ސައުދީގެ އެއްގަމާއި ވައިގެ ސަރަހައްދު އީރާނަށް ހަމަލާ ދިނުމަށް ބޭނުން ނުކުރެވޭނެ ކަމަށް އެ ގައުމުން އަންގައިފި
ސައުދީގެ ބިމާއި ވައިގެ ސަރަހައްދު އީރާނަށް ހަމަލާދިނުމަށް ބޭނުން ކުރަން ފުރުސަތު ނުދޭނެ ކަމަށާއި އީރާނާ ދެކޮޅަށް ހިންގާ އަސްކަރީ ހަރަކާތްތަކުގައި ސައުދީން ބައިވެރި ނުވާނެ ކަމަށް އެ ގައުމުން ސީދާ އީރާނަށް އަންގާފައިވާ ކަން ސަރުކާރާ ގާތް ގުޅުންތަކެއް އޮންނަ މަސްދަރުތަކުން ބުނެފައިވޭ.
ސައުދީ އަރަބިއްޔާގައި އޮންނަ އެމެރިކާގެ ދަހްރާން އެއަރބޭސް އަށް އެމެރިކާގެ ސިފައިންގެ ފައުޖެއް އަސްކަރީ މަތިންދާ ބޯޓަކުން ފައިބަނީ - އޮގަސްޓް 21، 1990 | ގެޓީ އިމޭޖަސް
ސައުދީގެ އެއްގަމާއި ވައިގެ ސަރަހައްދު އީރާނަށް ހަމަލާދިނުމަށް ބޭނުން ނުކުރެވޭނެ ކަމަށް އެގައުމުން ބުނެފި އެވެ.
ސައުދީ އަރަބިއްޔާގެ ވައިގެ ސަރަހައްދާއި ބިން އީރާނަށް ހަމަލާ ދިނުމަށް ބޭނުން ކުރުމުގެ ފުރުސަތު ނުދޭނެކަން އެ ގައުމުން އީރާނަށް ވެސް ވަނީ އަންގައިފަ އެވެ.
މިކަން ކަށަވަރުކޮށްދީފައި ވަނީ ސައުދީ ސަރުކާރާ ގާތް ގުޅުމެއް އޮންނަ ދެ މަސްދަރަކުން ބުދަ ދުވަހު އޭއެފްޕީ ނޫސް އެޖެންސީ އަށް ދީފައިވާ މައުލޫމާތުގަ އެވެ.
މި މެސެޖު އީރާނަށް ފޮނުވާފައި ވަނީ، އެ ގައުމުގައި ކުރިއަށްދާ މުޒާހަރާތައް ހުއްޓުވުމަށް އީރާނު ސަރުކާރުން އަޅަމުންދާ ފިޔަވަޅުތަކާ ގުޅިގެން އެމެރިކާ އިން ރައްދު ދީފާނެ ކަމުގެ އިންޒާރު ދީފައިވާ ދަނޑިވަޅެއްގަ އެވެ.
ހަމަ އެއާ އެކު، އީރާނަށް ހަމަލާ އެއް އަތުވެއްޖެ ނަމަ، އެމެރިކާގެ އަސްކަރީ މަރުކަޒުތަކަށާއި މުދާ އުފުލާ އުޅަނދުތަކަށް ހަމަލާދޭނެ ކަމަށް ތެހެރާނުން ވެސް ވަނީ ބުނެފަ އެވެ.
"އީރާނާ ދެކޮޅަށް ހިންގާ އެއްވެސް އަސްކަރީ ހަރަކާތެއްގައި ސައުދީން ބައިވެރި ނުވާނެ ކަމަށާއި، އެ ގައުމުގެ ބިމާއި ވައިގެ ސަރަހައްދު އެ ބޭނުމަށް ބޭނުންކުރަން ފުރުސަތު ނުދޭނެކަން ސައުދީން ވަނީ ސީދާ އީރާނަށް އަންގާފައި،" ސައުދީ އަސްކަރިއްޔާ އާ ގާތް ގުޅުމެއް އޮންނަ މަސްދަރަކުން އޭއެފްޕީ އަށް ބުނެފައިވެ އެވެ.
ސަރުކާރާ ގާތް ގުޅުމެއް އޮންނަ ދެވަނަ މަސްދަރަކުން ވެސް ވަނީ މި މެސެޖު އީރާނަށް ފޮނުވިކަން ކަށަވަރުކޮށްދީފަ އެވެ.
އެމެރިކާގެ އަސްކަރީ ވަސީލަތްތަކާއި މަރުކަޒުތައް ގަލްފު ސަރަހައްދުގައި ގާއިމުވެފައިވާއިރު، އޭގެ ތެރޭގައި ސައުދީ އަރަބިއްޔާ ގައި ހުރި މަރުކަޒުތައް ވެސް ހިމެނެ އެވެ.
މަސްދަރު: އޭއެފްޕީ
