އިޒްރޭލުން ފަލަސްތީނުގެ ސަރަހައްދުތަކަށް ދިން ހަމަލާތަކުގައި ފަސް ކުޑަކުދިން ހިމެނޭހެން މަދުވެގެން 13 މީހުން ޝަހީދުކޮށްލައިފި
ޣައްޒާގެ ހެލްތު މިނިސްޓްރީން ބުނާ ގޮތުގައި، ހަނގުރާމަ ހުއްޓާލި ފަހުން މިހާތަނަށް އިޒްރޭލު ސިފައިން ވަނީ ޣައްޒާ އިން މަދުވެގެން 425 ފަލަސްތީނު ރައްޔިތުން ޝަހީދުކޮށްލާފަ.
އިޒްރޭލުގެ ވައިގެ ހަމަލާތަކުގައި ޒަޚަމްވި ފަލަސްތީނުގެ ތުއްތު ކުއްޖަކަށް ފަރުވާ ދޭން ޚާން ޔޫނިސްގައި ހުންނަ ހޮސްޕިޓަލަކަށް ގެންދަނީ - އޮކްޓޯބަރު 17، 2023 | ގެޓީ އިމޭޖަސް
ޣައްޒާގެ ސިވިލް ޑިފެންސް އިދާރާއިން ބުނާގޮތުގައި، ހަނގުރާމަ ހުއްޓާލުމުގެ އެއްބަސްވުމާ ޚިލާފުވެ، ބުރާސްފަތި ދުވަހު އިޒްރޭލުން ފަލަސްތީނުގެ ސަރަހައްދުތަކަށް ދިން ހަމަލާތަކުގައި ފަސް ކުޑަކުދިން ހިމެނޭހެން މަދުވެގެން 13 މީހުން ޝަހީދުކޮށްލައިފި އެވެ.
އެ އިދާރާގެ ތަރުޖަމާނު މަޙްމޫދު ބައްސާލް އޭއެފްޕީ އަށް މައުލޫމާތު ދެއްވަމުން ވިދާޅުވީ، ޣައްޒާގެ ދެކުނުގައި ހާލުގައި ޖެހިފައިވާ މީހުން ދިރިއުޅޭ ފޭލިގެއަކަށް ޑްރޯން ހަމަލާއެއް ދިނުމުގެ ސަބަބުން ތިން ކުޑަކުދިން ހިމެނޭހެން ހަތަރު މީހަކު ޝަހީދުވެފައިވާ ކަމަށެވެ.
ޣައްޒާގެ އުތުރުގައިވާ ޖަބާލިއާ ރެފިއުޖީ ކޭމްޕް ކައިރިން 11 އަހަރުގެ އަންހެން ކުއްޖަކު ޝަހީދުކޮށްލާފައިވާ އިރު، ސްކޫލަކަށް ދިން ހަމަލާއެއްގައި ވެސް މީހަކު ވަނީ ޝަހީދުވެފަ އެވެ. މީގެ އިތުރުން ދެކުނުގެ ޚާން ޔޫނިސް ކައިރިން ޑްރޯން ހަމަލާއެއްގައި އިތުރު ފިރިހެނަކު ޝަހީދުވި ކަމަށް އެ އިދާރާއިން ބުންޏެވެ.
އެހެން ހަމަލާތަކެއްގައި ކުޑަކުއްޖަކާ އެކު އިތުރު ދެ މީހަކު ޝަހީދުވެފައިވާ ކަމަށް ވެސް އެ އިދާރާ އިން ރިޕޯޓްކޮށްފައިވެ އެވެ. މިކަމާ ގުޅޭގޮތުން އޭއެފްޕީ އިން ސުވާލުކުރުމުން އިޒްރޭލު ސިފައިން ބުނީ އެ ރިޕޯޓްތައް ބަލަމުންދާ ކަމަށެވެ.
