ފައިނަލްގެ ކުރިން ފްލިކް: "ޓީމާ މެދު އަހަރެން ވަރަށް ހިތްހަމަ ޖެހޭ"

ސްޕެނިޝް ސުޕަ ކަޕްގެ ފައިނަލްގައި ވާާދަވެރި ރެއާލް މެޑްރިޑާ ދެކޮޅަށް ނިކުންނައިރު، ބާސެލޯނާގެ ކުޅުންތެރިންނާ މެދު ހިތްހަމަ ޖެހޭ ކަމަށް އެ ޓީމުގެ ކޯޗު ހަންސީ ފްލިކް ބުނެފި އެވެ.

އާދީއްތަ ދުވަހުގެ ރޭ އޮންނަ ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، ބާސެލޯނާ އިން ނިކުންނަނީ އަނެއްކާ ވެސް އެލް ކްލެސިކޯ އަކަށް ކަމަށެވެ. އެ މެޗުގައި ވެސް ބާސެލޯނާގެ ފަރާތުން ފެންނަން ބޭނުން ވަނީ، ސެމީ ފައިނަލްގައި އެތުލެޓިކް ބިލްބާއޯއާ ދެކޮޅަށް ދެއްކި ކަހަލަ ކުޅުމެއް ކަމަށް ފްލިކް ބުންޏެވެ.

އެގޮތުން އެ މެޗުގައި ވެސް ބާސެލޯނާ އިން ކުޅުނީ އެއް ޓީމެއްގެ ގޮތުގައި، ހުރިހާ ކުޅުންތެރިން ވަރަށް ބޮޑަށް އެކުވެގެން ކަމަށް ފްލިކް ބުންޏެވެ. ފައިނަލްގައި ވެސް އެކަން ފެންނަން ބޭނުންވާކަން ފާހަގަކޮށް ފްލިކް ބުނީ، ދަނޑު މަތީގައި ކުޅުންތެރިން އެ މީހުންގެ އެންމެ މޮޅު ކުޅުން ދައްކަން ބޭނުންވާ ކަމަށެވެ. މެޗަކަށް ނިކުންނައިރު، އޭނާ އަށް އެންމެ މުހިންމީ އެ ކަންތައް ކަމަށް ވެސް ފްލިކް ބުންޏެވެ.

މީގެ އިތުރުން ފްލިކް ބުނީ ފައިނަލް މެޗު ވާނީ ފައިނަލް މެޗަކަށް ކަމަށެވެ. އެހެން ނަމަވެސް، ރެއާލްއާ ދެކޮޅަށް ކުޅޭ މެޗެއް ނަމަ ތަފާތު ވާނެ ކަމަށް ފްލިކް ފާހަގަ ކުރި އެވެ. އެގޮތުން މެޗުގެ ކުރިން ފޭވަރިޓުންނަކީ ވަކި ޓީމެކޭ ބުނެ، އެ ވާހަކަ ދައްކަން ބޭނުން ނުވާ ކަމަށް ފްލިކް ވަނީ ބުނެފަ އެވެ. އެގޮތުން ބާސެލޯނާ އިން ބޭނުން ވަނީ ރަނގަޅު ބޯޅައެއް ކުޅެ، ރަނގަޅު ކުޅުމެއް ދައްކަން ކަމަށް ފްލިކް ބުނެފައިވެ އެވެ. ބާސެލޯނާގެ މުޅި ފޯކަސް އޮތީ ފައިނަލް މެޗަށްކަން ފާހަގަކޮށް ފްލިކް ބުނީ، އެ ޓީމުގެ ކުޅުންތެރިންނަށް އޭނާ ގެ ފުރިހަމަ އިތުބާރު އޮންނަ ކަމަށެވެ.

ކުރިއަށް އޮތް ފައިނަލް މެޗަކީ އެންމެ މެޗެއް ކަމަށާއި، ކޮންމެ ގޮތަކަށް ނަތީޖާ ނިކުތް ނަމަވެސް އަލުން އެނބުރި ސްޕެނިޝް ލީގަށް ފޯކަސް ކުރަން ޖެހޭ ކަމަށް ފްލިކް ބުންޏެވެ. ސުޕަ ކަޕްގެ ނަތީޖާ ކޮންމެ ގޮތަކަށް ނިކުތް ނަމަވެސް، އެކަމަަށް ސަމާލުކަން ދޭން ޖެހޭނެ ކަމަށް އޭނާ ވަނީ ބުނެފަ އެވެ. އެހެން ނަމަވެސް، ބާސެލޯނާ އިން ކޮންމެ ގޮތެއް ވިޔަސް މޮޅުވާން ބޭނުންވާ ކަމަށާއި، އަމާޒަކީ ސުޕަ ކަޕްގެ ތަށި ދިފާއު ކުރުން ކަމަށް ފްލިކް ވަނީ ބުނެފަ އެވެ. 

ރެއާލްއާ ގުޅޭ ގޮތުން ފްލިކް ބުނީ، އެ ޓީމަކީ ވަރަށް ވަރުގަދަ އަދި މޮޅު ޓީމެއް ކަމަށެވެ. ރެއާލް އަކީ ވަރަށް ހުނަރުވެރި އަދި ފެންވަރު ރަނގަޅު ކުޅުންތެރިންގެ މައްޗަށް އެކުލެވިގެން އޮތް ޓީމެއް ކަމަށް ވެސް ފްލިކް ބުންޏެވެ. އެކަމަކު ވެސް، އޭނާގެ ފޯކަސް އޮތީ ބާސެލޯނާ އަށްކަން ފާހަގަކޮށް ފްލިކް ބުނީ، ބޭނުން ވަނީ ތަށި ކާމިޔާބު ކުރަން ކަމަށެވެ.

އާދީއްތަ ދުވަހުގެ ރޭ ދަންވަރު 12 ޖަހާއިރު ރެއާލްއާ ދެކޮޅަށް ނިކުންނައިރު، އެންމެ ފަހުން ވެސް ބާސެލޯނާ އިން ސުޕަ ކަޕް ކާމިޔާބު ކުރީ ފައިނަލްގައި ރެއާލް ބަލި ކޮށްގެންނެވެ.