ޑެންމާކުގެ ބޮޑުވަޒީރު: ގްރީންލޭންޑުގެ މައްސަލަ އޮތީ "ނިންމުންތަކެއް ނިންމަންޖެހޭ ނާޒުކު މަރުހަލާ އެއް ގައި"

އާކްޓިކް ސަރަހައްދުގައި އޮންނަ ގްރީންލޭންޑް، ބާރުގެ ބޭނުންކޮށްގެން އެމެރިކާގެ ބާރުގެ ދަށަށް ގެންދާނެކަމަށް ރައީސް ޑޮނަލްޑް ޓްރަމްޕް ދެއްވި އިންޒާރުތަކާ ގުޅިގެން، އެ ސަރަހައްދުގެ މުސްތަގުބަލާމެދު ގައުމަށް މިހާރު ކުރިމަތިވެފައިވަނީ "ނިންމުންތަކެއް ނިންމަންޖެހޭ ނާޒުކު ދަނޑިވަޅެއް" ކަމަށް ޑެންމާކުގެ ބޮޑުވަޒީރު މެޓެ ފްރެޑްރިކްސަން ވިދާޅުވެއްޖެ އެވެ.

ދުނިޔޭގެ ބާރުތަކުން މުހިންމު ރައުސްމާލުތަކާއި ވަސީލަތްތައް ހޯދުމަށް ކުރަމުންދާ މަސައްކަތްތަކާ ގުޅޭގޮތުން ވޮޝިންޓަންގައި ބޭއްވުމަށް ހަމަޖެހިފައިވާ ބައްދަލުވުންތަކުގެ ކުރިން ވާހަކަދައްކަވަމުން ފްރެޑްރިކްސަން ވިދާޅުވީ، ގްރީންލޭންޑާ ގުޅޭގޮތުން މިހާރު "ކުރިމަތިލުމެއް" އުފެދިފައިވާ ކަމަށެވެ. ޑެންމާކުގެ އެހެން ސިޔާސީ ލީޑަރުންނާއެކު ބޭއްވި މަޝްވަރާ އެއްގައި އޭނާ ފާހަގަކުރެއްވި ގޮތުގައި، މިއީ ހަމައެކަނި ގްރީންލޭންޑުގެ މުސްތަގުބަލާ ގުޅޭ ކަމެއް ނޫން ކަމަށާއި، މީގެ ނަތީޖާ މުޅި ސަރަހައްދަށް ކުރާނެ ކަމަށެވެ.

ފްރެޑްރިކްސަންގެ ފޭސްބުކް ޕޯސްޓެއްގައި ވިދާޅުވީ، އާކްޓިކް ސަރަހައްދު ހިމެނޭހެން ކޮންމެ ތަނެއްގައި ވެސް ޑެންމާކުން ގެންގުޅޭ ހަމަތަކާއި އުސޫލުތައް ދިފާއުކުރުމަށް އެ ގައުމު އޮތީ ތައްޔާރަށް ކަމަށެވެ. 

ގްރީންލޭންޑަކީ ޑެންމާކުގެ ބާރުގެ ދަށުގައި އޮންނަ، ނަމަވެސް އަމިއްލަ ދާހިލީ އިދާރީ ހިންގުމެއް އޮންނަ ސަރަހައްދެކެވެ. ޓްރަމްޕްގެ މި ނިންމުމާ ދެކޮޅަށް ޖަރުމަނާއި ސްވިޑްން އިން ވެސް ވަނީ ޑެންމާކަށް ތާއީދުކޮށްފަ އެވެ.

ގްރީންލޭންޑުގެ ރައްޔިތުން ގަބޫލުވިޔަސް ނުވިޔަސް، އެމެރިކާ އިން އެތަނާ މެދު "ފިޔަވަޅެއް އަޅާނެ" ކަމަށް ޓްރަމްޕް ތަކުރާރުކޮށް ވިދާޅުވުމާ ގުޅިގެން، ސްވިޑްންގެ ބޮޑުވަޒީރު އުލްފް ކްރިސްޓަސަން ވަނީ އެމެރިކާގެ އެ އިންޒާރުތައް ކުށްވެރިކުރައްވާފަ އެވެ. "ސްވިޑްން އާއި، ނޯޑިކް ގައުމުތަކާއި، ބޯލްޓިކްގެ ގައުމުތަކުގެ އިތުރުން ޔޫރަޕްގެ ބޮޑެތި ގައުމުތައް މިވަނީ ޑެންމާކާ އެކު ސާބިތުކަމާ އެކު،" ނޭޓޯގެ އިސް ޖެނެރަލުން ބައިވެރިވެވަޑައިގެންނެވި ދިފާއީ ކޮންފަރެންސެއް ގައި އޭނާ ވިދާޅުވިއެވެ.

ކްރިސްޓަސަން އިތުރަށް ވިދާޅުވީ، ގުދުރަތީ މައުދަނުން މުއްސަނދި ގްރީންލޭންޑް އެމެރިކާގެ ދަށަށް ގެންދިއުމަކީ ބައިނަލްއަގުވާމީ ގާނޫނުތަކާ ހިލާފު ކަމެއް ކަމަށާއި، މީގެ ސަބަބުން އެހެން ގައުމުތަކުންވެސް މިފަދަ އަމަލުތައް ހިންގުމަށް ހިތްވަރު ލިބިގެންދާނެ ކަމަށެވެ.

