ވިޔަރެއާލް ބަލިކޮށް، ބާސެލޯނާ އިން ލީޑު ފުޅާ ކޮށްފި

ސްޕެނިޝް ލީގުގައި ވިޔަރެއާލްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެއް ވަަނައިގައި ލީޑު ފުޅާ ކޮށްފި އެވެ.

އާދީއްތަ ދުވަހުގެ ރޭ ވިޔަރެއާލްގެ އަމިއްލަ ދަނޑުގައި ކުޅުނު މެޗު ބާސެލޯނާ އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން 12 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ބްރެޒިލްގެ ރަފީނިއާ އެވެ. އެއީ ވިޔަރެއާލްގެ އޭރިޔާ ތެރެއިން އޭނާ އަށް ކުރި ފައުލަކާ ގުޅިގެން ލިބުނު ޕެނަލްޓީ ކާމިޔާބުކޮށް ރަފީނިއާ ޖެހި ލަނޑެކެވެ. އޭގެ ފަހުން ރަފީނިއާ އަށް ލިބުނު ފުރުސަތެއްގައި އޭނާ ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއާ އެވެ.

މެޗުގެ ފުރަތަމަ ހާާފުގައި ބާސެލޯނާ އަށް ވަނީ އިތުރު ލަނޑު ޖަހަން ވެސް ފުރުސަތު ލިބިފަ އެވެ. އެގޮތުން ބާސެލޯނާގެ ލަމީން ޔަމާލް ފޮނުވާލި ބޯޅަ ދިޔައީ ގޯލުގެ ހުރަސް ދަނޑި ކައިރިން ބޭރަށެވެ. މެޗުގައި ބާސެލޯނާ އިން ދެ ވަނަ ލަނޑު ޖަހައި ލީޑު ފުޅާ ކުރީ 63 ވަނަ މިނެޓުގަ އެވެ. ފްރެންކީ ޑި ޔޯން ތަނަވަސްކޮށްދިން ފުރުސަތެއްގައި ބާސެލޯނާ އަށް އެ ލަނޑު ޖަހައިދިނީ ޔަމާލް އެވެ.

މޮޅާ އެކު ބާސެލޯނާ އިން ވަނީ ލީގު ތާވަލްގެ އެއް ވަނަ މަގާމުގައި ހަތަރު ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 18 މެޗުން ބާސެލޯނާ އަށް ލިބެނީ 46 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ވާދަވެރި ރެއާލް މެޑްރިޑަށް ލިބެނީ 42 ޕޮއިންޓެވެ.

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ވަނީ އެ ޓީމުގެ ގޯލު ކީޕަރު ޖޯން ގާސިއާ އަށް ވަރަށް ބޮޑަށް ތައުރީފު ކޮށްފަ އެވެ. އެގޮތުން އެ މެޗުގައި ގާސިއާގެ ފަރާތުން މޮޅު ކުޅުމެއް ފެނުނުކަން ފާހަގަކޮށް ފްލިކް ބުނީ، ގާސިއާ ވަނީ އެތައް ފަަހަރެއްގައި ބާސެލޯނާ ސަލާމަތް ކޮށްދީފައި ކަމަށެވެ. އެކަން ފާހަގަކޮށް ފްލިކް ބުނީ ގާސިއާ އަކީ ބާސެލޯނާގައި މުހިންމު ކުޅުންތެރިޔެއް ކަމަށެވެ. 

މީގެ އިތުރުން ފްލިކް ބުނީ އެ މެޗުގައި ބާސެލޯނާގެ ކުޅުންތެރިންގެ ފަރާތުން ކޮންމެ ވެސް ވަރަކަށް ވަރިބަލިކަން ފެނިފައިވާ ކަމަށެވެ. އެގޮތުން ބާސެލޯނާ އަށް ލަނޑު ޖަހަން ވެސް އިތުރު ފުރުސަތު ތަކެއް ލިބުނު ކަމަށާއި، ނަމަވެސް އެ ފުރުސަތުގެ ބޭނުން ނުކުރެވި ދިޔައީ ކަމަށް ފްލިކް ބުންޏެވެ. މިއަހަރުގެ ތެރޭގައި ބާސެލޯނާ އިން ވަރަށް ގިނަ ކަންކަން ހާސިލު ކޮށްފައިވާ ކަމަށާއި، ވަރަށް ގިނަ ކަންކަން ރަނގަޅު ކޮށްފައިވާ ކަމަށް ވެސް އޭނާ ބުނެފައިވެ އެވެ.

ބާސެލޯނާ އިން ދައްކަމުން އަންނަ ކުޅުމާ ގުޅޭ ގޮތުން ފްލިކް ބުނީ، އެންމެ މުހިންމީ ފަރިތަކުރުން ތަކުގައި ކުޅުންތެރިން ކުރާ މަސައްކަތް ކަމަށެވެ. އޭނާ ބުނީ ފަރިތަކުރުން ތަކުގައި ކޮންމެ ކުޅުންތެރިޔަކު ވެސް އަންނަނީ 100 އިންސައްތަ ދައްކަމުން ކަމަށާއި، އެއީ އޭނާ އަށް އޮންނަ ހިތްހަމަ ޖެހުމެއް ކަމަށެވެ. އޭނާ ބުނީ ފަރިތަކުރުން ތަކުގައި ކުރާ މަސައްކަތުގެ ނަތީޖާ މެޗު ތަކުގައި ފެންނަ ކަަމަށެވެ.

ފްލިކް ބުނީ އެއް ވަނައިގައި ލީޑު ފުޅާ ކުރެވުމުން އޭނާ ހުރީ ހިތްހަމަ ޖެހިފައި ކަމަށެވެ. އެހެން ނަމަވެސް، ބްރޭކަށް ފަހު އެނބުރި އައިސް އިތުރު ހިތްވަރެއް ކުރަން ޖެހޭ ކަމަށާއި، ބާސެލޯނާ އިން ޙާސިލު ކުރަން ބޭނުންވާ ކަންކަން ވަރަށް ގިނަ ކަމަށް އޭނާ ބުންޏެވެ. އެހެންކަމުން އަލުން އެނބުރި އައިސް، އަނެއްކާ ވެސް ކޮންމެ މެޗަކަށް ތައްޔާރު ވާނީ އެންމެ ފުރިހަމަ އަށް ކަމަށް ފްލިކް ބުންޏެވެ.