ދެ ވަނަ ބުރުގައި ވިކްޓަރީ އިން ނިއު ރޭޑިއަންޓް ބަލިކޮށްފި

މިހާރު ކުރިއަށްދާ ދިރާގު ދިވެހި ޕްރިމިއަރ ލީގުގެ ދެ ވަނަ ބުރުގައި ނިއު ރޭޑިއަންޓް ސްޕޯޓްސް ކުލަބާ ދެކޮޅަށް ކުޅުނު މެޗުން، ވިކްޓަރީ ސްޕޯޓްސް ކުލަބު މޮޅުވެއްޖެ އެވެ.

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗުގައި ވިކްޓަރީ އިން ވަނީ 3-1 އިން ނިއު ރޭޑިއަންޓުގެ މައްޗަށް ކުރި ހޯދައިފަ އެވެ. މެޗުގައި ނިއު ރޭޑިއަންޓް އިން ލަނޑު ޖަހައި ކުރި ހޯދާފައި ވަނިކޮށް، ވިކްޓަރީ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ. 

މެޗު ފަށައިގެން ހަތަރު ވަނަ މިނެޓުގައި ނިއު ރޭޑިއަންޓް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބިދޭސީ ކުޅުންތެރިޔާ ގޯމޭސް ޑަ ސިލްވާ އެވެ. އެ ލަނޑު އޭނާ ޖެހީ، އަލީ ފާޞިރު (ސެންޓޭ) ތަނަވަސްކޮށްދިން ފުރުސަތެއްގައި ލިބުނު ބޯޅަ އަކުންނެވެ. އޭގެ ފަހުން އިތުރު ލަނޑު ޖަހައި ލީޑު ފުޅާ ކުރާނެ ފުރުސަތު ވެސް ނިއު ރޭޑިއަންޓަށް ވަނީ ލިބިފަ އެވެ.

ނަމަވެސް، މެޗުގެ 29 ވަނަ މިނެޓުގައި ވިކްޓަރީ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ބިދޭސީ ކުޅުންތެރިޔާ މިލޯސް ލެޗްނީ އެވެ. އެއީ ދާދި ފަހުން ކުލަބު އީގަލްސް ދޫކޮށްލުމަށް ފަހު ވިކްޓަރީ އަށް ބަދަލުވި، އަޙުމަދު ރިޒުވާން (ރިޒޭ) ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު ވިކްޓަރީ އިން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. އެ ލަނޑު ވެސް ވިކްޓަރީ އަށް ޖަހައިދިނީ ލެޗްނީ އެވެ. އޭގެ ފަހުން މެޗުގައި ވިކްޓަރީ އިން އެ ޓީމުގެ ތިން ވަނަ ލަނޑު ޖެހީ، މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށެވެ. އެ ލަނޑު އެ ޓީމަށް ޖަހައިދިނީ ބިދޭސީ ކުޅުންތެރިޔާ ޖަވޯހިރް އަޒަމޯވް އެވެ.

ވިކްޓަރީ އިން ނިއު ރޭޑިއަންޓުގެ މައްޗަށް ކުރި ހޯދާފައިވާއިރު، ލީގުގެ ފުރަތަމަ ބުރުގައި މި ދެ ޓީމު ބައްދަލު ކުރި މެޗު ކާމިޔާބު ކުރީ ނިއު ރޭޑިއަންޓް އިންނެވެ. ނިއު ރޭޑިއަންޓު އަތުން ހޯދި މޮޅާއެކު، ވިކްޓަރީ ވަނީ ލީގު ތާވަލްގެ ފަސް ވަނަ މަގާމަށް ޖެހިލައިފަ އެވެ. އެއީ މިހާތަނަށް ލީގުގައި ކުޅެފައިވާ 11 މެޗުން 16 ޕޮއިންޓާ އެކު އެވެ. ވިކްޓަރީ އަތުން ބަލިވި ނިއު ރޭޑިއަންޓު އޮތީ 11 މެޗުން 20 ޕޮއިންޓާ އެކު ތިން ވަނައިގަ އެވެ.