ފަސް ލަނޑުގެ މޮޅާ އެކު، ބާސެލޯނާ ފައިނަލަށް

ސްޕެނިޝް ސުޕަ ކަޕްގެ ސެމީ ފައިނަލްގައި އެތުލެޓިކް ބިލްބާއޯ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން މުބާރާތުގެ ފައިނަލްގެ ޖާގަ ހޯދައިފި އެވެ.

ކިންގް ޢަބްދުﷲ ސްޕޯޓްސް ސިޓީގައި ބުދަ ދުވަހުގެ ރޭ ކުޅުނު ސެމީ ފައިނަލް މެޗު ބާސެލޯނާ އިން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން ހަތަރު ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 22 ވަނަ މިނެޓުގައި ބާސެލޯނާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ފެރާން ޓޮރޭސް އެވެ. އެއީ ފާމިން ލޮޕޭޒް ތަަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ އަށް މިނެޓު ފަހުން ލޮޕޭޒް ވަނީ ބާސެލޯނާގެ ދެ ވަނަ ލަނޑު ޖަހައިފަ އެވެ.

މެޗުގައި ބާސެލޯނާގެ ތިން ވަނަ ލަނޑު ޖަަހައި އިތުރަށް ލީޑު ފުޅާ ކޮށްދިނީ ރޫނީ ބާދްގީ އެވެ. މެޗުގެ 34 ވަނަ މިނެޓުގައި އޭނާ އެ ލަނޑު ޖެހީ ލޮޕޭޒް ތަނަވަސްކޮށްދިން ފުރުސަތެއްގަ އެވެ. އޭގެ ހަތަރު މިނެޓު ފަހުން ރަފީނިއާ ވަނީ ބާސެލޯނާގެ ހަތަރު ވަނަ ލަނޑު ޖަހައިފަ އެވެ. އެ ލަނޑު ރަފީނިއާ ޖެހީ ބާގްދީ ތަނަވަސްކޮށްދިން ފުރުސަތެއްގަ އެވެ.

މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ރަފީނިއާ ވަނީ އިތުރު ލަނޑެއް ޖަހައި ބާސެލޯނާ އަަށް ފަސް ލަނޑުގެ މޮޅެއް ހޯދައިދީފަ އެވެ. އެ ލަނޑު ޖަހަން ވެސް ރަފީނިއާ އަށް ފުރުސަތު ތަނަވަސްކޮށްދިނީ ބާގްދީ އެވެ. 

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނެފައި ވަނީ، އެ މެޗުގައި ބާސެލޯނާގެ ކުޅުންތެރިންގެ ފަރާތުން ފެނުނީ ވަރަށް ރަނގަޅު ޓީމު ވޯކެއް ކަމަށެވެ. އޭނާ ބުނީ ކުޅުންތެރިންގެ ކުޅުމާ މެދު ހިތްހަމަ ޖެހޭ ކަމަށާއި، މެޗުގެ ނަތީޖާއާ މެދު މާ ބޮޑަށް ހިތްހަމަ ޖެހޭ ކަމަށެވެ. އަދި ބާސެލޯނާ އިން ފައިނަލް އަށް ދިޔުމާ އެކު، ފައިނަލަށް ނިކުންނާނީ އިތުރު ހިތްވަރާ އެކު ކަމަށް ފްލިކް ބުންޏެވެ.

މުބާރާތުގެ ފައިނަލްގައި ބާސެލޯނާ ވާދަ ކުރަން ޖެހޭނީ ދެ ވަނަ ސެމީ ފައިނަލްގައި އެތުލެޓިކޯ މެޑްރިޑް އާއި ރެއާލް މެޑްރިޑް ބައްދަލު ކުރާ މެޗުން މޮޅުވާ ޓީމަކާ ދެކޮޅަށެވެ. އެންމެ ފަހުން ބާސެލޯނާ އިން ސުޕަ ކަޕް ކާމިޔާބު ކުރީ ރެއާލް ބަލިކޮށްގެންނެވެ. ބާސެލޯނާ އިން 15 ފަހަރު މުބާރާތް ކާމިޔާބު ކޮށްފައިވާއިރު، ބާސެލޯނާ އަކީ މުބާރާތުގެ އެންމެ ކާމިޔާބު ޓީމެވެ.