ކަންސޭލޯ ހޯދުމަށް ބާސެލޯނާ އާއި އިންޓަރ އިން މަސައްކަތް ކުރަނީ

ސައުދީ ޕްރޯ ލީގުގެ އަލް ޙިލާލް އަށް ކުޅެމުން އަންނަ ޕޯޗުގަލްގެ ޔާއޯ ކަންސޭލޯ ހޯދުމުގެ މަސައްކަތް، ސްޕެއިންގެ ބާސެލޯނާ އާއި އިޓަލީގެ އިންޓަރ މިލާން އިން ކުރަމުން އަންނަ ކަމަށް ރިޕޯޓު ކޮށްފި އެވެ.

އުމުރުން 31 އަހަރުގެ ކުޅުންތެރިޔާ އަލް ޙިލާލް އަށް ބަދަލުވީ 2024 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. ނަމަވެސް، އެއްބަސްވުމުގެ މުއްދަތު ހަމަވުމުގެ ކުރިން އަލް ޙިލާލް ދޫކޮށްލަން މިހާރު ކަންސޭލޯ ވަނީ ނިންމައިފަ އެވެ.

މީޑިއާ ތަކުގައި ބުނެފައިވާ ގޮތުން ކަންސޭލޯ ހޯދުމުގެ ޝައުޤުވެރިކަން ބާސެލޯނާ އާއި އިންޓަރ އިން ގެންގުޅެ އެވެ. އެގޮތުން ފާއިތުވި 24 ގަޑިއިރުގެ ތެރޭގައި ބާސެލޯނާ އާއި އިންޓަރ އިން ވެސް ވަނީ، ކަންސޭލޯގެ އެޖެންޓާ ވާހަކަ ދައްކައި މަޝްވަރާ ކޮށްފައި ކަމަށް ބުނެފައިވެ އެވެ. 

އެގޮތުން އިންޓަރ އިން ކަންސޭލޯ ހޯދުމަށް ވަރަށް ބޮޑަށް ބޭނުންވާއިރު، ބާސެލޯނާ އިން އެ ކުލަބުގެ ތެރޭގައި ވެސް މަޝްވަރާތައް ކުރިއަށް ގެންދަމުން އަންނަ ކަމަށް ބުނެފައިވެ އެވެ. މީގެ ކުރިން ކަންސޭލޯ ވަނީ ލޯނު އެއްބަސްވުމެއްގެ ދަށުން ވެސް އިންޓަރ އާއި ބާސެލޯނާ އަށް ވެސް ކުޅެފަ އެވެ. ބާސެލޯނާގެ ލޯނު އެއްބަސްވުން ހަމަވުމުން ދެން އޭނާ ބަދަލުވީ އަލް ޙިލާލް އަށެވެ. 

އެކި އެކި މީޑިއާ ތަކުގައި ބުނެފައިވާ ގޮތުން އަލް ޙިލާލް ދޫކޮށްލަން ކަންސޭލޯ ބޭނުން ވަނީ، އެ ޓީމުގެ ކޯޗު ސިމޯން އިންގާޒީއާ ދެމެދު އޮތް ނުތަނަވަސް ކަމެއްގެ ތެރޭގަ އެވެ. އެގޮތުން ބިދޭސީ ކުޅުންތެރިން ރަޖިސްޓްރީ ކުރުމުގެ ލިމިޓުގެ ހަނި ކަމުގެ ސަބަބުން، ކަންސޭލޯ ރަޖިސްޓްރީ ނުކުރަން އިންޒާގީ ނިންމާފައިވާ ކަމަށް ބުނެފައިވެ އެވެ. މީގެ އިތުރުން، ކަންސޭލޯ ބޭނުން ވަނީ އަނެއްކާ ވެސް ޔޫރަޕުގެ ފުޓުބޯޅަ އަށް އެނބުރި އަންނަން ކަމަށް ވެސް ބުނެފައިވެ އެެވެ. 

ބެންފީކާ އިން ސީނިއާ ކެރިއަރު ފެށި ކަންސޭލޯ ވަނީ، ވެލެންސިއާ، އިންޓަރ މިލާން، ޔުވެންޓަސް، މެންޗެސްޓަރ ސިޓީ، ބަޔާން މިއުނިކްގެ އިތުރުން ބާސެލޯނާ އަށް ވެސް ކުޅެފަ އެވެ. އަލް ޙިލާާލް އަށް ބަދަލުވެ އޭނާ ވަނީ އެ ކުލަބަށް ކުޅެދިން 45 މެޗުގައި ތިން ލަނޑު ޖަހައިފަ އެވެ. 

މީގެ އިތުރުން ބައެއް މީޑިއާ ތަކުގައި ބުނެފައި ވަނީ، އަލުން އެނބުރި ޔޫރަޕުގެ ފުޓުބޯޅަ އަށް އަންނަން ކަންސޭލޯ ބޭނުން ވަނީ ޤައުމީ ޓީމުގެ ޖާގަ ކަށަވަރު ކުރުމަށެވެ. އެގޮތުން މިއަހަރު އޮންނަ ފީފާ ވޯލްޑް ކަޕަށް އެކުލަވާލައި ޕޯޗުގަލްގެ ސްކޮޑުން ޖާގަ ހޯދުމަށް ކަންސޭލޯ ރަނގަޅު ކުޅުމެއް ދައްކަން ޖެހޭއިރު، އޭނާ އަށް ފުރުސަތު ބޮޑީ ޔޫރަޕުގައި ކުޅެގެން ކަމަށް ވެސް ވަނީ ފާހަގަ ކޮށްފަ އެވެ.