އީގަލްސް އަތުން އޮޑި ބަލިވެއްޖެ

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު އީގަލްސްއާ ދެކޮޅަށް ކުޅުނު މެޗުން، އޮޑި ސްޕޯޓްސް ކުލަބު ބަލިވެއްޖެ އެވެ. 

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗުގައި އީގަލްސް އިން ވަނީ 2-0 އިން އޮޑީގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި އީގަލްސް އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 31 ވަނަ މިނެޓުގައި އީގަލްސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޒައިން ޒަފަރު އެވެ. އެ ލަނޑު އޭނާ ޖެހީ އީގަލްސްގެ އިބްރާހީމް މަހުދީ ތަނަވަސްކޮށްދިން ފުރުސަތެއްގައި ލިބުނު ބޯޅަ އިންނެވެ.

ދެ ޓީމުގެ ފަރާތުން ވެސް ދާދި ހަމަހަމަ ކުޅުމެއް މެޗުގައި ފެނުނުއިރު، އޮޑި އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. މެޗުގެ ދެ ވަނަ ހާފުގައި ވެސް އީގަލްސް އިން ވަނީ ކުރިއަށް ޖެހިގެން ލަނޑު ޖަހަން މަސައްކަތް ކޮށްފަ އެވެ. އޭގެ ނަތީޖާއެއްގެ ގޮތުން މެޗުގެ 61 ވަނަ މިނެޓުގައި އީގަލްސްގެ ބިދޭސީ ކުޅުންތެރިޔާ އިބްރާހީމް ލެބީ ވަނީ އެ ޓީމުގެ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. 

އޭގެ ފަހުން ވެސް މެޗުގައި ލަނޑު ޖަހަން އޮޑި އަށް ފުރުސަތު ލިބުނުއިރު، އެއްވެސް ފުރުސަތެއްގެ ބޭނުން އެ ޓީމަށް ކުރެވޭ ގޮތެެއް ނުވި އެވެ. އީގަލްސް އަތުން އޮޑި ބަލިވެފައިވާއިރު، މިއީ މި ސީޒަންގެ ލީގުގައި އެ ޓީމުގެ ދެ ވަނަ ބައްޔެވެ. އޮޑި އަކީ މިފަހަރުގެ ލީގުގައި އެންމެ ރަނގަޅު ނަތީޖާ ތަކެއްް ނެރެމުން އަންނަ އެއް ޓީމެވެ. 

އޮޑި އަތުން ހޯދި މޮޅާއެކު އީގަލްސް އޮތީ 12 މެޗުން 16 ޕޮއިންޓާ އެކު ލީގު ތާވަލްގެ ހަ ވަނަ މަގާމުގަ އެވެ. އީގަލްސް އަތުން ބަލިވެ އޮޑި އޮތީ ދެ ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 12 މެޗުން  28 ޕޮއިންޓާ އެކު އެވެ. އޮޑި ބަލިވުމާ އެކު، އެއް ވަަނައިގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަށް ވަނީ ހަ ޕޮއިންޓުގެ ލީޑެއް ލިބިފަ އެވެ. 

އެއް ވަނައިގައި މާޒިޔާ އޮތީ މިހާތަނަށް ކުޅުނު 12 މެޗުން 34 ޕޮއިންޓާ އެކު އެވެ. ލީގުގައި އީގަލްސްގެ އިތުރުން، ދެން އޮޑި ބަލިވެފައި ވަނީ މާޒިޔާ އަތުންނެވެ.