ފަހަތުން އަރައި ބާސެލޯނާ އިން ފްރޭންކްފާޓް ބަލިކޮށްފި

ޔުއެފާ ޗެމްޕިއަންސް ލީގުގައި ޖަރުމަނުގެ އެއިންޓްރަކްޓް ފްރޭންކްފާޓްއާ ދެކޮޅަށް ކުޅުނު މެޗުން މޮޅުވެ، ސްޕެއިންގެ ބާސެލޯނާ އިން ހަމަޖެހުމެއް ހޯދައިފި އެވެ.

ބާސެލޯނާގެ އަމިއްލަ ދަނޑުގައި އަންގާރަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ފްރޭންކްފާޓް އިން ލަނޑު ޖަހައި ލީޑު ނަގާފައި ވަނިކޮށް، ބާސެލޯނާ އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 21 ވަނަ މިނެޓުގައި ފްރޭންކްފާޓް އަށް ލީޑު ނަގައިދިނީ އަންސްގާ ނައުފް އެވެ. އެ ލަނޑު އޭނާ ޖެހީ އެ ޓީމުގެ ނަތަނިއަލް ބްރައުން ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގައި ބާސެލޯނާ އިން ވަނީ ލަނޑު ޖަހަން ވަރަށް ބޮޑަށް މަސައްކަތް ކޮށްފަ އެވެ.

ފަހަތުން އަރައި ބާސެލޯނާ އިން ދެ ލަނޑު ޖެހިއިރު، އެ ދެ ލަނޑު ވެސް އެ ޓީމުން ޖެހީ ދެ ވަނަ ހާފުގަ އެވެ. މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ބާސެލޯނާގެ ފުރަތަމަ ލަނޑު ޖަހައި ނަތީޖާ ހަމަހަމަ ކޮށްދިނީ ޖޫލްސް ކޫންޑޭ އެވެ. އެއީ މާކަސް ރަޝްފޯޑް ތަނަވަސްކޮށްދިން ފުރުސަތެއްގައި ކޫންޑޭ ޖެހި ލަނޑެކެވެ.

އޭގެ ތިން މިނެޓު ފަހުން ކޫންޑޭ ވަނީ ދެ ވަނަ ލަނޑެއް ޖަހައި ބާސެލޯނާ އަށް މެޗުގެ ލީޑު ހޯދައިދީފަ އެވެ. އެ ލަނޑު ޖަހަން ކޫންޑޭ އަށް ފުރުސަތު ތަނަވަސްކޮށްދިނީ ލަމީން ޔަމާލް އެވެ. މެޗުގައި ބާސެލޯނާގެ ދެ ލަނޑު ވެސް ޖެހީ ކޫންޑޭ އަކީ މެޗުގެ މޮޅު ކުޅުންތެރިޔާ އެވެ.

މެޗުން މޮޅުވެ ބާސެލޯނާ އޮތީ ލީގު ތާވަލްގެ 14 ވަނައިގަ އެވެ. މިހާތަނަށް ޗެމްޕިއަންސް ލީގުގައި ކުޅެފައިވާ ހަ މެޗުން ބާސެލޯނާ އަށް ލިބެނީ 10 ޕޮއިންޓެވެ. ތިން މެޗުން އެ ޓީމު މޮޅުވެފައިވާއިރު، އެއް މެޗުން ވަނީ އެއްވަރުވެފަ އެވެ. އަނެއް ދެ މެޗުން ވަނީ ބަލިވެފަ އެވެ.

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނެފައި ވަނީ ފްރޭންކްފާޓް އަކީ ވަރަށް ހުނަރުވެރި ކުޅުންތެރިން ތިބި ޓީމެއް ކަމަށާއި، އެ ޓީމަކީ ވެސް ނުރައްކާތެރި ޓީމެއް ކަމަށެވެ. ޚާއްސަކޮށް އެ ޓީމުން ޑިފެންސްގައި ވަރުގަދަ ކުޅުމެއް ދެއްކިކަން ފާހަގަކޮށް ފްލިކް ބުނީ، އެ ޓީމުން ބާސެލޯނާ އަށް ވަރަށް ގިނަ އުނދަގޫތައް ކުރިމަތި ކުރުވި ކަމަށެވެ.

މެޗުގެ ފުރަތަމަ ހާފުގައި ބާސެލޯނާ އަށް ވަރަށް ގިނަ ކަންކަން ގޯސްކޮށް ކުރެވުނު ނަމަވެސް، ދެ ވަނަ ހާފުގައި އެ ޓީމުން ރަނގަޅު ކުޅުމެއް ދެއްކި ކަމަށް ފްލިކް ޤަބޫލު ކުރެ އެވެ. އޭނާ ބުނީ، ފަހަތުން އަރައި ބާސެލޯނާ އިން މެޗުން މޮޅުވެފައިވާއިރު، ކަމްބެކާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށެވެ. ޚާއްސަކޮށް ކުޅުންތެރިން އެއްވެސް ވަރަކަށް ހިތްވަރު އެލުވާ ނުލައި، ކުރިއަށް ދިޔަ ކަމަށް އޭނާ ބުންޏެވެ.