ވެނެޒުއޭލާގެ 50 މިލިއަން ފީފާ ތެޔޮ އެމެރިކާ އަށް ލިބޭނެ ކަމަށާއި، ބާޒާރުގެ އަގުގައި ވިއްކުމަށްފަހު ލިބޭ ފައިސާ ކޮންޓްރޯލު ކުރައްވާނީ އޭނާ އަމިއްލަ އަށް ކަމަށް ޓްރަމްޕް ވިދާޅުވެއްޖެ

ވެނެޒުއޭލާގެ 30 މިލިއަނާއި 50 މިލިއަނާ ދެމެދުގެ އަދަދެއްގެ ފީފާ ތެޔޮ އެމެރިކާ އަށް ލިބޭނެ ކަމަށާއި، ތެޔޮ ވިއްކައިގެން ލިބޭ ފައިސާ ކޮންޓްރޯލު ކުރައްވާނީ އޭނާ ކަމަށް ރައީސް ޑޮނަލްޑް ޓްރަމްޕް އިޢުލާނު ކުރައްވައިފި އެވެ.

ޓްރަމްޕް ވިދާޅުވި ގޮތުގައި މި ތެޔޮ ވިއްކާނީ ބާޒާރުގެ އަގުގައެވެ. އަދި އެއިން ލިބޭ އާމްދަނީ ބޭނުންކުރާނީ ވެނެޒުއޭލާގެ ރައްޔިތުންނާއި އެމެރިކާގެ މަންފާއަށް ކަން ކަށަވަރުކުރުމަށްޓަކައި، އެ ފައިސާގެ ކޮންޓްރޯލް އޭނާ ނަންގަވާނެ ކަމަށްވެސް ވިދާޅުވި އެވެ. މީގެއިތުރުން، މި މަޝްރޫޢު "ވަގުތުން" ތަންފީޛުކުރުމަށް އެމެރިކާގެ އެނާޖީ ސެކްރެޓަރީ ކްރިސް ރައިޓަށް އަންގަވާފައިވާ ކަމަށްވެސް ޓްރަމްޕް ވިދާޅުވިއެވެ.

އަންގާރަ ދުވަހު ޓްރަމްޕްގެ ސޯޝަލް މީޑިއާ ޕްލެޓްފޯމް "ޓްރޫތު ސޯޝަލް" ގައި ވިދާޅުވީ، މި ތެޔޮތައް ސްޓޯރޭޖް އުޅަނދުތަކުގައި ސީދާ އެމެރިކާގެ ބަނދަރުތަކަށް ގެންދެވޭނެ ކަމަށެވެ.

ޓްރަމްޕްގެ މި ނިންމެވުން އިއުލާނު ކުރެއްވި އިރު، ވެނެޒުއޭލާގެ ތެލުގެ ރިޒާވް "އަތުލައިގަނެ"، އެ ޤައުމުގެ ހީނަރުވެފައިވާ ހަކަތައިގެ ސިނާޢަތް އަލުން އާރާސްތުކުރާނެ ކަމަށް ކުރިން ވަނީ ވިދާޅުވެފަ އެވެ. 

ޓްރަމްޕް ވިދާޅުވި ގޮތުގައި ވެނެޒުއޭލާގެ ބާވެފައިވާ އިންފްރާސްޓްރަކްޗަރ އަލުން ބިނާކުރުމަށްޓަކައި އެމެރިކާގެ ތެޔޮ ކުންފުނިތަކުން ބިލިއަނުން ޑޮލަރު އިންވެސްޓްކުރުމަށް ތިބީ ތައްޔާރަށެވެ.

އެމެރިކާގެ އެންމެ ބޮޑު ތިން ތެޔޮ ކުންފުނި ކަމަށްވާ ޝެވްރޮން، އެކްސަން މޮބިލް އަދި ކޮނޮކޯފިލިޕްސް އިން މިކަމާ ގުޅޭގޮތުން ސީދާ ވަކި އެއްޗެއް ބުނެފައެއް ނުވެ އެވެ. ނަމަވެސް، އެމެރިކާގެ މީޑިއާތަކުން ރިޕޯޓްކުރާ ގޮތުގައި މި ކުންފުނިތަކުގެ މަންދޫބުން ވެނެޒުއޭލާގެ މައްސަލައާ ގުޅޭގޮތުން މަޝްވަރާކުރުމަށް އަންނަ ހުކުރު ދުވަހު ރައީސް ޓްރަމްޕާ ބައްދަލުކުރުމަށް ވަނީ ހަމަޖެހިފަ އެވެ.

ހިއުސްޓަންގެ ބޭކާ އިންސްޓިޓިއުޓްގެ ހަކަތައާ ބެހޭ މާހިރެއް ކަމަށްވާ މާކް ފިންލީ ވިދާޅުވީ، އިތުރު ތަފްޞީލެއް ނެތި ޓްރަމްޕްގެ މި އިޢުލާނުގެ މުހިންމުކަން ވަޒަންކުރަން ދަތި ކަމަށެވެ.

