ރަޝްފޯޑު ބޭނުން ވަނީ ބާސެލޯނާގައި ހުންނަން

އޭނާ ބޭނުން ވަނީ މުސްތަޤުބަލުގައި ވެސް ބާސެލޯނާގައި ހުންނަން ކަމަށް، އެ ޓީމަށް ކުޅެމުން އަންނަ އިންގްލެންޑުގެ މާކަސް ރަޝްފޯޑު ބުނެފި އެވެ.

އުމުރުން 28 އަހަރުގެ ކުޅުންތެރިޔާ ބާސެލޯނާ އަށް ބަދަލުވީ މިއަހަރުގެ ޖުލައި މަހުގެ ތެރޭގަ އެވެ. އޭނާ ބާސެލޯނާ އަށް ބަދަލުވީ އެއް އަހަރު ދުވަހުގެ ލޯނު އެއްބަސްވުމެއްގެ ދަށުންނެވެ. ނަމަވެސް، ބާސެލޯނާ އިން ބޭނުންވާ ނަމަ ލޯނު އެއްބަސްވުން ހަމަވުމުން ރަޝްފޯޑުގެ އެއްބަސްވުން ދާއިމޫ ކުރެވޭނެ އެވެ. އެގޮތުން 30.3 މިލިއަން ޕައުންޑު ދެއްކުމަށް ފަހު، ރަޝްފޯޑުގެ އެއްބަސްވުން ދާއިމީ ކުރެވޭނެ އެވެ.

ބާސެލޯނާއާ ގުޅޭ ގޮތުން ވާހަކަ ދައްކަމުން ރަޝްފޯޑު ބުނެފައި ވަނީ، އޭނާ ބާސެލޯނާގައި ހުރީ ހިތްހަމަ ޖެހިގެން ކަމަށެވެ. އެގޮތުން އޭނާ ބޭނުން ވަނީ ބާސެލޯނާގައި ހުންނަން ކަމަށާއި، އޭނާ ގެ މުސްތަޤުބަލުގައި ބޭނުން ވަނީ ވެސް ބާސެލޯނާ އަށް ކުޅެން ކަމަށް ރަޝްފޯޑު ބުންޏެވެ. އެކަން ފާހަގަ ކުރަމުން ރަޝްފޯޑު ބުނީ، އޭނާ ގެ އެންމެ ބޮޑު އަމާޒަކީ ވެސް އެއީ ކަމަށެވެ.

ބާސެލޯނާ އަކީ ވަރަށް ބޮޑު ޓީމެއް ކަމަށާއި، އެއީ ވަރަށް މޮޅު ޓީމެއްކަން ފާހަގަކޮށް ރަޝްފޯޑު ބުނީ، ބާސެލޯނާ އަކީ މޮޅުވުމާއި ތަށިތައް ކާމިޔާބު ކުރުމުގެ ޓީމެއް ކަމަށެވެ. އެހެންކަމުން އޭނާ ވެސް ބޭނުން ވަނީ ބާސެލޯނާ އާއެކު ކާމިޔާބީތައް ހޯދައި، މޮޅުވާން ކަމަށް ރަޝްފޯޑު ބުންޏެވެ. އެކަން ހާސިލު ކުރުމަށް ބާސެލޯނާގައި ވަރަށް ބުރަކޮށް މަސައްކަތް ކުރަމުން އަންނަ ކަމަށް ރަޝްފޯޑު ބުންޏެވެ. 

ރަޝްފޯޑު ވަނީ މިހާތަނަށް ބާސެލޯނާ އަށް ކުޅެދިން 24 މެޗުގައި ހަތް ލަނޑު ޖަހައިފަ އެވެ. ބާސެލޯނާގައި ރަޝްފޯޑު ރަނގަޅު ކުޅުމެއް ދައްކަމުން އަންނައިރު، އެ ޓީމުގެ ކޯޗު ހަންސީ ފްލިކް ވެސް އަންނަނީ ރަޝްފޯޑަށް ފުރުސަތު ދެމުންނެވެ. މީގެ ކުރިން ފްލިކް ބުނެފައި ވަނީ، ރަޝްފޯޑަކީ ބާސެލޯނާގެ ވައްޓަފާޅިއާ ގުޅޭ ކުޅުންތެރިޔެއް ކަމަށެވެ.

މެންޗެސްޓަރ ޔުނައިޓެޑުން ސީނިއާ ކެރިއަރު ފެށި ރަޝްފޯޑު ވަނީ، ލޯނު އެއްބަސްވުމެއްގެ ދަށުން އެސްޓަން ވިލާ އަށް ވެސް ކުޅެފަ އެވެ. ލޯނު އެއްބަސްވުމެއްގެ ދަށުން ރަޝްފޯޑު ދޫކޮށްލަން ޔުނައިޓެޑުން ނިންމީ، އޭނާ އަށް އެ ކުލަބުގައި އެކަށީގެންވާ ފެންވަރުގެ ކުޅުމެއް ނުދެއްކޭތީ އެވެ.