ނިއުކްލިއާ ޕްރޮގްރާމް ތަރައްޤީ ކުރާ ނަމަ، އީރާން އަށް ހަމަލާ ދިނުމަށް ތާއީދު ކުރާނެ ކަމަށް ޓްރަމްޕް ވިދާޅުވެއްޖެ

އީރާން އިން ނިއުކްލިއާ ޕްރޮގްރާމް ތަރައްޤީކޮށް ކުރިއަށް ގެންދާ ނަމަ، އެ ޤައުމަށް ހަމަލާ ދިނުމަށް ތާއީދު ކުރައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް މިހެން ވިދާޅުވެފައި ވަނީ އެމެރިކާގެ ފްލޮރިޑާގައި އޮންނަ އޭނާގެ ލަގްޒަރީ ރިސޯޓު، މާ އަ ލާގޯގައި އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫއާ ބައްދަލު ކުރެއްވުމަށް ފަހު އެވެ. އެގޮތުން ޓްރަމްޕް ވިދާޅުވީ އީރާން އިން އަލުން ނިއުކްލިއާ ބާރުވެރިކަން އުފެއްދުމަށް މަސައްކަތް ކުރަމުންދާ ކަމުގެ އަޑު އިވޭ ކަމަށާއި، އެހެން އެކަން ވާ ނަމަ އެއީ ހުއްޓުވަން ޖެގޭ ކަމެއް ކަމަށެވެ. 

އެކަން ފާހަގަ ކުރައްވައި ޓްރަމްޕް ވިދާޅުވީ، އީރާން އިން އެކަން ކުރާ ނަމަ އެ ޤައުމާ ދެކޮޅަށް ހަމަލާ ދޭނެ ކަމަށެވެ. ޓްރަމްޕް ވިދާޅުވީ އީރާން އާއެކު އެއްބަސްވުމަކަށް ދިޔުމަށް އޭނާ ވެސް ހުންނެވީ ތައްޔާރަށް ކަމަށާއި، އެންމެ ބުއްދިވެރި ގޮތަކީ ވެސް އެއީ ކަމަށެވެ. ޓްރަމްޕް މިހެން ވިދާޅުވެފައިވާއިރު، ނަތަންޔާހޫ ވެސް ބޭނުން ވަނީ އަލުން އީރާން އަށް ހަމަލާ ދޭން ކަމަށް ރިޕޯޓު ތަކުގައި ވަނީ ބުނެފަ އެވެ. 

މީގެ ކުރިން ވެސް އިސްރާއީލް އިން އިސްވެ ވަނީ އީރާން އަށް ހަމަލާ ދީފަ އެވެ. އެކަމުގެ ސަބަބުން ދެ ޤައުމުގެ ދެ މެދުގައި ހަމަލާ ބަދަލު ކުރުން ތަކެއް ފެށި، އެންމެ ފަހުން އެމެރިކާ އިން ވެސް ވަނީ އީރާންގެ ނިއުކްލިއާ މަރުކަޒު ތަަކަށް އަމާޒުކޮށް ހަމަލާ ދީފަ އެވެ. އެއާ އެކު، ޤަތަރުގައި ހުންނަ އެމެރިކާގެ ބޭސް އަކަށް އަމާޒުކޮށް އީރާން އިން ހަމަލާ ދީފައިވެ އެވެ. އޭގެ ފަހުން ހަމަލާ ބަދަލު ކުރުން ހުއްޓާލަން ވަނީ އެއްބަސްވެފަ އެވެ. 

ބައެއް މީޑިއާ ތަކުގައި ބުނެފައިވާ ގޮތުގައި، ނަތަންޔާހޫ ވަނީ އަލުން އީރާން އަށް ހަމަލާ ދިނުމަށް ޓްރަމްޕް އަށް ބާރު އަޅުއްވައިފަ އެވެ. އެކަމުގެ ޔަގީންކަމާއި، އިތުބާރު ޓްރަމްޕްގެ ފަރާތުން ހޯއްދަވަން ނަތަންޔާހޫ ބޭނުންފުޅުވާ ކަމަށާއި، ޓްރަމްޕްއާ ބައްދަލު ކުރެއްވުމުގެ މައިގަނޑު މަޤުސަދަކީ އެއީ ކަމަށް ވެސް ބުނެފައިވެ އެވެ.

