މައްސަލަ ޖެހި، ޑައިމަންޑް ޖުބްލީ ކޮމެޓީ އިން މުބީން ވަކި ކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޑައިމަންޑް ޖުބްލީ ކޮމެޓީގައި ހިމެނޭ، ނިއު ރޭޑިއަންޓް ސްޕޯޓްސް ކުލަބުގެ ޗެއާމަން އަޙުމަދު މުބީން އެ ކޮމެޓީން ވަކި ކޮށްފި އެވެ.

ރާއްޖޭގެ ފުޓުބޯޅަ އަށް 75 އަހަރު ފުރުން ފާހަގަ ކުރުމުގެ ގޮތުން ޙަރަކާތްތައް ރޭވުމަށް އެފްއޭއެމް އިން ވަނީ ޑައިމަންޑް ޖުބްލީ ކޮމެޓީގެ ނަމުގައި ކޮމެޓީއެއް އުފައްދައިފަ އެވެ. އެ ކޮމެޓީގެ ޗެއާމަން އަކީ ރާއްޖޭގެ ތަޖުރިބާކާރު ކޯޗު އަލީ ސުޒޭން އެވެ. އެ ކޮމެޓީގެ ވައިސް ޗެއާމަން ކަމަށް މުބީން ހަމަޖައްސާފައިވާއިރު، ދެން އެ ކޮމެޓީގައި ހިމެނެނީ ކުލަބު ވެލެންސިއާގެ ޗެއާމަން ޢަބްދުﷲ އަޒްމީން އަދި ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރު ޢަބްދުލް ލަތީފް މުޙައްމަދު އެވެ.

ހޯމަ ދުވަހު އެފްއޭއެމް އިން ބޭއްވި އެ އެސޯސިއޭޝަންގެ ހިންގާ ކޮމެޓީގެ ބައްދަލުވުމުގައި ވަނީ، ޑައިމަންޑް ޖުބްލީ ކޮމެޓީ އިން މުބީން ވަކި ކުރަން ނިންމައިފަ އެވެ. އަދި މުބީންގެ ބަދަލުގައި އެ ކޮމެޓީ އަށް އައްޔަން ކޮށްފައި ވަނީ ދާދި ފަހުން ވިކްޓަރީ ސްޕޯޓްސް ކުލަބުގެ ޗެއާމަން ކަމަށް އިންތިޚާބު ކުރި، ރައްޔިތުންގެ މަޖިލީހުގެ ކެލާ ދާއިރާގެ މެމްބަރު ޢަބްދުﷲ ޝަރީފް އެވެ.

ޑައިމަންޑް ޖުބްލީ ކޮމެޓީ އިން މުބީން ވަކި ކުރަން ނިންމި ނަމަވެސް، ވަކި ކުރި ސަބަބެއް އެފްއޭއެމް އިން ހާމަ ކޮށްފައި ނުވެ އެވެ. ނަމަވެސް، އެކި އެކި މަސްދަރު ތަކުން "ރާއްޖެ އެމްވީ" އަށް މައުލޫމާތު ލިބިފައިވާ ގޮތުގައި އެ ކޮމެޓީ އިން މުބީން ވަކިކޮށްފައި ވަނީ ބައެއް ކަހަލަ ޑިސިޕްލިނަރީ މައްސަލަ ތަކުގެ ސަބަބުންނެވެ.

އެގޮތުން ދިރާގު ދިވެހި ޕްރިމިއާ ލީގުގައި ނިއު ރޭޑިއަންޓާއި، މާޒިޔާ ސްޕޯޓްސް އެންޑް ރެކްރިއޭޝަން ބައްދަލު ކުރި މެޗަށް ފަހު، މުބީން ވަނީ ސޯޝަލް މީޑިއާގައި އެ މެޗުގެ ރެފްރީންނަށް ވަރަށް ބޮޑަށް ފާޑު ކިޔައިފަ އެވެ. އެގޮތުން ރެފްރީ އިން ބައެއް ގޯސްތައް ހަދާފައިވާ ކަމަށް ބުނެ، މުބީން ވަނީ އެކަމުގެ ކަންބޮޑުވުން ފާޅު ކޮށްފަ އެވެ. މި ނޫހަށް މައުލޫމާތު ދިން މަސްދަރުން ބުނެފައި ވަނީ، މުބީންގެ އެ އަމަލީ އެފްއޭއެމްގެ ކޮމެޓީއެއްގައި ހިމެނޭ މެމްބަރަކު ކޮށްގެން ވާނެ ކަމެއް ނޫން ކަމަށެވެ.

