ވެނެޒުއޭލާ އާ ގުޅުން އޮތް ކަމަށް ބުނާ ރަޝިޔާގެ ދިދަ ނެގި ތެޔޮ ޓޭންކަރު އެމެރިކާ ސިފައިން ހިފައިފި
7 ޖެނުއަރީ 2026 | ބުދަ 14:41ކުރިން ބެލާ 1 ގެ ނަމުން ނަންދެވިފައިވާ މި އުޅަނދަކީ ގަވާއިދާ ހިލާފަށް ތެޔޮ އުފުލުމުގައި ބޭނުންކުރާ ޝެޑޯ ފްލީޓް އެއްގައި ހިމެނޭ އުޅަނދެއް ކަމަށް އެމެރިކާ އިން ބުނޭ. އެޓްލާންޓިކް ކަނޑުގައި ދެ ހަފުތާއަށް ވުރެ ގިނަ ދުވަހު ފަހަތުން ދަތުރުކުރުމަށްފަހު އެމެރިކާގެ ސިފައިން މި އުޅަނދަށް އެރީ ބުދަ ދުވަހު.
އެމެރިކާގެ ފެޑެރަލް ކޯޓަކުން ނެރުނު އަމުރެއްގެ ދަށުން އެމްވީ ބެލާ 1 އުޅަނދު އުތުރު އެޓްލާންޓިކް ކަނޑުން ވަނީ އަތުލައިގަނެފައި | ޔޫއެސް ޔޫރަޕިއަން ކޮމާންޑް
ވެނެޒުއޭލާ އާ ގުޅުން އޮތް ކަމަށް ބުނާ ރަޝިޔާގެ ދިދަ ނެގި ތެޔޮ ޓޭންކަރު އެމެރިކާ ސިފައިން ހިފައިފި އެވެ.
އެމެރިކާގެ ޔޫރަޕިއަން ކޮމާންޑުން ސޯޝަލް މީޑިއާގައި ހާމަކޮށްފައިވާ މައުލޫމާތަށް ބަލާއިރު، އެޓްލާންޓިކް ކަނޑު ހުރަސްކޮށް ދަތުރުކުރަނިކޮށް، ވެނެޒުއޭލާ އާ ގުޅުން އޮތް ކަމަށް ބުނާ ތެޔޮ ޓޭންކަރެއް އެމެރިކާގެ ބާރުގެ ދަށަށް ވަނީ ގެނެސްފައެވެ.
ކުރިން "ބެލާ 1" ގެ ނަމުން ނަންދެވިފައިވާ މި އުޅަނދަކީ، ގަވާއިދާ ހިލާފަށް ތެޔޮ އުފުލުމުގައި ބޭނުންކުރާ "ޝެޑޯ ފްލީޓް" އެއްގައި ހިމެނޭ އުޅަނދެއް ކަމަށް ބުނެ، 2024 ވަނަ އަހަރު އެމެރިކާ އިން ވަނީ މި އުޅަނދަށް ދަތިކުރުމުގެ ފިޔަވަޅު އަޅާފައެވެ.
ބޯޓުގެ ނަން މެރިނޭރާ އަށް ފަހުން ވަނީ ބަދަލު ކޮށްފަ އެވެ.
މި އުޅަނދު ހިފެހެއްޓި ޚަބަރު ބުދަ ދުވަހު އެންމެ ފުރަތަމަ ރިޕޯޓްކޮށްފައި ވަނީ ރޮއިޓާސް ނޫހުންނެވެ. އެ ނޫހުން ދެ މަސްދަރަކާ ހަވާލާދީ ބުނެފައިވާ ގޮތުގައި، މި އޮޕަރޭޝަން ހިންގާފައި ވަނީ އެމެރިކާގެ ކޯސްޓްގާޑާއި އަސްކަރިއްޔާ ގުޅިގެންނެވެ.
ނިމިދިޔަ މަހު ވެސް ވެނެޒުއޭލާ ކައިރިން މި ޓޭންކަރު ހިފެހެއްޓުމަށް އެމެރިކާގެ ކޯސްޓްގާޑުން މަސައްކަތް ކުރިއެވެ. ނަމަވެސް އެ ފަހަރު ޓޭންކަރުގެ މިސްރާބު ބަދަލުކޮށް ފިލުމުގެ ސަބަބުން، އުޅަނދަށް އެރުމަށް އެމެރިކާގެ ސިފައިން ކުރި މަސައްކަތް ވަނީ ނާކާމިޔާބުވެފަ އެވެ.
އެމެރިކާގެ ޔޫރަޕިއަން ކޮމާންޑުން ބުނީ ބޯޓު ހިފެހެއްޓީ ކޯޓު އަމުރެއްގެ ދަށުން ކަމަށެވެ.
ރަޝިޔާގެ ދައުލަތުގެ މީޑިއާ، އާރް.ޓީ އިން ބުދަ ދުވަހު ރިޕޯޓްކޮށްފައިވާ ގޮތުގައި، އެމެރިކާގެ އަސްކަރީ ބާރުތަކުން ދަނީ ވެނެޒުއޭލާއާ ގުޅުން އޮތް "މެރިނޭރާ" ނަމަކަށް ކިޔާ ތެޔޮ ޓޭންކަރަކަށް ހެލިކޮޕްޓަރެއް ބޭނުންކޮށްގެން އަރަން މަސައްކަތް ކުރަމުންނެވެ.
އަދި އެ އުޅަނދުގެ މަތީގައި ހެލިކޮޕްޓަރެއް އުދުހެމުންދާ މަންޒަރު ފެންނަ މަންޒަރު ވެސް އެ މީޑިއާ އިން ވަނީ އާންމުކޮށްފަ އެވެ.
އެމެރިކާގެ އޮފިޝަލަކު ރޮއިޓާސް އަށް މައުލޫމާތު ދިން ގޮތުގައި، އެޓްލާންޓިކް ކަނޑުގެ ސަރަހައްދުން ދެ ހަފުތާ އަށް ވުރެ ގިނަ ދުވަހު އެމެރިކާގެ ސިފައިން ވަނީ ޓޭންކަރުގެ ފަހަތުން ދަތުރު ކޮށްފަ އެވެ.
ރަޝިޔާގެ ޚާރިޖީ ވުޒާރާއާ ހަވާލާދީ އެގައުމުގެ ދައުލަތުގެ މީޑިއާތަކުން ބުނެފައި ވަނީ، މިހާރު ރަޝިޔާގެ ދިދަ ނަގާފައިވާ އެ އުޅަނދު ދަތުރުކުރަމުން ދަނީ ބައިނަލްއަގުވާމީ ކަނޑުގެ ސަރަހައްދުގައި ކަމަށާއި، އެ އުޅަނދުން އަމަލުކުރަމުން ދަނީ ބައިނަލްއަގުވާމީ ކަނޑުގެ ގާނޫނުތަކާ އެއްގޮތަށް ކަމަށެވެ. އަދި ކަނޑުދަތުރުފަތުރު ކުރުމުގެ މިނިވަންކަމަށް އިހުތިރާމް ކުރުމަށް ހުޅަނގުގެ ގައުމުތަކަށް ރަޝިޔާ އިން ވަނީ ގޮވާލާފައެވެ.
