މަދޫރޯ ހައްޔަރު ކުރި ފަހުން ލައިގެން ހުންނެވި ނައިކީ ޓްރެކްސޫޓަށް ޑިމާންޑް ބޮޑުވެ ބައެއް ފިހާރަތަކުން އެ ބާވަތުގެ ސޫޓް ހުސްވެއްޖެ
ވެނެޒުއޭލާގެ ރައީސް ނިކޮލަސް މަދޫރޯ އެމެރިކާ އިން ހައްޔަރުކުރުމަށްފަހު އާންމުވި ފޮޓޯގައި އޭނާ ލައިގެން ހުރި އަޅިކުލައިގެ ނައިކީ ޓެކް ޓްރެކްސޫޓަށް ޑިމާންޑް ވަރަށް ބޮޑަށް އިތުރުވެ މަދު ގަޑިއިރުތަކެއްގެ ތެރޭގައި ގިނަ ފިހާރަތަކުން މި ބާވަތުގެ ހެދުން ހުސްވި.
ޖެނުއަރީ 3، 2026 ގައި އެމެރިކާގެ ރައީސް ޑޮނަލްޑް ޓްރަމްޕްގެ ޓްރޫތް ސޯޝަލް އެކައުންޓްގައި ޝާއިއުކޮށްފައިވާ މި ފޮޓޯއިން ފެންނަނީ ވެނެޒުއެލާގެ ރައީސް ނިކޮލަސް މަދޫރޯ އެމެރިކާގެ އަސްކަރިއްޔާއިން އޭނާ އަތުލައިގަނެފައިވާ މަންޒަރު
އެމެރިކާގެ ސިފައިން ވެނެޒުއޭލާގެ ރައީސް ނިކޮލަސް މަދޫރޯ ހައްޔަރުކުރި ފަހުން، އޭނާ "ނައިކީ ޓެކް" ޓްރެކްސޫޓެއް ލައިގެން ހުއްޓާ ފެންނަ ފޮޓޯތަކެއް އާންމުވުމާ ގުޅިގެން، އެ ބާވަތުގެ ހެދުމަށް އޮތް ޑިމާންޑް އިންތިހާ އަށް އިތުރުވެފައިވާ ކަމަށް އޮންލައިން ވިޔަފާރިކުރާ ފަރާތްތަކުން ރިޕޯޓުކޮށްފި އެވެ. އަދި މަދު ގަޑިއިރުތަކެއްގެ ތެރޭގައި ގިނަ ފިހާރަތަކުން މިބާވަތުގެ ހެދުން މުޅިން ހުސްވެފައިވާ ކަމަށް ވެސް މީޑިއާ ރިޕޯޓުތައް ބުނެ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ މަދޫރޯ ކަނުބަދެ، އުޅަނދެއްގެ މަތީގައި ބަންދުކޮށްފައި ހުއްޓާ ފެންނަ ފޮޓޯއެއް އާންމުކުރައްވާފަ އެވެ. އެ ފޮޓޯ އިން ފެންނަ ގޮތުގައި އޭނާ ހުންނެވީ އަޅިކުލައިގެ "ނައިކީ ޓެކް" ހެދުމެއްގަ އެވެ.
މީޑިއާ ރިޕޯޓުތައް ބުނާގޮތުގައި މަދޫރޯ ހައްޔަރު ކުރީ ފަތިސް ވަގުތެއްގައި އޭނާ ނިދާފައި އޮއްވާ ކުއްލި ގޮތަކަށް ހިންގި އޮޕަރޭޝަނެއްގަ އެވެ. އަދި ހައްޔަރުކުރި ވަގުތު އެންމެ ފުރަތަމަ އޭނާ ފެނުނީ އާދައިގެ ހެދުމެއްގަ އެވެ.
މަދޫރޯ ހައްޔަރުކުރުމާއި އެމެރިކާ އިން ދިން ހަމަލާއާ ގުޅިގެން ވެނެޒުއޭލާގެ ރައްޔިތުންނާއި ބައިނަލްއަގުވާމީ މުޖުތަމައުގެ މެދުގައި އެކި ކަހަލަ ޚިޔާލުތައް ހުރި ނަމަވެސް، އޭނާ ލައިގެން ހުންނެވި ހެދުން ޓިކްޓޮކް އާއި އިންސްޓަގްރާމް ފަދަ މަންސަތަކުގައި "މީމް" ތަކާއި ވީޑިއޯތަކުގެ މައިގަނޑު މައުޟޫއު އަށް ވެގެންދިޔަ އެވެ.
ގޫގުލް ޓްރެންޑްސް އިން ދައްކާ ގޮތުގައި، މި ފޮޓޯތައް އާންމުވުމާ އެކު "ނައިކީ ޓެކް" ސާޗްކުރާ މިންވަރު ވަރަށް ބޮޑަށް އިތުރުވި އެވެ. މީގެ އިތުރުން ސޯޝަލް މީޑިއާ ގައި މި ހެދުމުގެ ސްކްރީންޝޮޓްތަކާއި ލިންކުތައް ވަނީ ހަލުވިކަމާ އެކު ފެތުރިފަ އެވެ.
މަދޫރޯ ލައިގެން ހުންނެވި އަޅިކުލައިގެ "ނައިކީ ޓެކް ފްލީސް" ޓްރެކްސޫޓަކީ، ބާޒާރުގައި އާންމުކޮށް 240 އާއި 270 ޑޮލަރާ ދެމެދުގެ އަގަކަށް ވިއްކާ ހެދުމެކެވެ.
