ގްރީންލޭންޑް އެމެރިކާގެ މިލްކުވެރިކަމުގެ ދަށަށް ގެންނަން އަސްކަރީ ބާރުގެ ބޭނުން ޓްރަމްޕް ކުރައްވާފާނެ ކަމަށް ވައިޓް ހައުސް އިން ބުނެފި

ގްރީންލޭންޑް އެމެރިކާގެ މިލްކުވެރިކަމުގެ ދަށަށް ގެނައުމަށްޓަކައި އަސްކަރީ ބާރުގެ ބޭނުންކުރުން ހިމެނޭހެން ތަފާތު ގޮތްތަކާ މެދު ރައީސް ޓްރަމްޕް މަޝްވަރާ ކުރައްވަމުން ގެންދަވާ ކަމަށް ވައިޓް ހައުސްއިން ހާމަކޮށްފި އެވެ.

ނޭޓޯގެ މެންބަރު ޑެންމާކުގެ ބާރުގެ ދަށުގައި އޮންނަ، މިނިވަން ދާޚިލީ ސިޔާސަތެއް އޮންނަ ގްރީންލޭންޑް އެމެރިކާގެ ބައެއްގެ ގޮތުގައި ހަމަޖެއްސުމަކީ "ގައުމީ ސަލާމަތާ ގުޅިފައިވާ މުހިންމު ކަމެއް" ކަމަށް ވައިޓް ހައުސް އިން ބީބީސީ އަށް މަޢުލޫމާތު ދީފައިވެ އެވެ.

ވައިޓް ހައުސް އިން މިކަން ހާމަކޮށްފައި މިވަނީ، ގްރީންލޭންޑާ މެދު ޓްރަމްޕް ގެންގުޅުއްވާ ވިސްނުންފުޅަށް ޑެންމާކުން ދެކޮޅު ހަދަމުން ދަނިކޮށް، ޔޫރަޕްގެ ލީޑަރުން ގުޅިގެން ޑެންމާކަށް ތާއީދުކޮށް ބަޔާނެއް ނެރުނުތާ މަދު ގަޑިއިރުތަކެއްގެ ތެރޭގަ އެވެ.

ސަލާމަތީ ސަބަބުތަކަށްޓަކައި ގްރީންލޭންޑް އެމެރިކާއަށް "ބޭނުންވާ" ކަމަށް ހަފްތާ ބަންދު ގައި ޓްރަމްޕް ތަކުރާރުކޮށް ވިދާޅުވުމާ ގުޅިގެން، ޑެންމާކުގެ ބޮޑުވަޒީރު މެޓެ ފްރެޑްރިކްސަން ވަނީ އެމެރިކާ އިން އެއްވެސް ކަހަލަ ހަމަލާއެއް ދީފި ނަމަ އެއީ ނޭޓޯގެ ނިމުން ކަމަށް ވިދާޅުވެ އިންޒާރު ދެއްވާފައެވެ. އަންގާރަ ދުވަހު ވައިޓް ހައުސް އިން ބުނެފައި ވަނީ، ޚާރިޖީ ސިޔާސަތުގެ މި މުހިންމު ލަނޑުދަނޑި ހާސިލުކުރުމަށްޓަކައި ރައީސާއި އެމަނިކުފާނުގެ ޓީމުން ތަފާތު ގޮތްގޮތާ މެދު މަޝްވަރާ ކުރައްވަމުން ގެންދަވާ ކަމަށެވެ. އަދި އަސްކަރީ ބާރުގެ ބޭނުންކުރުމަކީ ކޮމާންޑަރ-އިން-ޗީފްގެ އިޚްތިޔާރުގައި އަބަދުވެސް އޮންނަ ކަމެއް ކަމަށް ވެސް ބަޔާނުގައިވެ އެވެ.

ނޭޓޯ އަކީ އެމެރިކާ އާއި ޔޫރަޕްގެ ގައުމުތައް ހިމެނޭ އަސްކަރީ އިއްތިހާދެކެވެ. މިއީ ބޭރުގެ ހަމަލާއެއް ކުރިމަތިވާ ހާލަތްތަކުގައި އެއް ގައުމު އަނެއް ގައުމަށް އެހީތެރިވުމަށް އެއްބަސްވެފައިވާ އިއްތިހާދެކެވެ.

އަންގާރަ ދުވަހު ޔޫރަޕްގެ ހަ ގައުމަކުން ވަނީ ޑެންމާކަށް ތާއީދުކޮށްފަ އެވެ. އިނގިރޭސިވިލާތް، ފަރަންސޭސިވިލާތް، ޖަރުމަނުވިލާތް، އިޓަލީ، ޕޮލެންޑް، ސްޕެއިން އަދި ޑެންމާކުގެ ލީޑަރުން ނެރުއްވި ގުޅިފައިވާ ބަޔާނެއްގައި ބުނެފައިވަނީ، ގްރީންލޭންޑަކީ އެ ރަށުގެ ރައްޔިތުންގެ ތަނެއް ކަމަށާއި، އެ ރަށާ ގުޅޭ ނިންމުންތައް ނިންމޭނީ ހަމައެކަނި ޑެންމާކާއި ގްރީންލޭންޑަށް ކަމަށެވެ.

އާކްޓިކް ސަރަޙައްދުގެ ސަލާމަތަށް އެމެރިކާއެކޭ އެއްފަދައިން ޔޫރަޕްގެ ގައުމުތަކުން ވެސް އިސްކަންދޭކަން ފާހަގަކޮށް، ބަޔާނުގައި ބުނެފައިވަނީ މިކަން ހާސިލުކުރަންވާނީ އެމެރިކާ ހިމެނޭހެން ނޭޓޯގެ ހުރިހާ ގައުމުތަކެއް ގުޅިގެން ކަމަށެވެ. އަދި އދ. ގެ މުއާހަދާތަކާއި، ގައުމުތަކުގެ އިސްތިގުލާލަށް އިހުތިރާމް ކުރުމަށް ވެސް އެ ގައުމުތަކުން ގޮވާލާފައިވެ އެވެ.

ގްރީންލޭންޑުގެ ބޮޑުވަޒީރު ޖެންސް-ފްރެޑްރިކް ނީލްސަން މި ބަޔާނަށް މަރުހަބާ ވިދާޅުވެ، "އިހުތިރާމާއެކު މަޝްވަރާކުރުމަށް" ގޮވާލެއްވި އެވެ. ނީލްސަން ވިދާޅުވީ، މަޝްވަރާތައް ކުރިއަށްދާންވާނީ ބައިނަލްއަގުވާމީ ގާނޫނުތަކާއި އުސޫލުތަކަށް އިހުތިރާމްކުރެވޭ ފަދަ ގޮތަކަށް ކަމަށެވެ.

ގްރީންލޭންޑް މިލްކުކުރުމުގެ ވާހަކަ އަލުން ފެންމަތިވެފައި މިވަނީ، އެމެރިކާއިން ވެނެޒުއޭލާ އަށް އަސްކަރީ ހަމަލާދީ، އެ ގައުމުގެ ރައީސް ނިކޮލަސް މަދޫރޯ ހައްޔަރުކޮށް، މަސްތުވާތަކެއްޗާއި ހަތިޔާރުގެ މައްސަލަތަކެއްގައި ނިއުޔޯކަށް ގެންދިޔަ ހާދިސާއާ ގުޅިގެންނެވެ.