ޑެލްސީ އަކީ އަނިޔާވެރި އަދި ކޮރަޕްޓް މީހެއް، ޤައުމަށް ވަރަށް އަވަހަށް ދާނަން: މަޗާޑޯ
6 ޖެނުއަރީ 2026 | އަންގާރަ 09:13އެގޮތުން ޑެލްސީ ރޮޑްރިގޭޒް އަކީ ވަރަށް އަނިޔާވެރި މީހެއް ކަމަށާއި، އޭނާ އަކީ ވަރަށް ބޮޑަށް ކޮރަޕްޓު ވެފައިވާ މީހެއް ކަމަށް މަޗާޑޯ ވިދާޅުވި. އަދި ނާޖާއިރު ގޮތުގައި އޭނާ ވަރަސް ގިނަ ކަންކަން ކުރައްވާ ކަމަށާއި، އޭނާ އަކީ މަސްތުވާ ތަކެތީގެ ވިޔަފާރި ރޭވުމުގައި މައިގަނޑު ދައުރެއް އަދާ ކުރާ މީހާ ކަމަށް ވެސް މަޗާޑޯ ވިދާޅުވެފައިވޭ.
ވެނެޒުއެލާގެ އިދިކޮޅު ލީޑަރު މަރީއާ ކޮރީނާ މަޗާޑޯ | ރޮއިޓަސް
ވެނެޒުއެލާގެ ވަގުތީ ރައީސް އަދި އެ ޤައުމުގެ ނައިބު ރައީސް ޑެލްސީ ރޮޑްރިގޭޒް އަކީ އަނިޔާވެރި މީހެއް ކަަމަށާއި، ވަރަށް އަވަހަށް އެނބުރި ޤައުމަށް ދާނެ ކަމަށް، ވެނެޒުއެލާގެ އިދިކޮޅު ލީޑަރު މަރީއާ ކޮރީނާ މަޗާޑޯ ވިދާޅުވެއްޖެ އެވެ.
މިިދިޔަ އަހަރުގެ ނޯބެލް ސުލްހައިގެ އިނާމު ވެސް ހާސިލު ކޮށްފައިވާ މަޗާޑޯ މިހެން ވިދާޅުވެފައި ވަނީ ހޯމަ ދުވަހު އެވެ. އޭނާ އެހެން ވިދާޅުވެފައި ވަނީ ގޮތް ނޭނގޭ ތަނެއްގައި ހުންނަވައި، ފޮކްސް ނިއުސްގެ ޝޯން ހެނިޓީއާ ވާހަކަ ދައްކަވަމުންނެވެ.
މިއީ އެމެރިކާ އިން ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކުރި ފަހުން، މަޗާޑޯ މިގޮތަށް ވާހަކަ ދައްކަވާފައިވާ ފުރަތަމަ ފަހަރެވެ. މަދޫރޯ ހައްޔަރު ކުރި ފަހުން ވެސް މަޗާޑޯ ވަނީ ސޯޝަލް މީޑިއާގައި ޕޯސްޓު ކުރައްވައިފަ އެވެ. އާންމުކޮށް ދެއްކެވި ފުރަތަމަ ވާހަކައިގައި މަޗާޑޯ ވިދާޅުވެފައި ވަނީ، ވަރަށް އަވަހަށް އެނބުރި ޤައުމަށް ވަޑައިގަންނަވާނެ ކަމަށެވެ.
މީގެ އިތުރުން މަޗާޑޯ ވަނީ ވެނެޒުއެލާގެ ވަގުތީ ރައީސް ޑެލްސީ ރޮޑްރިގޭޒް އަށް ވެސް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ޑެލްސީ ރޮޑްރިގޭޒް އަކީ ވަރަށް އަނިޔާވެރި މީހެއް ކަމަށާއި، އޭނާ އަކީ ވަރަށް ބޮޑަށް ކޮރަޕްޓު ވެފައިވާ މީހެއް ކަމަށް މަޗާޑޯ ވިދާޅުވި އެވެ. އަދި ނާޖާއިރު ގޮތުގައި އޭނާ ވަރަސް ގިނަ ކަންކަން ކުރައްވާ ކަމަށާއި، އޭނާ އަކީ މަސްތުވާ ތަކެތީގެ ވިޔަފާރި ރޭވުމުގައި މައިގަނޑު ދައުރެއް އަދާ ކުރާ މީހާ ކަމަށް ވެސް މަޗާޑޯ ވިދާޅުވެފައިވެ އެވެ.
ވެނެެޒުއެލާގެ ވަގުތީ ރައީސް ކަމުގެ ހުވާ ޑެލްސީ ރޮޑްރިގޭޒް ކުރައްވާފައިވާއިރު، އޭނާ އަކީ މަދޫރޯގެ ވަރަށް އަރިސް ބޭފުޅެކެވެ. ދާދި ފަހުން އޭނާ ވަނީ، ވެނެޒުއެލާ އިން އެމެރިކާއާ އެކު ގުޅިގެން މަސައްކަތް ކުރުމަށް ތައްޔާރަށް އޮތްކަން ދޭހަވާ މޭރުމަކުން ވާހަކަ ދައްކަވައިފަ އެވެ.
އިތުރަށް ވާހަކަ ދައްކަވަމުން މަޗާޑޯ ވިދާޅުވީ، ވެނެޒުއެލާގެ ރައްޔިތުން ޑެލްސީ ރޮޑްރިގޭޒް ޤަބޫލު ނުކުރައްވާ ކަމަށެވެ. އަދި ވެނެޒުއެލާގެ ރައްޔިތުން ތިބީ އެ ޤައުމުގެ އިދިކޮޅު ފަރާތްތަކާ އެކު ކަމަށް ވެސް މަޗާޑޯ ވަނީ ވިދާޅުވެފަ އެވެ. އެކަން ފާހަގަ ކުރައްވައި މަޗާޑޯ ވިދާޅުވެފައި ވަނީ، މިނިވަން އަދި އިންސާފުވެރި އިންތިޚާބެއް އޮވެއްޖެ ނަމަ، 90 އިންސަައްތަ އަށް ވުރެ ގިނަ ވޯޓު ކާމިޔާބު ކުރައްވާނެ ކަމަަށެވެ.
މަޗާޑޯގެ ވާހަކައިގައި އޭނާ ވަނީ، ވެނެޒުއެލާ ދޫކޮށް އެހެން ޤައުމު ތަކަށް ގޮސްފައިވާ އެ ޤައުމުގެ ހުރިހާ ރައްޔިތުން އަލުން އަނބުރާ ޤައުމަށް ގެންނާނެ ކަމަށް ވެސް ވިދާޅުވެފަ އެވެ. އަދި ވެނެޒުއެލާ އަށް ގެއްލުން ދީފައިވާ އެންމެން ވެސް އިންސާފުގެ ކުރި މައްޗަށް ހާޒިރުކޮށް، ޖަވާބު ދާރީ ކުރުވާނެ ކަމަށް ވެސް އޭނާ ވިދާޅުވެފައިވެ އެވެ.