"30 އާއި 50 މިލިއަން ފީފާ ތެޔޮ މި ގެންނަނީ ކިހާ މުއްދަތެއްގެ ތެރޭގައިތޯ؟ އެއީ މިކަމުގެ އަސަރު ވަޒަންކުރުމަށް އެނގެންޖެހޭ އެންމެ މުހިންމު ނުކުތާ،" ފިންލީ އަލްޖަޒީރާ އަށް ވިދާޅުވި އެވެ. "އެއް މަސްދުވަހުގެ ތެރޭގައި ނަމަ، އެއީ ވެނެޒުއޭލާގެ މުޅި އުފެއްދުންތެރިކަން. އެކަމަކު އެއް އަހަރު ދުވަހުގެ ތެރޭގައި ނަމަ، އެއީ ވަރަށް ކުޑަ މިންވަރެއް."

މާހިރުން ވިދާޅުވާ ގޮތުގައި 1990 ގެ އަހަރުތަކުގައި ވެނެޒުއޭލާ އިން ދުވާލަކު އުފެއްދި 3 މިލިއަން ފީފާގެ މިންވަރާ ގާތަށް އުފެއްދުންތެރިކަން އިތުރުކުރުމަށްޓަކައި ބޮޑެތި އިންވެސްޓްމަންޓްތަކެއް ބޭނުންވާނެ ކަމަށާއި، އެކަމަށް އަހަރުތަކެއް ނަގާނެ ކަމަށެވެ.

ނޯވޭގެ ކޮންސަލްޓެންސީ ފާމެއް ކަމަށްވާ ރައިސްޓޭޑް އެނާޖީގެ އަންދާޒާތަކުން ދައްކާ ގޮތުގައި، ދުވާލަކު 2 މިލިއަން ފީފާ އުފެއްދޭ މިންވަރަށް ވެނެޒުއޭލާގެ ތެލުގެ ސިނާޢަތް ކުރިއެރުވުމަށް ގާތްގަނޑަކަށް 110 ބިލިއަން ޑޮލަރުގެ އިންވެސްޓްމަންޓް ބޭނުންވެ އެވެ.

ބާޒާރު ދިރާސާކުރާ ބައެއް ފަރާތްތަކުން ދެކޭ ގޮތުގައި، ކުރީގެ ރައީސް ހޫގޯ ޗާވޭޒްގެ ދައުރުގައި ކުންފުނިތަކުގެ މުދާ ދައުލަތަށް އަތުލާފައިވާތީ އާއި، ދުނިޔޭގެ ބާޒާރުގައި ތެޔޮ އިތުރުވެފައިވުމުގެ ސަބަބުން، އެމެރިކާގެ ކުންފުނިތަކުން ވެނެޒުއޭލާގައި ބޮޑެތި އިންވެސްޓްމަންޓްތަކެއް ކުރުމަކީ ނާދިރު ކަމެކެވެ.

2007 ވަނަ އަހަރު ޗާވޭޒްގެ ސަރުކާރުން އަމިއްލަ ފަރާތްތަކުން ހިންގަމުންދިޔަ ތެލުގެ އިންވެސްޓްމަންޓްތައް ދައުލަތަށް ނެގުމާ ގުޅިގެން، ބައިނަލްއަޤްވާމީ އާބިޓްރޭޝަނުން ވަނީ އެކްސަން މޮބިލްއަށް 1.6 ބިލިއަން ޑޮލަރު އަދި ކޮނޮކޯފިލިޕްސް އަށް 8.7 ބިލިއަން ޑޮލަރު ދިނުމަށް ޙުކުމްކޮށްފަ އެވެ. ނަމަވެސް، ވެނެޒުއޭލާ ސަރުކާރުން އެއިން އެއްވެސް ފައިސާ އެއް ދައްކާފަ އެއް ނުވެ އެވެ.

މިހާރު ވެނެޒުއޭލާގައި މަސައްކަތްކުރާ އެމެރިކާގެ ހަމައެކަނި ބޮޑު ތެޔޮ ކުންފުންޏަކީ ޝެވްރޮން އެވެ. އެ ކުންފުނިން ދުވާލަކު އުފައްދަނީ ގާތްގަނޑަކަށް 150,000 ފީފާ ތެލެވެ.

ކުރިން ދުނިޔޭގެ އެންމެ ގިނައިން ތެޔޮ އުފައްދާ ޤައުމުތަކުގެ ތެރޭގައި ވެނެޒުއޭލާ ހިމެނުނު ނަމަވެސް، އެމެރިކާގެ ދަތިކުރުމުގެ ފިޔަވަޅުތަކާއި، ގިނަ އަހަރުތަކެއް ވަންދެން އިންވެސްޓް ނުކުރުމާއި، މަދޫރޯ އާއި ޗާވޭޒްގެ ދައުރުގައި ހިންގާފައިވާ ކޮރަޕްޝަނާއި އިދާރީ އިހުމާލުގެ ސަބަބުން އެ ސިނާޢަތް ވަނީ ވަރަށް ބޮޑަށް ދަށަށް ގޮސްފައެވެ.

ވެނެޒުއޭލާ ގައި ދުނިޔޭގެ އެންމެ ބޮޑު ތެޔޮ ރިޒާވް އޮތް ނަމަވެސް، މިހާރު އެ ޤައުމުން އުފައްދާ ތެލުގެ މިންވަރަކީ ދުނިޔޭގެ މުޅި ސަޕްލައިގެ 1 އިންސައްތަ އަށް ވުރެ ކުޑަ މިންވަރެކެވެ.