އިރާނަށް ހަމަލާދޭނެ ކަމަށް ޓްރަމްޕް ގެ އިންޒާރާ ގުޅިގެން، އެކަމަށް ވަރުގަދަ ރައްދެއް ދޭނެ ކަމަށް ބުނެ އިރާނުން އިންޒާރު ދީފި

އިރާނަށް ހަމަލާދޭނެ ކަމަށް ޓްރަމްޕް ދެއްވި އިންޒާރާ ގުޅިގެން، އެކަމަށް ވަރުގަދަ ރައްދެއް ދޭނެ ކަމަށް ބުނެ އީރާނުން އިންޒާރު ދީފި އެވެ.

އެމެރިކާގެ ރައީސް ޑޮނަލްޑް ޓްރަމްޕް، އިރާނަށް އިތުރު އަސްކަރީ ހަމަލާތަކެއް ދީފާނެ ކަމަށް ވިދާޅުވެ ދެއްވި އިންޒާރާ ގުޅިގެން، ކޮންމެ އުދުވާނީ އަމަލަކަށް ވެސް ވަރުގަދަ ރައްދެއް ދޭނެ ކަމަށް އިރާނުން ވަނީ ވައުދުވެފައެވެ.

ޓްރަމްޕް މި އިންޒާރު ދެއްވީ އިރާނުގެ ނިއުކްލިއާ ޕްރޮގްރާމް ނުވަތަ މިސައިލް ގާބިލުކަން އަލުން ބިނާކުރުމަށް ތެހެރާނުން މަސައްކަތް ކުރާނަމަ އެކަމަށް ދޭ ރައްދެއްގެ ގޮތުގަ އެވެ.

އިރާނުގެ ރައީސް މަސްއޫދު ޕެޒެޝްކިއަން މި އިންޒާރު ދެއްވީ އަންގާރަ ދުވަހު "އެކްސް" މެދުވެރިކޮށް ކުރެއްވި ޕޯސްޓެއްގައެވެ.

ޓްރަމްޕް ގެ އިންޒާރު އައީ ފްލޮރިޑާގައި ހުންނަ ޓްރަމްޕްގެ ރިސޯޓުގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ އެކު ޓްރަމްޕް ބޭއްވި ބައްދަލުވުމަށް ފަހުގައެވެ. އެ ބައްދަލުވުމުގައި ޓްރަމްޕް ވަނީ އަނެއްކާ ވެސް އިޒްރޭލުގެ ސިޔާސަތުތަކަށް ފުރިހަމަ އަށް ތާއީދުކުރައްވައި ވާހަކަދައްކަވާފަ އެވެ.

މީގެ ކުރިން އެމެރިކާ އިން އިރާނުގެ މިސައިލް ގާބިލުކަމަށް އަމާޒުކޮށް ހަމަލާދޭނެ ކަމަކަށް ބުނެފައެއް ނުވެއެވެ. އެހެން ނަމަވެސް އީރާނުގެ މިސައިލް ޕްރޮގްރާމް ނައްތާލުމަކީ  އިޒްރޭލުން އަބަދުވެސް އުއްމީދުކުރަމުން އައި ކަމެކެވެ.

އެމެރިކާ އިން މީގެ ކުރިން ބޮޑަށް އިސްކަންދީފައި ވަނީ އިރާނުގެ ނިއުކްލިއާ ޕްރޮގްރާމް ހުއްޓުވުމަށެވެ. އަނެއްކޮޅުން އިރާނުން ތަކުރާރުކޮށް ބުނަމުން ދަނީ އެ ގައުމުގެ ނިއުކްލިއާ މަސައްކަތްތަކަކީ ހަމައެކަނި މަދަނީ ބޭނުންތަކަށް ތަރައްގީ ކުރާ ޕްރޮގްރާމެއް ކަމަށެވެ. އެއާ އެކު ވެސް މިދިޔަ ޖޫން މަހު އެމެރިކާ އާއި އިޒްރޭލުން ދިން ހަމަލާތަކުގެ ކުރިން، ނިއުކްލިއާ ހަތިޔާރު އުފައްދާކަމުގެ އެއްވެސް ހެއްކެއް އެމެރިކާގެ އިންޓެލިޖެންސަށް ނުވަތަ އދ. ގެ ނިއުކްލިއާ އެޖެންސީ އަށް ފެނިފަ އެއް ނުވެ އެވެ.

އިރާނުން ވަނީ އެ ގައުމުގެ މިސައިލް ޕްރޮގްރާމާ ގުޅޭގޮތުން އެއްވެސް މަޝްވަރާ އެއް ނުކުރާނެ ކަމަށް ކަނޑައަޅާފައެވެ.

ދެ ގައުމުގެ ވެރިންގެ މި ވާހަކަތަކާ ގުޅިގެން މިދިޔަ ޖޫން މަހު، 12 ދުވަހަށް ދެމިގެންދިޔަ ނުރައްކާތެރި ހަނގުރާމައިގައި އިރާނުގެ 1,100 އަށްވުރެ ގިނަ މީހުން މަރުވެ، އިސްރާއީލުން 28 މީހުން މަރުވިތާ އަދިި މާ ގިނަ ދުވަސްތަކެއް ފާއިތުވެގެން ނުދަނީސް އަނެއްކާ ވެސް އީރާނަށް ހަމަލާތަކެއް ދީފާނެ ކަމަށް ވަނީ ބެލެވިފަ އެވެ.

ޕެޒެޝްކިއަން ވިދާޅުވީ އިރާނަށް ދޭ ކޮންމެ ހަމަލާއަކަށް ދޭ ރައްދުވާނީ "ވަރުގަދަ އަދި އެކަމާ ހިތާމަކުރަން ޖެހޭނެ" ފަދަ ރައްދަކަށް ކަމަށެވެ. އޭނާގެ މި ބަހުގެ ހަމަލާ އައީ، ވޮޝިންޓަނުން އިރާނަށް ބޮޑު ހަމަލާއެއް ދީފާނެ ކަމަށް ޓްރަމްޕް ނޫސްވެރިންނަށް ވިދާޅުވިތާ މަދު ގަޑިއިރުތަކެއްގެ ތެރޭގައެވެ.

"އިރާނުން އަލުން ބާރުވެރިވާން މަސައްކަތްކުރާ ކަމުގެ އަޑުތައް މިހާރު އިވޭ. އެކަން އެގޮތަށް ކުރާނަމަ، އަހަރެމެން ޖެހޭނީ އެމީހުން ބަލިކޮށްލަން،" ނަތަންޔާހޫ އާ އެކު ހުންނަވައި ޓްރަމްޕް ވިދާޅުވިއެވެ. އީރާން "ފުނޑުފުނޑުކޮށްލާނަން." ކަމަށް ވެސް ޓްރަމްޕް ވިދާޅުވި އެވެ.

އެމެރިކާގެ ރައީސް ވިދާޅުވީ، އިރާނުން ދުރު ރާސްތާގެ ހަތިޔާރު އުފައްދާނަމަ، އެ ގައުމުގެ ނިއުކްލިއާ ޕްރޮގްރާމަށާއި މިސައިލް މަރުކަޒުތަކަށް "ވަގުތުން" ހަމަލާދިނުމަށް ތާއީދުކުރައްވާނެ ކަމަށެވެ.