މެޗުގައި ރެފްރީންނަށް ގޯސް ހެދޭނެ ކަމަށާއި، ނަމަވެސް އެފްއޭއެމްގެ ކޮމެޓީއެއްގައި ހިމެނޭ މެމްބަރަކު އެ ވާހަކަ ސޯޝަލް މީޑިއާގައި ދެއްކުމަކީ ގޯސް ކަމެއްގެ ގޮތުގައި ފާހަގަ ކޮށްފައިވެ އެވެ. މުބީން އޭރު ކުރެއްވި ޕޯސްޓުގައި ވިދާޅުވެފައި ވަނީ އެ މެޗުން މާޒިޔާ މޮޅުވި ގޮތް މެޗު ބަލަން ތިބި މީހުންނަށް ސާފު ވާނެ ކަމަށެވެ. އެއީ ހިތްވަރު ކޮށްގެންތޯ، ނުވަތަ އެހެން ގޮތަކުންތޯ ނިންމާނީ ބަލަން ތިބި މީހުން ކަމަށް ވެސް މުބީން ވިދާޅުވެފައިވެ އެވެ. 

ނިއު ރޭޑިންޓާއި މާޒިޔާ ބައްދަލު ކުރި މެޗުގައި ނިއު ރޭޑިއަންޓަށް ލިބެން ޖެހޭ ދެ ޕެނަލްޓީ ރެފްރީ ދީފައި ނުވާ ކަމަށް ވިދާޅުވެ، މީގެ ކުރިން މުބީން ވަނީ ކަންބޮޑުވުން ފާޅު ކުރައްވައިފަ އެވެ. އެ މެޗުގައި ހިނގައި ދިޔަ ދެ ޙާލަތެއްގެ ވީޑިއޯ ހިއްސާ ކުރައްވައި މުބީން އޭރު ވިދާޅުވެފައި ވަނީ، ނިއު ރޭޑިއަންޓް އަށް ސާފުކޮށް ލިބެން ޖެހޭ ދެ ޕެނަލްޓީ ނުލިބި ދިޔަ ކަމަށާއި، ރެފްރީ އަށް "ސެލިއުޓް" ކުރާ ކަމަށެވެ. އަދި ވިދާޅުވީ ދިވެހި ފުޓުބޯޅަ ކުރިނާރަނީ އެ ސަބަބާ ހުރެ ކަމަށެވެ.

ރާއްޖޭގެ ފުޓުބޯޅަ އަށް 75 އަހަރު ފުރުން ފާހަގަ ކުރުމުގެ ގޮތުން، ކުލަ ގަދަ ޙަރަކާތް ތަކެއް ކުރިއަށް ގެންދިޔުމަށް އެފްއޭއެމް އިން އަންނަނީ ތައްޔާރު ވަމުންނެވެ. އެގޮތުން މިހާރު ނިންމާފައި ވަނީ ޑައިމަންޑް ޖުބްލީ އިންވިޓޭޝަނަލެއް ފުޓުބޯޅަ މުބާރާތެއް ކުރިއަށް ގެންދިޔުމަށެވެ. 19 އަހަރުން ދަށަށް ޚާއްސަ ކޮށްގެން އެ މުބާރާތް ކުރިއަށް ގެންދިޔުމަށް ރާވާފައި ވަނީ ފެބްރުވަރީ މަހުގެ ހަތް ވަނަ ދުވަހުން ފެށިގެން، 15 ވަނަ ދުވަހުގެ ނިޔަލަށެވެ.