ފަހަތުން އަރައި ބުރުން އީގަލްސް ބަލިކޮށްފި

މިހާރު ކުރިއަށްދާ ދިރާގު ދިވެހި ޕްރިމިއަރ ލީގުގެ ދެ ވަނަ ބުރުގައި ކުލަބު އީގަލްސްއާ ދެކޮޅަށް ކުޅުނު މެޗުން ބުރު ސްޕޯޓްސް ކުލަބު މޮޅުވެއްޖެ އެވެ. 

ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ބުރުން ކާމިޔާބު ކުރީ 3-2 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ އީގަލްސް އިންނެވެ. އޭގެ ފަހުން ބުރުން ވަނީ ފަހަތުން އަރައި ތިން ލަނޑު ޖަހައިގެން ލީޑު ނަގައިފަ އެވެ. ބުރުން ތިން ލަނޑު ޖެހި ފަހުން މެޗުގައި އީގަލްސް އިން ވަނީ ދެ ވަނަ ލަނޑެއް ޖަހައިފަ އެވެ.

މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި އީގަލްސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އިބްރާހީމް މަހުދީ ޙުސެއިން އެވެ. އޭގެ ފަހުން މެޗުގެ ނަތީޖާ ހަމަހަމަ ކުރުމަށް ބުރުން ކުރި މަސައްކަތް ކާމިޔާބު ކުރެވުނީ މެޗުގެ 83 ވަނަ މިނެޓުގަ އެވެ. އެ ލަނޑު ބުރަށް ޖަހައިދިނީ މުޙައްމަދު ނާއިމް އެވެ.

އޭގެ ހަތަރު މިނެޓު ފަހުން ބުރުން ވަނީ ދެ ވަނަ ލަނޑެއް ޖަހައި މެޗުގައި ލީޑު ނަގައިފަ އެވެ. އެއީ އިބްރާހީމް އުސާމާ ޙަސަން މަޖީދު ޖެހި ލަނޑުންނެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ނާއިމް ވަނީ އިތުރު ލަނޑެއް ޖަހައި ބުރުގެ ލީޑު އިތުރަށް ފުޅާ ކޮށްފަ އެވެ. އޭގެ އިރުކޮޅެއް ފަހުން އީގަލްސްގެ ދެ ވަނަ ލަނޑު ޖެހީ ޝަމްވީލް ޤާސިމް އެވެ. 

މޮޅާއެކު ބުރުން ވަނީ، ނިއު ރޭޑިއަންޓް ސްޕޯޓްސް ކުލަބު ފަހަތަށް ޖައްސާލުމަށް ފަހު ލީގު ތާވަލްގެ ތިން ވަނަ މަގާމަށް ޖެހިލައިފަ އެވެ. މިހާތަނަަށް ލީގުގައި ކުޅެފައިވާ 11 މެޗުން ބުރަށް ލިބެނީ 20 ޕޮއިންޓެވެ. ހަމަ އެ އަދަދަށް މެޗު ކުޅެގެން ނިއު ރޭޑިއަންޓް އަށް ވެސް 20 ޕޮއިންޓު ލިބޭއިރު، އެ ޓީމު މިހާރު އޮތީ ހަތަރު ވަނައިގަ އެވެ.