އޮސަސޫނާ ބަލިކޮށް، ބާސެލޯނާާ އިން ލީޑު ފުޅާ ކޮށްފި

ސްޕެނިޝް ލީގުގައި އޮސަސޫނާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެއް ވަނައިގައި ލީޑު ފުޅާ ކޮށްފި އެވެ.

ބާސެލޯނާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި ބާސެލޯނާ އިން އެ ޓީމުގެ ދެ ލަނޑު ވެސް ޖެހީ، މެޗުގެ ދެ ވަނަ ހާފުގަ އެވެ.

މެޗު ފަށައިގެން 23 ވަނަ މިނެޓުގައި ބާސެލޯނާގެ ފެރާން ޓޮރޭސް ލަނޑު ޖަހައި އެ ޓީމަށް ލީޑު ނަގައިދިން ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު ރެފްރީ ވަނީ އެ ލަނޑު ބަލައި ނުގަންނަން ނިންމައިފަ އެވެ. އެއީ އޮފްސައިޑުގައި ހުރި ކަމަށް ނިންމައިގެންނެވެ.

މެޗުގެ 70 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ބްރެޒިލްގެ ރަފީނިއާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޕެޑްރީ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ރަފީނިއާ ވަނީ އިތުރު ލަނޑެއް ޖަހައި ބާސެލޯނާގެ ލީޑު ފުޅާ ކޮށްފަ އެވެ.

މޮޅާއެކު ބާސެލޯނާ އިން ވަނީ އެއް ވަަނައިގައި ހަތް ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 17 މެޗުން ބާސެލޯނާ އަށް ލިބެނީ 43 ޕޮއިންޓެވެ. ބާސެލޯނާ އަށް ވުރެ އެއް މެޗު މަދުން ކުޅެގެން ދެ ވަަނައިގައި ރެއާލް މެޑްރިޑަށް ލިބެނީ 36 ޕޮއިންޓެވެ. ނަމަވެސް، މެޗުގެ އަދަދު ހަމަކޮށް ފަރަގު ކުޑަ ކުރުމުގެ ފުރުސަތު ރެއާލް އަށް އޮންނާނެ އެވެ.

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނެފައި ވަނީ، ބާސެލޯނާ އިން އެ މެޗުގައި ރަނގަޅު ކުޅުމެއް ދެއްކި ކަމަށާއި، މިހާރު އެ ޓީމު ކުޅެމުން އަންނަނީ ރަނގަޅު ފެންވަރެއްގައި ކަމަށެވެ. ޚާއްސަކޮށް ބާސެލޯނާ އިން އެ މެޗު ވަރަށް ރަނގަޅަށް ކޮންޓްރޯލް ކޮށްގެން ކުޅުނު ކަމަށާއި، ޑިފެންސްގައި ވެސް ކުޅުންތެރިން ރަނގަޅު ކުޅުމެއް ދެއްކި ކަމަށް އޭނާ ބުންޏެވެ.

އޭނާ ބުނީ ބާސެލޯނާ އަށް އެންމެ މުހިންމީ އެ ޓީމުގެ ކުޅުން ދަމަހައްޓައި، ފެންވަރު ދެމެހެއްޓުން ކަމަށެވެ. ޚާއްސަކޮށް ލީގުގައި ބާކީ އޮތް ތަނުގައި އިތުރު ޗެލެންޖުތައް ކުރިމަތި ވާނެ ކަމަށާއި، އެކަންކަމާ ކުރިމަތިލާން ޖެހޭނީ ހިތްވަރާ އެކު ކަމަށް ފްލިކް ބުންޏެވެ. އިތުރަށް ފްލިކް ބުނީ، ޓީމުގައި ރަނގަޅު ކުރަން ޖެހޭ ކަންކަން ހުރި ކަމަށާއި، ކުރިއަށް އޮތް ތަނުގައި ވެސް އެކަން ކަމަށް މަސައްކަތް ކުރާނެ ކަމަށެވެ. 

ބާސެލޯނާގެ އަމިއްލަ ދަނޑުގައި އަލުން ކުޅެން ފަށާފައިވާއިރު، އެކަމަށް އިޝާރާތް ކުރަމުން ފްލިކް ބުނީ އެކަމަކީ ޓީމުގެ ކުޅުންތެރިން އަދި އެންމެހާ ސަޕޯޓަރުންނަށް ވެސް އިތުރު ހިނިތުންވުމެއް ގެނެސްދޭ ކަމެއް ކަމަށެވެ.