ރަޝްފޯޑުގެ ލަނޑުން މޮޅުވެ، ބާސެލޯނާ ގަދަ 16 އަށް

ސްޕެނިޝް ކޮޕަ ޑެލް ރޭގައި ގުއަޑަލަޖަރާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

އަންގާރަ ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 2-0 އިންނެވެ. މެޗުގައި ބާސެލޯނާ އިން އެ ޓީމުގެ ދެ ލަނޑު ވެސް ޖެހީ މެޗުގެ ފަހު ހާފުގަ އެވެ.

މެޗުގެ ފުރަތަމަ ހާފުގައި ވެސް ބާސެލޯނާ އިން ވަނީ ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. ނަމަވެސް، ލަމީން ޔަމާލް އާއި ފާމިން ލޮޕޭޒް އަށް ވެސް ލިބުނު ފުރުސަތުގެ ބޭނުން ކުރެވޭ ގޮތެއް ނުވި އެވެ. 

ބާސެލޯނާ އިން މެޗުގައި ލަނޑު ޖަހައި ލީޑު ނެގީ މެޗުގެ 76 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ އެންޑްރިއަސް ކްރިސްޓެންސަން އެވެ. އޭގެ ފަހުން މެޗުގެ ފަހު ވަގުތުގައި މާކަސް ރަޝްފޯޑު ވަނީ ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނެފައި ވަނީ، އެ މެޗުގައި ބާސެލޯނާގެ ކުޅުންތެރިން ދެއްކި ކުޅުމާ މެދު ހިތްހަމަ ޖެހޭ ކަމަށެވެ. އޭނާ ބުނީ ފުރަތަމަ ހާފުގައި ވެސް ބާސެލޯނާ އިން ރަނގަޅަށް ކުޅެފައިވާ ކަމަށާއި، ލަނޑު ޖަހަން ލިބުނު ފުރުސަތު ނިންމާނުލެވުނީ ކަމަށެވެ. 

އެއާ ޚިލާފަށް ދެ ވަނަ ހާފުގައި ބާސެލޯނާ އިން އިތުރު ހިތްވަރެއްކޮށް ދެ ލަނޑު ޖެހިކަން އޭނާ ފާހަގަ ކުރި އެވެ. އެއާ އެކު ފްލިކް ވަނީ، މެޗުގައި ބާސެލޯނާގެ ފުރަތަމަ ލަނޑު ޖެހި ކްރިސްޓެންސަން އަށް ވަރަށް ބޮޑަށް ތައުރީފު ކޮށްފަ އެވެ. ފްލިކް ބުނީ މެޗުގައި ކްރިސްޓެންސަން ވަރަށް ރަނގަޅު ކުޅުމެއް ދެއްކި ކަމަށާއި، ޑިފެންސްގައި އޭނާ ވަނީ ތަފާތު ހިތްވަރެއް ދައްކާފައި ކަމަށެވެ.

މެޗުގައި ބާސެލޯނާގެ ފުރަތަމަ ލަނޑު ކްރިސްޓެންސަން ޖެހި ފަހުން، އެ ޓީމަށް އިތުރު ރޫޙެއް އައި ކަަމަށް ފްލިކް ފާހަގަ ކުރި އެވެ. އޭނާ ބުނީ ކޮންމެ ކުޅުންތެރިޔަކު ވެސް، އެ ކުޅުންތެރިޔެއްގެ އެންމެ ރަނގަޅު ކުޅުން ދައްކައި، އެންމެ ފުރިހަމަ މަސައްކަތް ކުރުމަށް އަމާޒު ކޮށްފައިވާ ކަމަށެވެ. 

އެކަން ފާހަގަކޮށް ފްލިކް ބުނީ ބާސެލޯނާ ކުރިއަށް ދަނީ ރަނގަޅަށް ކަމަށާއި، ހަރުފަތަކުން ހަރުފަތަކުން ކަންކަން ރަނގަޅު ވާނެ ކަމަށެވެ. އަދި ބާސެލޯނާގައި އެ ހިތްވަރާއި، ފެންވަރު ހުންނާނެކަން ފާހަގަކޮށް ފްލިކް ބުނީ، ޓީމާ މެދު އޭނާ ހިތްހަމަ ޖެހޭ ކަމަށެވެ.