ޖަރުމަނުން ވެސް ވަނީ ވޮޝިންޓަންގެ ބައްދަލުވުންތަކުގެ ކުރިން ޑެންމާކާއި ގްރީންލޭންޑަށް އޮތް ތާއީދު އާކޮށްފައެވެ. ޖަރުމަނުގެ ފޮރިން މިނިސްޓަރު ޔޯހަން ވެޑެފުލް ވަނީ އައިސްލޭންޑްގެ އޮފިޝަލުންނާ ބައްދަލުކުރައްވައި، އުތުރުގެ ސަރަހައްދުތަކަށް ކުރިމަތިވެފައިވާ ސްޓްރެޓީޖިކް ގޮންޖެހުންތަކާ ބެހޭގޮތުން މަޝްވަރާކުރައްވާފަ އެވެ. އޭނާ ވިދާޅުވި ގޮތުގައި އާކްޓިކް ސަރަހައްދުގެ ސަލާމަތީ ކަންކަމަކީ ނޭޓޯގެ މެންބަރު ހުރިހާ ގައުމުތަކެއްގެ މަސްލަހަތާ ގުޅިފައިވާ ކަމެކެވެ.

އިނގިރޭސިވިލާތުގެ 'ޓެލެގްރާފް' ނޫހުން ރިޕޯޓްކޮށްފައިވާ ގޮތުގައި، އިނގިރޭސިވިލާތާއި ޔޫރަޕްގެ އަސްކަރީ އިސްވެރިން ދަނީ ގްރީންލޭންޑްގައި ނޭޓޯގެ މިޝަނެއް ފެށުމަށް ތައްޔާރުވަމުންނެވެ. މީގެ މަގުސަދަކީ ރަޝިޔާ އާއި ޗައިނާގެ ނުފޫޒުން ގްރީންލޭންޑް ހިމާޔަތްކުރުމަށްޓަކައި އެ ސަރަހައްދަށް ސިފައިންނާއި، މަނަވަރުތަކާއި އަދި އަސްކަރީ ބޯޓުތައް ފޮނުވުމެވެ.

އިނގިރޭސި ޓްރާންސްޕޯޓް ސެކްރެޓަރީ ހެއިޑީ އެލެގްޒެންޑާ ވިދާޅުވި ގޮތުގައި، އާކްޓިކް ސަރަހައްދުގައި ރަޝިޔާގެ ރައީސް ވްލަޑިމިއަރ ޕުޓިންގެ ނުފޫޒު ހުއްޓުވުމާ ގުޅޭގޮތުން ކުރެވޭ މަޝްވަރާތަކަކީ އާންމުކޮށް ކުރެވެމުންދާ މަސައްކަތްތަކެކެވެ. އަދި އެ ސަރަހައްދަކީ ޖިއޯޕޮލިޓިކަލް ގޮތުން ވާދަވެރިކަން ބޮޑުވަމުންދާ ތަނަކަށް ވުމުން، ނޭޓޯގެ އެކުވެރިންނާ ގުޅިގެން ރަޝިޔާގެ އުދުވާނުތައް ހުއްޓުވުމަށް މަސައްކަތްކުރަން ޖެހޭ ކަމަށް އޭނާ ވިދާޅުވި އެވެ.

ބެލްޖިއަމްގެ ޑިފެންސް މިނިސްޓަރު ތިއޯ ފްރެންކަން ވިދާޅުވީ، އެމެރިކާގެ ސަލާމަތީ ކަންބޮޑުވުންތަކަށް ހައްލެއް ހޯދުމަށް ނޭޓޯ އިން އާކްޓިކް ގައި އޮޕަރޭޝަނެއް ފަށަންޖެހޭ ކަމަށެވެ. އޭނާ ލަފާދެއްވީ "އާކްޓިކް ސެންޓްރީ" ގެ ނަމުގައި، ޑްރޯން އާއި ސެންސަރު ފަދަ ޒަމާނީ ޓެކްނޮލޮޖީ ބޭނުންކޮށްގެން އެ ސަރަހައްދު ބަލަހައްޓާނެ ނިޒާމެއް ގާއިމުކުރުމަށެވެ.

ޓްރަމްޕް ދެކެވަޑައިގަންނަވާ ގޮތުގައި، އާކްޓިކް ގައި ރަޝިޔާ އާއި ޗައިނާގެ އަސްކަރީ ހަރަކާތްތައް އިތުރުވަމުންދާތީ، ގްރީންލޭންޑް އެމެރިކާގެ ބާރުގެ ދަށަށް ގެނައުމަކީ އެމެރިކާގެ ގައުމީ ސަލާމަތަށް ކޮންމެހެން މުހިންމު ކަމެކެވެ.

1953 ވަނަ އަހަރާ ހަމައަށް ޑެންމާކުގެ ކޮލޮނީއެއްގެ ގޮތުގައި އޮތް ގްރީންލޭންޑަށް، އޭގެ 26 އަހަރު ފަހުން ވަނީ އަމިއްލަ ދާހިލީ ވެރިކަމެއް ދީފައެވެ. އަދި މިހާރު ގްރީންލޭންޑުން ދަނީ ޑެންމާކާއެކު އޮތް ގުޅުން އިތުރަށް ކުޑަކޮށް، ފުރިހަމަ މިނިވަންކަމަކާ ދިމާލަށް ދިއުމަށް ވިސްނަމުންނެވެ.

ހިޔާލު ހޯދުމުގެ ވޯޓުތަކުން ދައްކާ ގޮތުގައި، ގްރީންލޭންޑްގެ ގިނަ ރައްޔިތުން އެމެރިކާގެ ބާރުގެ ދަށަށް ދިއުމާ ދެކޮޅެވެ.