ޓްރަމްޕް އާއި ނަތަންޔާހޫގެ ބައްދަލުވުމުގައި ވަނީ ޣައްޒާ ހަނގުރާމައާ ގުޅޭ ގޮތުން ވެސް މަޝްވަރާތައް ކުރިއަށް ގެންދަވައިފަ އެވެ. މިއަހަރުގެ އޮކްޓޫބަރު މަހުގެ ތެރޭގައި އެކުލަވާލެވުނު ހަނގުރާމަ ހުއްޓާލުމުގެ އެއްބަސްވުމުގެ ދެ ވަނަ ފިޔަވަހީގެ ކަންކަން ކުރިއަށް ގެންދިޔުމަށް ނަތަންޔާހޫ ލަސް ކުރާ ކަމަށް ތުހުމަތު ކޮށްފައިވެ އެވެ. ނަމަވެސް، ޓްރަމްޕް ވަނީ ނަތަންޔާހޫގެ ދިފާއުގައި ވާހަކަ ދައްކަވައިފަ އެވެ. 

ޓްރަމްޕް ވިދާޅުވީ ހަނގުރާމަ ހުއްޓާލުމުގެ އެއްބަސްވުމުގެ ދަށުން ދެ ވަނަ ފިޔަވަހީގެ ކަންކަން ކުރިއަށް ގެންދިޔުން ވީ އެންމެ އަވަސް ކުރަން ޖެހޭ ކަމަށެވެ. އެކަމަށް ވަރަށް ބޮޑަށް އެދިވަޑައިގަންނަވާ ކަމަށާއި، ހަމާސް ޖަމާއަތުން ހަތިޔާރު ބަހައްޓަން ޖެހޭ ކަމަށް ވެސް ޓްރަމްޕް ވިދާޅުވެފައިވެ އެވެ. 

ނަތަންޔާހޫ އަށް ވަރަށް ބޮަޑަށް ތައުރީފު ކުރައްވައި ޓްރަމްޕް ވިދާޅުވީ، ނަތަންޔާހޫ ކަހަލަ ރަނގަޅު ބޮޑު ވަޒީރެއް ނެތް ނަމަ، އިސްރާއީލް ނެތި ދާނެ ކަމަށެވެ. ޓްރަމްޕް މިހެން ވިދާޅުވެފައިވާއިރު، އަބަދު ވެސް ޓްރަމްޕް އާއި ނަތަންޔާހޫ އަކީ ވަރަށް ގާތް ގުޅުމެއް އޮންނަ ދެ ލީޑަރުންނެވެ. ޓްރަމްޕްގެ ރިޔާސީ ދެ ވަނަ ދައުރުގެ ތެރޭގައި އޭނާ އެންމެ ގިނައިން ބައްދަލު ކުރެއްވި ލީޑަރަކީ ވެސް ނަތަންޔާހޫ އެވެ.

މީގެ އިތުރުން ޓްރަމްޕް ވިދާޅުވެފައި ވަނީ ނަތަންޔާހޫގެ މައްޗަށް ކޮށްފައިވާ ކޮރަޕްޝަންގެ ތުހުމަތާއި، ދައުވާ ތަކަށް މައާފު ލިބެން ޖެހޭ ކަމަށެވެ. އެގޮތުން ނަތަންޔާހޫ އަށް މައާފު ދެއްވުމަށް، އިސްރާއީލްގެ ރައީސްގެ އަރިހުން ވެސް އެދިވަޑައިގެންފައިވާ ކަމަށެވެ. އަދި އެކަމާ މެދު ވިސްނަވާ ކަމަށް އިސްރާއީލްގެ ރައީސް ވިދާޅުވެފައިވާ ކަމަށް ޓްރަމްޕް ހާމަ ކުރެއްވި އެވެ. ނަމަވެސް، އިސްރާއީލްގެ ރައީސްގެ އޮފިހުނ ބުނެފައި ވަނީ، އެކަމާ ގުޅޭ ގޮތުން ޓްރަމްޕް އާއި އެ ޤައުމުގެ ރައީސް ވާހަކަ ދައްކަވާފައި ނުވާ ކަމަށެވެ.