ވެނެޒުއެލާގެ ވެރިކަމާ ހަވާލުވާން ޖެހޭނީ އަހަރެން: މަޗާޑޯ

ވެނެޒުއެލާގެ ވެރިކަމާ ހަވާލުވާން ޖެހޭނީ އޭނާ ކަމަށް، އެ ޤައުމުގެ އިދިކޮޅު ލީޑަރު މަރީއާ ކޮރީނާ މަޗާޑޯ ވިދާޅުވެއްޖެ އެވެ.

މިދިޔަ އަހަރުގެ ނޯބެލް ސުލްޙައިގެ އިނާމު ވެސް ލިބިވަޑައިގެންފައިވާ މަޗާޑޯ މިހެން ވިދާޅުވެފައި ވަނީ، ވެނެޒުއެލާގެ ސިޔާސީ މުސްތަޤުބަލަށް ބޮޑު ސުވާލެއް ކުރިމަތިވެފައި ވަނިކޮށެވެ. އެގޮތުން އެމެރިކާ އިން ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކޮށްފައިވާއިރު، އެ ޤައުމުގެ ނައިބު ރައީސް ޑެލްސީ ރޮޑްރިގޭޒް ވަނީ ވަގުތީ ރައީސް ކަމުގެ ހުވާ ކުރައްވައިފަ އެވެ. 

ބީބީސީއާ ވާހަކަ ދައްކަވަމުން މަޗާޑޯ ވިދާޅުވެފައި ވަނީ، އޭނާގެ ޓީމުން އޮތީ ވެނެޒުއެލާގެ ރައްޔިތުންނަށް ޚިދުމަތް ކުރުމަށް ތައްޔާރަށް ކަމަށެވެ. އަދި އެކަން ކުރުމުގެ ފުރިހަމަ މެންޑޭޓް އެ މީހުންގެ ކިބައިގައި އޮތް ކަމަށް ވެސް މަޗާޑޯ ވަނީ ވިދާޅުވެފަ އެވެ. މިއީ މަދޫރޯ ހައްޔަރު ކުރި ފަހުން މަޗާޑޯ މި ފަދަ ވާހަކައެއް ދައްކަވާފައިވާ ފުރަތަމަ ފަހަރެވެ. 

އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް އެމެރިކާގެ އަސްކަރިއްޔާ އިން މަދޫރޯ އާއި އޭނާގެ އަނބިކަނބަލުން ހައްޔަރު ކޮށްފައިވާއިރު، މަޗާޑޯ ވަނީ އެމެރިކާގެ ރައީސް ޓްރަމްޕްގެ ހިތްވަރާއި، ލީޑާޝިޕް އަށް ޝުކުރު އަދާ ކުރައްވައިފަ އެވެ. އަދި އޭނާ ވިދާޅުވީ މަދޫރޯގެ ބައިވެރިންނަށް އިންތިޤާލީ ސަރުކާރު ހިންގުމުގެ އެއްވެސް ފުރުސަތެއް އޮވެގެން ނުވާނެ ކަމަށެވެ. 

މަޗާޑޯ އާއި އޭނާގެ ބައިވެރިން ބުނަމުން ގެންދަނީ، 2024 ވަނަ އަހަރު އޮތް ވެނެޒުއެލާގެ އިންތިޚާބު ކާމިޔާބު ކޮށްފައި ވަނީ އެ މީހުން ކަމަށެވެ. ނަމަވެސް، އެކަމަށް ޓްރަމްޕް ތާއީދު ކުރައްވާފައި ނުވެ އެވެ. ޓްރަމްޕް ވިދާޅުވަމުން ގެންގޮސްފައި ވަނީ، މަޗާޑޯ އަކީ ވެނެޒުއެލާގެ ރައްޔިތުންްގެ ތާއީދު އޮތް ފަރާތެއް ނޫން ކަމަށެވެ. 

މީގެ ކުރިން ޤާނޫނު ހަދާ މަޖިލީހުގެ މެމްބަރެއްގެ ގޮތުގައި ވެސް ހުންނެވި މަޗާޑޯ ވިދާޅުވެފައި ވަނީ، މިދިޔަ ހަފުތާ ބަންދުގެ ތެރޭގައި ވެނެޒުއެލާގައި އެމެރިކާ އިން އަޅާފައިވާ ފިޔަވަޅު ތަކަކީ، ޤައުމުގެ ކުރިއެރުމާއި، ވެރިކަން އަދި ޑިމޮކްރަސީ އަލުން ޤާއިމު ކުރުމަށް އަޅާފައިވާ މުހިންމު ފިޔަވަޅެއް ކަމަށެވެ. 

މަޗާޑޯ ވިދާޅުވެފައި ވަނީ މިއަހަރުގެ ތެރޭގައި އެމެރިކާގެ ރައީސް ޓްރަމްޕް އާ، އޭނާ ވާހަކަ ދައްކަވާފައި ނުވާ ކަމަށެވެ. އެހެން ނަމަވެސް، މަދޫރޯ ހައްޔަރުކޮށް، ވެނެޒުއެލާގެ ވެރިކަމުން އޭނާ ދުރު ކުރި ކަމަށްޓަކައި ޓްރަމްޕް އަށް ޝުކުރު އަދާ ކުރައްވާ ކަމަށް ތަކުރާރުކޮށް ވިދާޅުވެފައިވެ އެވެ. 

ޓްރަމްޕް އަށް ތާއީދު ކުރައްވާ މޭރުމުން މަޗާޑޯ ވާހަކަ ދައްކަވާފައި ވީ ނަމަވެސް، ޓްރަމްޕް ވިދާޅުވެފައި ވަނީ މަޗާޑޯ އަކީ މަދޫރޯގެ ފަހަތުން އެ ވެނެޒުއެލާ ހިންގަން އެކަށީގެންވާ ލީޑަރެއް ނޫން ކަމަށެވެ. މީގެ ކުރިން އޮތް ނޫސްވެރިންގެ ބައްދަލުވުމެއްގައި ޓްރަމްޕް ވިދާޅުވެފައި ވަނީ، ވެނެޒުއެލާ ލީޑު ކުރަން މަޗާޑޯ އަށް ވަރަށް އުނދަގޫ ވާނެ ކަމަށާއި، ވެނެޒުއެލާގަައި އޭނާ އަށް ތާއީދު އަދި އިޙުތިރާމު ނެތް ކަމަށެވެ. 

މަދޫރޯގެ ނައިބު ރައީސްގެ ގޮތުގައި ހުންނެވި ޑެލްސީ ރޮޑްރީގޭޒް ވަނީ ވެނެޒުއެލާގެ ވަގުތީ ރައީސް ކަމުގެ ހުވާ ކުރައްވައިފަ އެވެ. އެހެން ނަމަވެސް، މަޗާޑޯ ވިދާޅުވެފައި ވަނީ ޑެލްސީ ރޮޑްރިގޭޒް އަކީ އިތުބާރު ކުރެވޭ މީހެއް ނޫން ކަމަށެވެ. އަދި އޭނާ އަކީ ވެނެޒުއެލާގައި ބިރު ދެއްކުމުގެ ސިޔާސަތުތައް ރާވާފައިވާ މައިގަނޑު ފަރާތް ކަމަށް ވެސް އޭނާ ވިދާޅުވި އެވެ. މަޗާޑޯ ވިދާޅުވީ ޑެލްސީ ރޮޑްރިގޭޒް އަކީ، އަނިޔާވެރި އަދި ކޮރަޕްޓް މީހެއް ކަމަށެވެ.