ބާރުގެ ބޭނުން ކޮށްގެން ވިޔަސް ގްރީންލޭންޑް ހިފާނެ ކަމަށް ޓްރަމްޕް ވިދާޅުވެއްޖެ
ގްރީންލޭންޑާ ގުޅޭ ގޮތުން ސުވާލު ކުރުމުން އެންމެ ފުރަތަމަ ޓްރަމްޕް ވިދާޅުވީ، އެމެރިކާ އިން ބޭނުން ވަނީ ފަަސޭހަ ގޮތެއްގައި އެކަން ކުރަން ކަމަށް. އެހެން ނަމަވެސް، ފަސޭހަ ގޮތެއްގައި އެކަން ނުވެއްޖެ ނަމަ، އުނދަގޫ ގޮތެއްގައި އެމެރިކާ އިން އެކަން ކުރާނެ ކަމަށް ވެސް ޓްރަމްޕް ވިދާޅުވި.
އެމެރިކާގެ ރައީސް ޑޮނަލްޑް ޓްރަމްޕް | ރޮއިޓަސް
ބާރުގެ ބޭނުން ކޮށްގެން ކަމަށް ވިޔަސް، ގްރީންލޭންޑް ހިފާނެ ކަމަށް ދޭހަވާ މޭރުމަކުން އެމެރިކާގެ ރައީސް ޑޮނަލްޑް ޓްރަމްޕް ވާހަކަ ދައްކަވައިފި އެވެ.
އެމެރިކާގެ ރިޔާސީ ގަނޑުވަރު، ވައިޓް ހައުސްގައި ވެނެޒުއެލާގެ ތެލުގެ ވިޔާފާރިން ފައިދާ ހޯދަން ބޭނުންވާ ވިޔަފާރިވެރިންނާ ބައްދަލު ކުރައްވައި ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، ބަޔަކު ބޭނުން ވިޔަސް ނުވިޔަސް، އެމެރިކާ އިން ގްރީންލޭންޑާ މެދު ފިޔަވަޅެއް އަޅުއްވާނެ ކަމަށެވެ. ޓްރަމްޕްގެ މި ވާހަކަ ތަކަކީ، އާކްޓިކް ސަރަހައްދުގެ މި ޖަޒީރާއާ މެދު، އިޙުތިރާމެއް ނެތް ގޮތެއްގައި ދައްކަވާފައިވާ ވާހަކައެއް ކަމަށް މާހިރުން ފާހަގަ ކޮށްފައިވެ އެވެ.
ގްރީންލޭންޑާ ގުޅޭ ގޮތުން ސުވާލު ކުރުމުން އެންމެ ފުރަތަމަ ޓްރަމްޕް ވިދާޅުވީ، އެމެރިކާ އިން ބޭނުން ވަނީ ފަަސޭހަ ގޮތެއްގައި އެކަން ކުރަން ކަމަށެވެ. އެހެން ނަމަވެސް، ފަސޭހަ ގޮތެއްގައި އެކަން ނުވެއްޖެ ނަމަ، އުނދަގޫ ގޮތެއްގައި އެމެރިކާ އިން އެކަން ކުރާނެ ކަމަށް ވެސް ޓްރަމްޕް ވިދާޅުވި އެވެ. ޓްރަމްޕް އެ އިޝާރާތް ކުރެއްވީ ބާރުގެ ބޭނުން ކޮށްގެން ވިޔަސް، ގްރީންލޭންޑް ހިފާނެ ވާހަކަ ކަމަށް މާހިރުން ބުނެފައިވެ އެވެ.
ޓްރަމްޕް ވިދާޅުވީ މައުދަނުގެ މުއްސަނދިކަން އޮތް އެ ޖާޒީރާ ކޮންޓްރޯލް ކުރުމަކީ، އެމެރިކާގެ ޤައުމީ ސަލާމަތަށް ވެސް ވަރަށް މުހިންމު ކަމެއް ކަމަށެވެ. އަދި އާކްޓިކް ސަރަހައްދުގައި ރަޝިޔާ އާއި ޗައިނާގެ ސިފައިންގެ ޙަރަކާތްތައް އިތުރު ވަމުން އަންނަ ކަމަށް ފާހަގަ ކުރެއްވި އެވެ. އެ ސަރަހައްދުގައި ރަޝިޔާ އާއި ޗައިނާގެ ނުފޫޒު ގަދަ ވަމުން އަންނަ ކަމަށް ވިދާޅުވެ، މީގެ ކުރިން ވެސް ޓްރަމްޕް ވަނީ ނުރުހުން ފާޅު ކުރައްވައިފަ އެވެ.
އެގޮތުން ޓްރަމްޕް ވިދާޅުވީ ރަޝިޔާ އާއި ޗައިނާ އިން ގްރީންލޭންޑް ހިފުމަށް އޭނާ ދޫކޮށް ނުލައްވާނެ ކަމަށެވެ. އެމެރިކާ އިން އެކަން ނުކޮށްފި ނަމަ، ރަޝިޔާ އާއި ޗައިނާ އިން އެ ސަރަހައްދުގައި އަތް ގަދަ ކުރާނެ ކަމަށް ޓްރަމްޕް ވިދާޅުވި އެވެ. އެހެންކަމުން ގްރީންލޭންޑާ މެދު އެމެރިކާ އިން ކޮންމެ ވެސް ފިޔަވަޅެއް އަޅާނެ ކަމަށާއި، އެއީ ރީތި ގޮތުގައި ނުވަތަ ހަޑި ގޮތުގައި ކަމަށް ވެސް ޓްރަމްޕް ވިދާޅުވެފައިވެ އެވެ.
ރަޝިޔާ އާއި ޗައިނާ އިން މި ފަހަކަށް އައިސް އާކްޓިކް ސަރަހައްދުގައި ސިފައިންގެ ޙަރަކާތްތައް އިތުރު ކޮށްފައި ވީ ނަމަވެސް، އެއްވެސް ޤައުމަކުން އެ ޖަޒީރާގެ ހައްގަށް ދައުވާ ކޮށްފައި ނުވެ އެވެ.
ގްރީންލޭންޑް ހިފާނެ ކަމަށް ބުނެ ޓްރަމްޕް ވާހަކަ ދައްކަވަން ފައްޓަވާފާއިވާއިރު، ޑެންމާކާއި ޔޫރަޕުގެ ޤައުމު ތަކުން އަންނަނީ އެކަމުގެ ކަންބޮޑުވުން ފާޅު ކުރަމުންނެވެ. އެ ވާހަކަތަކާ ދެކޮޅަށް އެތައް ޤައުމަކުން ބަޔާން ނެރެފައިވާއިރު، ގްރީންލޭންޑުގައި މިހާރު ވެސް އެމެރިކާ އަސްކަރިއްޔާގެ ބޭހެއް ހުރެ އެވެ.