ބުރާސްފަތި ދުވަހުގެ ރޭގަނޑު، ޣައްޒާ ސިޓީގެ އިރުމަތީ ސަރަހައްދެއްގައި ހުރި ގެއަކަށް އިޒްރޭލުން ދިން ވައިގެ ހަމަލާއެއްގައި އިތުރު ހަތަރު މީހަކު ޝަހީދުވެފައިވާ ކަމަށް ބައްސާލް ވިދާޅުވި އެވެ. އަދި ގެއްލިފައިވާ ބައެއް މީހުން ހޯދުމުގެ މަސައްކަތް މިހާރު ފަށާފައިވާ ކަމަށް ވެސް އޭނާ ވިދާޅުވި އެވެ.
"ހަނގުރާމަ ހުއްޓާލުމުގެ އެއްބަސްވުމާ ކަނޑައެޅިގެން ޚިލާފަށް މިއަދު ހެނދުނުން ފެށިގެން އިސްރާއީލުން ގައްޒާއަށް ދިން ހަމަލާތަކުގައި ޝަހީދުވި މީހުންގެ އަދަދު މިހާރު ވަނީ 13 އަށް އަރާފައި،" ބައްސާލް ވިދާޅުވި އެވެ.
ބުރާސްފަތި ދުވަހުގެ ކުރީކޮޅު އިޒްރޭލު ސިފައިން ބުނެފައިވަނީ ޣައްޒާ ސިޓީގެ ސަރަހައްދަކުން އިޒްރޭލާ ދިމާލަށް އަމާޒުކޮށް ފޮނުވާލި ހަމަލާ އެއް ޣައްޒާގެ އެތެރެ އަށް ވެއްޓިފައިވާ ކަމަށެވެ. އަދި އޭގެ ކުޑަވަގުތުކޮޅެއް ފަހުން އެ ހަމަލާ ފޮނުވާލި ތަނަށް "ހަމަލާ އެއް" ދީފައިވާނެ ކަމަށް ވެސް ބަޔާނެއްގައި ބުނެފައިވެ އެވެ.
އޮކްޓޫބަރު މަހުގެ 10 ވަނަ ދުވަހުން ފެށިގެން އެމެރިކާގެ މެދުވެރިވުމާއެކު ޣައްޒާގައި އޮތް ނާޒުކު ހަނގުރާމަ ހުއްޓާލުމުގެ އެއްބަސްވުމުގެ ސަބަބުން ހަނގުރާމަ ބޮޑުތަނުން މަޑުޖެހިފައިވީ ނަމަވެސް، ދެފަރާތުން ވެސް ގެންދަނީ އެއްބަސްވުމާ ޚިލާފުވަމުންދާ ކަމަށް ތުހުމަތު ކުރަމުންނެވެ.
ހަމާސްގެ ތަރުޖަމާނު ޙާޒިމް ޤާސިމް އޭއެފްޕީ އަށް ވިދާޅުވީ، ބުރާސްފަތި ދުވަހު ޣައްޒާ އަށް ދިން ހަމަލާތަކަކީ އިޒްރޭލުން ހަނގުރާމަ ހުއްޓާލުމަށް ވެފައިވާ ވައުދާ ޚިލާފުވެފައިވާ ކަމުގެ ހެއްކެއް ކަމަށެވެ.
ޣައްޒާގެ ހެލްތު މިނިސްޓްރީން ބުނާ ގޮތުގައި، ހަނގުރާމަ ހުއްޓާލި ފަހުން މިހާތަނަށް އިޒްރޭލު ސިފައިން ވަނީ ޣައްޒާ އިން މަދުވެގެން 425 ފަލަސްތީނު ރައްޔިތުން ޝަހީދުކޮށްލާފަ އެވެ.
ނޮވެމްބަރު 22 ވަނަ ދުވަހު އިޒްރޭލުން ދިން ހަމަލާތަކުގައި މަދުވެގެން 21 މީހުން ޝަހީދުވެފައިވާއިރު، މިއީ ހަނގުރާމަ ހުއްޓާލި ފަހުން ޣައްޒާ އަށް އެންމެ ގިނަ މީހުން ޝަހީދުވި އެއް ދުވަހެވެ.
އިޒްރޭލު ސިފައިން ބުނާ ގޮތުގައި، ހަމަ މި މުއްދަތުގެ ތެރޭގައި ފަލަސްތީނުގެ ހަނގުރާމަވެރިން ވަނީ އިޒްރޭލުގެ ތިން ސިފައިން މަރާލާފަ އެވެ.
