ރައީސް މުޢިއްޒުގެ ދަރިކަލުން އުމެއިރު، ނިއު ރޭޑިއަންޓުގައި ރަޖިސްޓްރީ ކޮށްފި

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ދަރިކަލުން އުމެއިރު މުޙައްމަދު މުޢިއްޒު، ރާއްޖޭގެ އެންމެ ކާމިޔާބު ކުލަބު ކަމަށްވާ ނިއު ރޭޑިއަންޓް ސްޕޯޓްސް ކުލަބުގައި ހިމަނައިފި އެވެ.

ނިއު ރޭޑިއަންޓުގެ ޓީމުގައި އުމެއިރު ރަޖިސްޓްރީ ކޮށްފައިވާއިރު، މީގެ ކުރިން ވެސް ވަނީ އުމެއިރު ނިއު ރޭޑިއަންޓާ ގުޅެން އުޅޭ ކަމުގެ އަޑު ތަކެއް ފެތުރިފަ އެވެ. އެގޮތުން ނިއު ރޭޑިއަންޓް އިން އައު ކުޅުންތެރިން ގެނައުމުގެ ތެރޭގައި ވަނީ އުމެއިރު ވެސް އެ ޓީމުގައި ހިމަނައިފަ އެވެ. 

އުމުރުން މިހާރު 18 އަހަރުވެފައިވާ އުމެއިރު ނިއު ރޭޑިއަންޓުގައި ހިމަނާފައިވާއިރު، އޭނާ އަންނަނީ ނިއު ރޭޑިއަންޓުގެ ފަރިތަކުރުން ތަކުގައި ވެސް ބައިވެރި ވަމުންނެވެ. ނިއު ރޭޑިއަންޓުގެ އައު މެނޭޖުމަންޓް އިން އަންނަނީ އެ ޓީމަށް އައު ކުޅުންތެރިން ގެނައުމުގެ މަސައްކަތް ކުރަމުންނެވެ.

އެކަމާ ގުޅޭ ގޮތުން ނޫހެއްގައި ލިޔެފައިވާ ޚަބަރެއްގެ ފޮޓޯ އާއެކު ނިއު ރޭޑިއަންޓުގެ ޗެއާމަން އަޙުމަދު މުބީން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައި ވަނީ، އެކަމުގެ މައްސަލަ އަކީ ކޮބައިތޯ އެވެ؟ އެގޮތުން ރައީސްގެ ދަރިކަލަކަށް ވުމަކީ ކުޅުމުން މަހުރޫމުވާން ޖެހޭ ކަމެއްތޯ އައްސަވައި މުބީން ވަނީ ސުވާލެއް އުފައްދަވައިފަ އެވެ. އަދި ކޮންމެ ކަމެއްގައި ވެސް ޒާތީ ހަސަދަ އިސްކޮށްގެން ނޫނީ ނޫސް ނުހިންގެނީތޯ ވެސް ވަނީ ސުވާލު ކުރައްވައިފަ އެވެ. 

އިތުރަށް އެ ޕޯސްޓުގައި މުބީން ވިދާޅުވެފައި ވަނީ އުމެއިރު އަކީ ޒުވާން ހުނަރުވެރި ކުޅުންތެރިޔެއް ކަމަށެވެ. އެގޮތުން ނިއު ރޭޑިއަންޓް އިން އަންނަނީ ޒުވާން ކުޅުންތެރިން ހިމެނޭ ގޮތަށް، ޓީމްގެ ބީ ސްކޮޑެއް އެކުލަވާލުމުގެ މަސައްކަތް ކުރަމުން ކަމަށް ވެސް މުބީން ވިދާޅުވި އެވެ. އަދި ނޫހެއްގައި ލިޔެލާ ޚަބަރެއްގެ ސަބަބުން، ސީނިއާ ކުޅުންތެރިން ބިނާ ކުރުމަށް ނިއު ރޭޑިއަންޓް އިން ކުރަމުން އަންނަ މަސައްކަތް ހުއްޓާ ނުލާނެ ކަމަށް ވެސް މުބީން ވިދާޅުވި އެވެ.

"އުމެއިރު އަކީ ހުނަރުވެރި ޒުވާން ކުޅުންތެރިއެއް. ނިއުރޭޑިއަންޓުން މިއަންނަނީ ޒުވާން ކުޚުންތެރި ހިމެނޭ ޓީމްގެ ބީ ސްކޮޑަ އެކުލަވާލުމުގެ މަސައްކަތް ކުރަމުން. ތިހެން ލިޔެލާ އާރޓިކަލްއަކުން ނިއުރޭޑިއަންޓް ސކ ބިނާކުރަން މިކުރާ މަސައްކަތް ހުއްޓައެއް ނުލާނަން،" މުބީންގެ ޕޯސްޓުގައި ލިޔުއްވާފައިވެ އެވެ.

މީގެ އިތުރުން އެ ޕޯސްޓުގައި މުބީން ވިދާޅުވީ، އުމެއިރު ނޫނަސް ޒުވާން އެތައް ކުދިންނެއް ނިއު ރޭޑިއަންޓާ އެކު ފަރުތަ ކުރަމުން އަންނަ ކަމަށެވެ. އަދި ނިއު ރޭޑިއަންޓުގެ ފަރިތަ ކުރުމުގައި ބައިވެެރިވާ ޒުވާން ކުޅުންތެރިންނާ ގުޅޭ މައުލޫމާތު ހޯދާލުމަށް ދައުވަތު ދެއްވާ ކަމަށް ވެސް މުބީން ވަނީ ވިދާޅުވެފަ އެވެ. 

ނިއު ރޭޑިއަންޓުގައި އުމެއިރު ރަޖިސްޓްރީ ކޮށްފައިވާއިރު، ރައީސް މުޢިއްޒުގެ އާއިލީ ކުންފުނި ދިމްޔާތުގެ ޕްރައިވެޓް ލިމިޓެޑުގެ ދަށުން ހިންގާ "ޑެމިއެޓާ" އަކީ ނިއު ރޭޑިއަންޓުގެ ސްޕޮންސާ އެކެވެ. ނިއު ރޭޑިއަންޓުގެ އިތުރުން، ޑެމިއެޓާ އިން ވަނީ ފުރަތަމަ ޑިވިޝަންގެ އެހެން ކުލަބުތައް ވެސް ސްޕޮންސާ ކޮށްފަ އެވެ.

މިދިޔަ އަހަރުގެ ސެޕްޓެމްބަރު މަހުގެ ތެރޭގައި ފީފާގެ ރައީސް ޖިއާނީ އިންފަންޓީނޯ ރާއްޖެ ވަޑައިގެންނެވި ދުވަހު، އިންފަންޓީނޯ އާއި ރައީސް މުޢިއްޒުގެ ޓީމަކާ ދެމެދު ގަލޮޅު ރަސްމީ ދަނޑުގައި ކުޅުނު މެޗުގައި ވެސް އުމެއިރު ވަނީ ކުޅެފަ އެވެ. އެ މެޗުގައި އުމެއިރު ކުޅެފައި ވަނީ ރައީސް މުޢިއްޒުގެ ޓީމަށެވެ.