ޓްރަމްޕްގެ ބިރު ދެއްކުމާ ދެކޮޅަށް ގްރީންލޭންޑުގެ ސިޔާސީ ޕާޓީތަކުން ތެދުވެއްޖެ

އެމެރިކާގެ ބާރުގެ ދަށަށް ގްރީންލޭންޑް ގެންދިއުމަށްޓަކައި އަސްކަރީ ބާރުގެ ބޭނުންކޮށްފާނެ ކަމަށް ރައީސް ޑޮނަލްޑް ޓްރަމްޕް ދެއްވި އިންޒާރުތަކާ ގުޅިގެން، ގްރީންލޭންޑުގެ ސިޔާސީ ޕާޓީތަކުން އެކަމާ ދެކޮޅަށް ތެދުވެއްޖެ އެވެ.

ގްރީންލޭންޑަކީ ގުދުރަތީ މައުދަނުން މުއްސަނދި، ޑެންމާކުގެ ބާރުގެ ދަށުގައި އޮންނަ އަމިއްލަ ދާޚިލީ ބާރުތައް ލިބިފައިވާ ސަރަހައްދެކެވެ. 

ޓްރަމްޕް ތަކުރާރުކޮށް ވިދާޅުވަމުން ގެންދަވަނީ، ގްރީންލޭންޑްގެ ރައްޔިތުން ގަބޫލުވިޔަސް ނުވިޔަސް، އެމެރިކާ އިން އެ ގައުމާ މެދު ފިޔަވަޅުތަކެއް އަޅާނެ ކަމަށެވެ. މި ވާހަކަތަކާ ގުޅިގެން މުޅި ދުނިޔޭގައި ވަނީ ބޮޑު ކަންބޮޑުވުމެއް އުފެދިފަ އެވެ.

ގްރީންލޭންޑް ބައްލަވައިގަތުމަށް ޝައުގުވެރިކަން ފާޅުކުރައްވައި، އަސްކަރީ ބާރުގެ ބޭނުން ކުރަން ޖެހިދާނެ ކަމަށް ވައިޓް ހައުސް އިން ބުނުމާ ގުޅިގެން، ވިލާތުގެ ގައުމުތަކުން ދަނީ މިކަމާ މެދު ގުޅިފައިވާ ރައްދެއް ދިނުމަށް މަސައްކަތް ކުރަމުންނެވެ.

ގްރީންލޭންޑުގެ ޕާލަމެންޓުގައި ހިމެނޭ ފަސް ޕާޓީއެއްގެ ލީޑަރުން ނެރުއްވި ބަޔާނެއްގައި ވިދާޅުވީ، އެ ބޭފުޅުން ބޭނުން ވަނީ އެމެރިކާގެ ނުވަތަ ޑެންމާކުގެ ބާރުގެ ދަށުގައި ތިބުމުގެ ބަދަލުގައި، މިނިވަން "ގްރީންލޭންޑަރުން" ގެ ގޮތުގައި ދެމިތިބުމަށެވެ. އަދި ގައުމުގެ މުސްތަގުބަލު ނިންމުމުގެ ފުރިހަމަ އިހުތިޔާރު އޮންނަންވާނީ ހަމައެކަނި އެ ގައުމުގެ ރައްޔިތުންނަށް ކަމަށް އެ ބޭފުޅުން ވިދާޅުވި އެވެ.

"އެހެން އެއްވެސް ގައުމަކަށް މިކަމުގެ ތެރެއަށް ނުފޫޒެއް ނުފޯރުވޭނެ. އަވަސް އަރުވާލައިގެން ގޮތް ނިންމުމަށް މަޖުބޫރުކުރުމެއް ނެތި، އަދި އެހެން ގައުމުތަކުގެ ބިރުދެއްކުމެއް ނެތި، އަހަރެމެންގެ ގައުމުގެ މުސްތަގުބަލު ނިންމާނީ އަހަރެމެން އަމިއްލަ އަށް،" އެ ބަޔާނުގައި ބާރުއަޅުއްވައި ވިދާޅުވެފައިވެއެވެ.

ގްރީންލޭންޑަކީ އުތުރު އެމެރިކާ އާއި އާކްޓިކް ސަރަހައްދާ ދެމެދު އޮންނަ، ސްޓްރެޓީޖިކް ގޮތުން މުހިންމު ރަށެކެވެ. ދެވަނަ ބޮޑު ހަނގުރާމައިން ފެށިގެން އެމެރިކާގެ އަސްކަރީ މަރުކަޒެއް އެތަނުގައި ގާއިމުކޮށްފައިވެ އެވެ. ޓްރަމްޕްގެ މި އިންޒާރުތަކުގެ ސަބަބުން ޑެންމާކާއި ވިލާތުގެ އިއްތިހާދުގެ ގައުމުތަކަށް ވަނީ ބޮޑު ސިހުމެއް ލިބިފައެވެ.

ޓްރަމްޕް ވިދާޅުވާ ގޮތުގައި، އާކްޓިކް ސަރަހައްދުގައި ރަޝިޔާ އާއި ޗައިނާގެ އަސްކަރީ ހަރަކާތްތައް އިތުރުވަމުންދާތީ، ގްރީންލޭންޑްގެ ކޮންޓްރޯލް ހޯދުމަކީ އެމެރިކާގެ ގައުމީ ސަލާމަތަށް ކޮންމެހެން ބޭނުންތެރި ކަމެކެވެ.

"އަހަރެމެން ރަޝިޔާ ނުވަތަ ޗައިނާ އިން ގްރީންލޭންޑް ހިފިޔަކަ ނުދޭނަން. އަހަރެމެން ފިޔަވަޅެއް ނާޅައިފި ނަމަ އެމީހުން އެކަން ކުރާނެ. އެހެންކަމުން، ފަސޭހަ ގޮތުގައި ނުވަތަ އުނދަގޫ ގޮތަކުން ވިޔަސް ގްރީންލޭންޑާ މެދު ގޮތެއް ނިންމާނަން،" އެމެރިކާގެ ރައީސް ވިދާޅުވި އެވެ.