ޓްރަމްޕް އާއި ނަތަންޔާހޫ ފްލޮރިޑާގައި ބައްދަލު ކުރައްވަނީ

އެމެރިކާގެ ރައީސް ޑޮނަލްޑް ޓްރަމްޕް އާއި، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ބައްދަލު ކުރައްވާ ގޮތަށް ހަމަ ޖެހިއްޖެ އެވެ.

ހޯމަ ދުވަހު ޓްރަމްޕް އާއި ނަތަންޔާހޫ ބައްދަލު ކުރައްވާނީ އެމެރިކާގެ ފްލޮރިޑާގަ އެވެ. މިވަގުތު ޓްރަމްޕް ފްލޮރިޑާގައި ހުންނެވިއިރު، ޣައްޒާ ހަނގުރާމައާ ގުޅޭ ގޮތުން އެ ބައްދަލުވުމުގައި ޓްރަމްޕް އާއި ނަތަންޔާހޫ މަޝްވަރާ ކުރައްވާނެ ކަމަށް ވަނީ ބުނެފަ އެވެ. 

ފްލޮރިޑާގެ ޕާމް ބީޗުގައި އޮންނަ ޓްރަމްޕް ލަގްޒަރީ ރިސޯޓި، މާ އަ ލާގޯގައި ޓްރަމްޕް އާއި ނަތަންޔާހޫ ބައްދަލު ކުރައްވާއިރު، އެމެރިކާގެ އިސްނެގުމުގެ ދަށުން އެކުލަވާލާފައިވާ ހަނގުރާމަ ހުއްޓާލުމުގެ އެއްބަސްވުމުގެ ދެ ވަނަ މަރުޙަލާ ނުފެށި ވަނީ ލަސްވެފަ އެވެ. އެއާ އެކު، މި ބައްދަލުވުމުގައި ދެ ވަނަ މަރުޙަލާ ކުރިއަށް ގެންދިޔުމާ ގުޅޭ ގޮތުން ވެސް މަޝްވަރާ ކުރައްވާނެ ކަމަށް ބެލެވިފައިވެ އެވެ. 

މިއީ ނަތަންޔާހޫގެ އެދުމުގެ މަތިން ޓްރަމްޕް ބާއްވަވާ ބައްދަލުވުމެވެ. މީގެ ކުރިން ވެސް ޓްރަމްޕް އާއި ނަތަންޔާހޫ އެކި ފަހަރު މަތިން ބައްދަލު ކުރައްވައި މަޝްވަރާ ކުރައްވާފައިވާއިރު، މި ދެ ބޭފުޅުންނަކީ ވަރަށް ގާތް ގުޅުމެއް އޮންނަ ދެ ބޭފުޅުންނެވެ. ޚާއްސަކޮށް، މި ހިނގާ ޓްރަމްޕްގެ ރިޔާސީ ދެ ވަނަ ދައުރުގެ ތެރޭގައި އެ ގާތްކަން ވަރަށް ބޮޑަށް ފެނިގެންދެ އެވެ. 

މީޑިއާ ތަކުގައި ބުނެފައިވާ ގޮތުން ޓްރަމްޕް ބޭނުން ވަނީ ކުރިއަށް އޮތް ޖަނަވަރީ މަހުގެ ތެރޭގައި ބައިނަލްއަޤުވާމީ ސުލްޙަ ބެލެހެއްޓުމުގެ ބާރެއް ޣައްޒާގައި ޤާއިމު ކުރުމަށެވެ. އަދި އެކަން އިއުލާން ކުރައްވަން ޓްރަމްޕް ބޭނުންފުޅުވާއިރު، މީގެ ކުރިން ޓްރަމްޕް ވިދާޅުވެފައި ވަނީ އެ ބާރު ޤާއިމު ކުރުމަށް އެހީތެރިވުމަށް އެތައް ޤައުމަކުން އޮތީ ތައްޔާރަށެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސް އިން ވަނީ، ހޯމަ ދުވަހު އެ ބައްދަލުވުން އޮންނާނެކަން ކަށަވަރު ކޮށްދީފަ އެވެ. އެގޮތުން އެ ބައްދަލުވުން އޮންނާނީ ހޯމަ ދުވަހުގެ މެންދުރު ފަހު، އެމެރިކާގެ ގަޑިން އެކެއް ޖަހާއިރު ކަމަށް ވެސް ވަނީ ހާމަ ކޮށްފަ އެވެ. 

އެ ބައްދަލުވުމާ ގުޅޭ ގޮތުން އިސްރާއީލް ސަރުކާރުގެ ތަރުޖަމާނު ޝޮޝް ބެޑްރޮޝަން ވިދާޅުވެފައި ވަނީ، އެ މަޝްވަރާ ތަކުގައި ޣައްޒާ ހަނގުރާމައިގެ ދެ ވަނަ ފިޔަވައްސާ ގުޅޭ ގޮތުން ދެ ލީޑަރުން ވާހަކަ ދައްކަވާނެ ކަމަށެވެ. އަދި ހަމާސް ޖަމާއަތުގެ ހަތިޔާރު ބެހެއްޓުމާއި، ޣައްޒާ ސާފު ކުރުމުގެ ވާހަކަ ދައްކަވާނެ ކަމަށް ވެސް ވިދާޅުވެފައިވެ އެވެ. ހަމާސް އިން ވަނީ، އެ ޖަމާއަތުގެ ހަތިޔާރު އެހެން އެއްވެސް ބަޔަކާ ހަވާލު ނުކުރާނެ ކަމަށް ބުނެފަ އެވެ. 

މިއީ މިއަހަރުގެ ތެރޭގައި ޓްރަމްޕް އާއި ނަތަންޔާހޫ ބައްދަލު ކުރައްވާ ހަ ވަނަ ފަހަރެވެ. މިއަހަރުގެ ފެބްރުވަރީ މަހާއި، އޭޕްރީލް، ޖުލައި، ސެޕްޓެމްބަރު އަދި އޮކްޓޫބަރު މަހުގެ ތެރޭގައި ވެސް ޓްރަމްޕް އާއި ނަތަންޔާހޫ ވަނީ ބައްދަލު ކުރައްވައިފަ އެވެ. އޭގެ ތެރެއިން އެއް ފަހަރު ޓްރަމްޕް އާއި ނަތަންޔާހޫ ބައްދަލު ކުރައްވާފައި ވަނީ އިސްރާއީލްގަ އެވެ. އެ ނޫން ހުރިހާ ބައްދަލުވުން ތަކެއް ކުރިއަށް ގެންދިޔައީ އެމެރިކާގަ އެވެ. 

މީޑިއާ ތަކުގައި ބުނެފައިވާ ގޮތުން، ހޯމަ ދުވަހުގެ ބައްދަލުވުމުގައި އީރާންއާ ގުޅޭ ގޮތުން ވެސް ނަތަންޔާހޫ ޓްރަމްޕްއާ މަޝްވަރާ ކުރައްވާނެ އެވެ. އެގޮތުން އީރާންގެ ނިއުކްލިއާ ޕްރޮގްރާމް އަށް އަމާޒުކޮށް އެމެރިކާ އިން އިތުރު ހަމަލާއެއް ދިނުމަކީ ނަތަންޔާހޫ ބޭނުންވާ ގޮތް ކަމަށްވާއިރު، މި ބައްދަލުވުމުގައި ނަތަންޔާހޫ އެކަމަށް ބާރު އަޅުއްވާނެ ކަމަށް ވެސް ރިޕޯޓު ކޮށްފަައިވެ އެވެ.