އޮޑި ބަލިކޮށް، މާޒިޔާ އިން ވިމަންސް ލީގު ކާމިޔާބު ކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދިޔަ، އެފްއޭއެމް ވިމަންސް ލީގުގެ ޗެމްޕިއަންކަން މާޒިޔާ ސްޕޯޓްސް އެންޑް ރެކްރިއޭޝަން އިން ހޯދައިފި އެވެ. 

ލީގުގެ ޗެމްޕިއަންކަން މާޒިޔާ އިން ހޯދީ އަންގާރަ ދުވަހުގެ ހަވީރު ކުޅުނު މެޗުގައި އޮޑި ސްޕޯޓްސް ކުލަބުގެ މައްޗަށް ކުރި ހޯދައިގެންނެވެ. އެ މެޗު މާޒިޔާ އިން ކާމިޔާބު ކުރީ 2-0 އިންނެވެ. މެޗުގައި މާާޒިޔާ އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެގޮތުން ދެ ވަނަ ހާފު ފަށައިގެން ހަތަރު ވަނަ މިނެޓުގައި މާޒިޔާ އަށް ލީޑު ނަގައިދިނީ ބިދޭސީ ކުޅުންތެރިޔާ ރޭކާ ޕޮއުޑެލް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި މާޒިޔާގެ ދެ ވަނަ ލަނޑު ޖަހައި ލީޑު ފުޅާ ކުރީ ބިދޭސީ ކުޅުންތެރިޔާ ދީޕާ ޝާހީ އެވެ.

މޮޅާ އެކު މާޒިޔާ އިން ވިމަންސް ލީގު ކާމިޔާބު ކުރީ އެއްވެސް މެޗަކުން ބަލި ނުވެ އެވެ. އެއް ވަަނައިގައި މާާޒިޔާ އަށް 13 ޕޮއިންޓު ލިބުނު އިރު، ދެ ވަނަ އަށް ދިޔަ އޮޑި ސްޕޯޓްސް ކުލަބަށް ލިބުނީ 10 ޕޮއިންޓެވެ. ހަ ޓީމު ވާދަ ކުރި ލީގުގެ ތިން ވަނަ އަށް ދިޔަ ވިކްޓްރީ ސްޕޯޓްސް ކުލަބަށް އަށް ޕޮއިންޓު ލިބޭއިރު، ހަތަރު ވަނައިގައި ނިއު ރޭޑިއަންޓް ސްޕޯޓްސް ކުލަބަށް ލިބެނީ އަށް ޕޮއިންޓެވެ. ފަސް ވަނަ ޓީސީ ސްޕޯޓްސް ކުލަބަށް ލިބުނުއިރު، ހަ ވަނަ އަށް ދިޔައީ ބިސް ބުރު ސްޕޯޓްސް ކުލަބެވެ.

ލީގުގެ އެންމެ މޮޅު 11 ކުޅުންތެރިންގެ ތެރޭގައި ހިމެނުނީ ޗެމްޕިއަން މާޒިޔާގެ ޝައްފަ ސިއުތު، ދީޕާ، އައިޝަތު ލީޒާ، ޕޮއުޑެލްގެ އިތުރުން އޮޑީގެ ފާތިމަތު ސާލިޔާ، ނަސްތާސިއާ ސުސީ ރަމްދާނީ، އިންޝާ އާދަމް، ފިރުޝާނާ ނަސީރު އަދި ވިކްޓްރީގެ ލޭލާ ރަމެޝޮވްނާ އާއި ސަފީނާ ރުޝާނިޔާ އާއި ނިއު ރޭޑިއަންޓްގެ މައީޝާ ޢަބްދުލް ހަންނާން އެވެ. 

ނުވަ ލަނޑު ޖަހައިގެން މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ ވިކްޓްރީގެ ލޭލާ އެވެ. މުބާރާތުގެ އެންމެ މޮޅު ބިދޭސީ ކުޅުންތެރިޔަކަށް ހޮވުނީ މާޒިޔާގެ ޕައުޑެލް އެވެ. އަދި އެންމެ މޮޅު ދިވެހި ކުޅުންތެރިޔަކަށް ހޮވުނީ އޮޑީގެ ޝާލިޔާ އެވެ. އެންމެ އުންމީދީ ކުޅުންތެރިޔަކަށް ހޮވުނީ ވިކްޓްރީގެ އައިޝަތު ޝަހާ ޝަރީފް އެވެ. 

އެފްއޭއެމް އިން މިފަހަރު ވިމަންސް ލީގު ބާއްވާފައިވާއިރު، މިއީ ދިގު މުއްދަތެއްގެ މެދު ކެނޑުމަކަށް ފަހު އެފްއޭއެމް އިން އަންހެން މުބާރާތް ބޭއްވި ފުރަތަމަ ފަހަރެވެ.