ޓްރަމްޕް ގްރީންލޭންޑް ހޯއްދަވާނެ ކަމަށް ވިދާޅުވެފައި ވަނިކޮށް ވިލާތުގެ އަސްކަރީ ފައުޖުތައް ގްރީންލޭންޑަށް ފޮނުވަން ފަށައިފި

އެމެރިކާ އިން ގްރީންލޭންޑް ބޭނުންވާ ކަމަށް ޓްރަމްޕް ވިދާޅުވަމުން ދަނިކޮށް، ވިލާތުގެ އަސްކަރީ ފައުޖުތައް ގްރީންލޭންޑަށް ފޮނުވަން ފަށައިފި އެވެ.

ގްރީންލޭންޑުގެ ވެރިރަށް ނޫކް އަށް ފްރާންސުގެ އަސްކަރީ ފައުޖެއް ގޮސްފައިވާ ކަމަށް އޮފިޝަލުން ވަނީ ހާމަކޮށްފައެވެ. މިއީ "ރިކޮނައިސަންސް" ނުވަތަ މައުލޫމާތު އެއްކުރުމުގެ މިޝަނެއްގެ ދަށުން ވިލާތުގެ ބައެއް ގައުމުތަކުން ކުރިއަށްގެންދާ ހަރަކާތެއް ކަމަށް ވެސް ބުނެފައިވެ އެވެ.

ޑެންމާކުގެ ސަރަހައްދެއްގެ ގޮތުގައި އޮންނަ ގްރީންލޭންޑަކީ އެމެރިކާގެ ބައެއްގެ ގޮތުގައި ހެދުމަށް ރައީސް ޑޮނަލްޑް ޓްރަމްޕް ބާރުއަޅުއްވަމުން ގެންދަވާ ދަނިކޮށް، އެތަނަށް ފޮނުވި ފައުޖުގައި ފްރާންސުގެ އިތުރުން ޖަރުމަނު، ސުވިޑަން، ނޯވޭ، ފިންލޭންޑް، ނެދަލޭންޑްސް އަދި އިނގިރޭސިވިލާތުގެ މަދު އަދަދެއްގެ ސިފައިން ހިމެނިފައިވެ އެވެ.

ފްރާންސުގެ ރައީސް އެމަނުއެލް މެކްރޮން ވިދާޅުވީ، މިހާރު ފޮނުވާފައިވާ ފައުޖު ވަރުގަދަކުރުމުގެ ގޮތުން އެއްގަމާއި، ވައިގެ އަދި ކަނޑުގެ އަސްކަރީ ވަސީލަތްތައް ކުރިއަށް އޮތް ތަނުގައި ފޮނުއްވާނެ ކަމަށެވެ.

ސީނިއާ ޑިޕްލޮމެޓެއް ކަމަށްވާ އޮލިވިއޭ ޕޮއިވްރޭ ޑި އާވޯ ފާހަގަކުރެއްވި ގޮތުގައި، މިއީ ސިޔާސީ ގޮތުން ވަރުގަދަ މެސެޖެއް ދިނުމަށް ކުރާ ކަމެކެވެ. އޭނާ ވިދާޅުވީ، މިއީ ފެށުމެއް ކަމަށާއި، ނޭޓޯގެ ބާރު އެ ސަރަހައްދުގައި އޮތްކަން އެމެރިކާ އަށް ދައްކައިދޭނެ ކަމަށެވެ. ފްރާންސުން ފޮނުވި ފުރަތަމަ ފައުޖުގައި 15 މީހުން ހިމެނެ އެވެ. މިއީ ޑެންމާކާއި ގްރީންލޭންޑުގެ ފޮރިން މިނިސްޓަރުން ވޮޝިންޓަނަށް ވަޑައިގެން އެމެރިކާގެ ނައިބު ރައީސް ޖޭ.ޑީ ވޭންސް އާ ބައްދަލުކުރެއްވިތާ މަދު ގަޑިއިރުތަކެއްގެ ތެރޭގައި ހިނގި ކަމެކެވެ.

އެ ބައްދަލުވުމަށްފަހު ޑެންމާކުގެ ފޮރިން މިނިސްޓަރު ލާސް ލޮކޭ ރަސްމުސެން ވިދާޅުވީ، މަޝްވަރާތައް ބިނާކުރަނިވި ނަމަވެސް، ދެ ފަރާތުގެ މެދުގައި "އަސާސީ ޚިޔާލުތަފާތުވުންތަކެއް" އެބަހުރި ކަމަށެވެ. އަދި ފަހުން އޭނާ ވަނީ ގްރީންލޭންޑް ގަތުމަށް ޓްރަމްޕް ކުރައްވާ މަސައްކަތަށް ފާޑުވިދާޅުވެފަ އެވެ.

މިކަމާ ގުޅިގެން ޓްރަމްޕް ވަނީ ގްރީންލޭންޑް އެމެރިކާގެ ބާރުގެ ދަށަށް ގެނައުމަށް ކުރާ މަސައްކަތް އިތުރަށް ވަރުގަދަކުރައްވާފަ އެވެ. އޭނާ ވިދާޅުވީ އެމެރިކާގެ ގައުމީ ސަލާމަތަށްޓަކައި ގްރީންލޭންޑް ބޭނުންވާ ކަމަށެވެ. އަދި ރަޝިޔާ ނުވަތަ ޗައިނާއިން އެ ރަށް ހިފަން އުޅުނަސް ޑެންމާކަށް ކުރެވޭނެ ކަމެއް ނެތް ކަމަށާއި، ނަމަވެސް އެމެރިކާ އަށް އެކަން ހުއްޓުވޭނެ ކަމަށް އޭނާ ވިދާޅުވި އެވެ.

