ޖަމާޢަތް މުޅިން ނައްތާލުމަށް މަސައްކަތްކުރާ ކަމަށް ބުނެ، އިޒްރޭލުން ވަނީ 2023 ވަނަ އަހަރުގެ އޮކްޓޯބަރު 7 ގައި ހަމާސް އިން އިޒްރޭލަށް ދިން ހަމަލާ އަށް ފަހު، އެ ޖަމާޢަތުގެ ގިނަ އިސްވެރިން ޝަހީދު ކޮށްލާފަ އެވެ. 

އަބޫ އުބައިދާ ޝަހީދުވިކަން އިއުލާނުކުރި ވީޑިއޯ ހުށަހަޅާފައި ވަނީ ކުރީގެ ތަރުޖަމާނުގެ ސްޓައިލް ދައްކައިދޭ ޚާއްސަ ހެދުމުގައި ހުރި މީހެކެވެ. އޭނާ ބުނެފައި ވަނީ ބަޔާންތައް ދިނުމުގައި އޭނާ ކުރީގެ ތަރުޖަމާނުގެ ނަން ބޭނުން ކުރާނެ ކަމަށެވެ.

ހަމަ އެ ވީޑިއޯގައި، އޭނާވަނީ މި ހަނގުރާމައިގައި އިޒްރޭލުން ދިން ހަމަލާތަކުގައި ހަމާސްގެ އިތުރު ހަތަރު ލީޑަރަކު ޝަހީދުވެފައިވާ ކަންވެސް އިއުލާނުކޮށްފަ އެވެ.