ޕޮލެންޑުގެ ބޮޑުވަޒީރު ޑޮނަލްޑް ޓުސްކް އިންޒާރު ދެއްވި ގޮތުގައި، އެމެރިކާ އިން ގްރީންލޭންޑަށް އަސްކަރީ ގޮތުން އަތްގަދަކޮށްފި ނަމަ، އެއީ ސިޔާސީ ބޮޑު ކާރިސާއަކަށް ވާނެއެވެ. ނޭޓޯގެ މެންބަރު ގައުމަކުން އަނެއް މެންބަރު ގައުމެއްގެ ސަރަހައްދެއް ހިފުމަކީ ދުނިޔޭގެ ސަލާމަތީ ނިޒާމު ފުނޑުފުނޑުވެގެންދާނެ ކަމެއް ކަމަށް އޭނާ ވިދާޅުވި އެވެ.

ބެލްޖިއަމް ގައި ހުންނަ ރަޝިޔާގެ އެމްބަސީން ވަނީ އާކްޓިކް ސަރަހައްދުގައި ހިނގަމުންދާ ކަންކަމާ މެދު ކަންބޮޑުވުން ފާޅުކޮށްފަ އެވެ. އެމްބަސީން ތުހުމަތުކުރި ގޮތުގައި ނޭޓޯ އިން އެ ސަރަހައްދުގައި އަސްކަރީ ބާރު ގަދަކުރަނީ ރަޝިޔާ އާއި ޗައިނާގެ ނުރައްކާ އޮތް ކަމަށް ބުނެ ދޮގު ބަހަނާތަކެއް ދައްކައިގެންނެވެ.

ވިލާތުގެ ގައުމުތަކުން ފޮނުވި ސިފައިންނަކީ ޑެންމާކުން އިސްވެ އޮވެ ހިންގާ "އޮޕަރޭޝަން އާކްޓިކް އެންޑިއުރެންސް" ގެ ބައެއް ކަމަށް ބުނެފައިވެ އެވެ. މިއީ ރަމްޒީ ގޮތުން މުހިންމު ހަރަކާތެއް ނަމަވެސް، މި ފައުޖުތައް އެތަނުގައި ތިބޭނީ ކިހާ ދުވަހަކަށް ކަމެއް ސާފެއް ނޫނެވެ.

ޖަރުމަނުން ވަނީ 13 ސިފައިންނާއެކު އޭ400އެމް މަރުކާގެ މަތިންދާބޯޓެއް ނޫކްއަށް ފޮނުވާފައެވެ. ނަމަވެސް އެ މީހުން އެތަނުގައި މަޑުކުރާނީ އަންނަ ހޮނިހިރު ދުވަހާ ހަމައަށް ކަމަށް ވަނީ ބުނެފަ އެވެ.

ޑެންމާކުގެ އަސްކަރީ އޮފިޝަލުން ވިދާޅުވީ، ގްރީންލޭންޑުގެ ސަރުކާރާ ގުޅިގެން އެ ސަރަހައްދުގައި އަސްކަރީ ހަރަކާތްތައް އިތުރުކުރުމަށް ނިންމާފައިވަނީ، އާކްޓިކް ސަރަހައްދުގައި ނޭޓޯގެ ބާރު ވަރުގަދަކޮށް، ވިލާތާއި އެޓްލާންޓިކް ސަރަހައްދުގެ ސަލާމަތްތެރިކަން ކަށަވަރުކުރުމަށެވެ.

ފްރާންސުގެ އަސްކަރިއްޔާ އާ މުޚާތަބުކުރައްވައި ދެއްވި އައު އަހަރުގެ މެސެޖުގައި ރައީސް މެކްރޮން ވިދާޅުވީ، ގްރީންލޭންޑަކީ ވިލާތުގެ އިއްތިހާދުގެ ބައެއް ކަމަށްވެފައި، އެއީ ނޭޓޯގެ ބައިވެރިއަކަށް ވާތީ، އެ ސަރަހައްދު ހިމާޔަތްކުރުމަކީ ވިލާތުގެ ގައުމުތަކުގެ ޒިންމާ އެއް ކަމަށެވެ.

ފިންލޭންޑުން ވެސް ވަނީ އެ ގައުމުގެ އަސްކަރިއްޔާގެ ދެ އޮފިސަރަކު މި މިޝަންގެ ތެރެއިން މައުލޫމާތު އެއްކުރުމަށް ފޮނުވާފަ އެވެ. ފިންލޭންޑުގެ ޑިފެންސް މިނިސްޓްރީގެ ޕޮލިސީ ޑިޕާޓްމަންޓުގެ ވެރިޔާ ޔާން ކޫސޭލާ ބީބީސީ އަށް މައުލޫމާތު ދެއްވަމުން ވިދާޅުވީ، މި ވަގުތު އެއްވެސް ކަމެއް ނުކުރާނެ ކަމަށް ނިންމާފައި ނުވާ ކަމަށާއި، ނަމަވެސް ވަކި ޚާއްޞަ ކަމެއް ކުރުމަށް ވެސް އަދި ރާވާފައި ނުވާ ކަމަށެވެ.

ފިންލޭންޑަކީ ވެސް އާކްޓިކް ސަރަހައްދުގެ ގައުމަކަށް ވާއިރު، ކޫސޭލާ ފާހަގަކުރެއްވި ގޮތުގައި މި ހަރަކާތުގެ މަގްސަދަކީ ގްރީންލޭންޑުގައި ނޭޓޯގެ ބާރު އޮތް މިންވަރާ މެދު އުފެދިފައިވާ ކަންބޮޑުވުންތަކަށް ހައްލެއް ހޯދައި، އެ ސަރަހައްދުގެ ދިފާއީ ކަންކަން ވަރުގަދަކުރުމެވެ.