މަދޫރޯ ހައްޔަރުކުރުމުގެ އޮޕަރޭޝަން ގައި އެމެރިކާގެ 200 އެއްހާ ސިފައިން ކަރާކަސް އަށް ވަތް
މި އޮޕަރޭޝަންގައި 150 އަށް ވުރެ ގިނަ އަސްކަރީ މަތިންދާބޯޓު ބޭނުންކޮށްފައިވޭ.
އެމެރިކާގެ ސިފައިން މަދޫރޯ ހައްޔަރު ކުރުމަށް ފަހު ޑްރަގް އެންފޯސްމަންޓް އެޖޭންސީގެ އޮފިޝަލުންގެ ބެލުމުގެ ދަށުގައި
ވެނެޒުއޭލާގެ ލީޑަރު ނިކޮލަސް މަދޫރޯ ހައްޔަރުކުރުމަށް ހިންގި އޮޕަރޭޝަންގައި އެމެރިކާގެ 200 އެއްހާ ސިފައިން އެ ގައުމުގެ ވެރިރަށް ކަރާކަސް އަށް ވަދެފައިވާކަމަށް، ޕެންޓަގަންގެ ވެރިޔާ ޕީޓް ހެގްސެތު ހޯމަ ދުވަހު ވިދާޅުވެއްޖެ އެވެ.
މިދިޔަ ހަފުތާ ބަންދުގައި އެމެރިކާގެ ސިފައިން މަދޫރޯ އާއި އޭނާގެ އަނބިކަނބަލުން ހައްޔަރުކޮށްފައިވާއިރު، މިއާއެކު މަދޫރޯގެ 12 އަހަރުވީ ވެރިކަން ވަނީ ނިމުމަކަށް އައިސްފަ އެވެ. މަދޫރޯ އަކީ މަސްތުވާތަކެތީގެ ނެޓްވޯކެއް ހިންގަވާ ބޭފުޅެއްގެ ގޮތުގައި އެމެރިކާ އިން ތުހުމަތުކޮށް، އޭނާ ހައްޔަރުކޮށްދިން ފަރާތަކަށް 50 މިލިއަން ޑޮލަރުގެ އިނާމެއް ވެސް މީގެ ކުރިން ވަނީ ކަނޑައަޅާފައެވެ. އެހެން ނަމަވެސް މަދޫރޯ ތަކުރާރު ކޮށްް މި ތުހުމަތުތައް ދޮގު ކުރައްވާފައިވެ އެވެ.
"އެމެރިކާގެ އެންމެ ހުނަރުވެރި 200 އެއްހާ ސިފައިން ކަރާކަސްގެ މެދުތެރެ އަށް ވަދެ، އެމެރިކާގެ އިންސާފުގެ ކުރިމައްޗަށް ހާޒިރުކުރަން ބޭނުންވެފައިވާ ކުށްވެރިޔަކު ވަނީ ހައްޔަރުކޮށްފައި. މި އޮޕަރޭޝަން ގައި އެމެރިކާގެ އެއްވެސް ސިފައިންގެ މީހަކު މަރުވެފައެއް ނުވޭ،" ވަރޖިނިއާގައި އެމެރިކާގެ ކަނޑުގެ ސިފައިންނާ މުޚާތަބުކުރައްވައި ވާހަކަދައްކަވަމުން ހެގްސެތު ވިދާޅުވިއެވެ.
މިއީ ހެލިކޮޕްޓަރު މެދުވެރިކޮށް ކަރާކަސް އަށް ފޭބި އެމެރިކާ ސިފައިންގެ އަދަދު އެމެރިކާގެ އިސް އޮފިޝަލަކު ހާމަކުރެއްވި ފުރަތަމަ ފަހަރެވެ. މި ވަރުގަދަ އޮޕަރޭޝަން ގައި 150ށް ވުރެ ގިނަ އަސްކަރީ މަތިންދާބޯޓު އެކި ދައުރުތަކުގައި ބޭނުންކޮށްފައިވާއިރު، މި އޮޕަރޭޝަން ގެ ތެރޭގައި ވެނެޒުއޭލާގެ ދިފާއީ ނިޒާމުތަކަށް ވެސް ވަނީ ހަމަލާ ދީފަ އެވެ.
މަދޫރޯ އާއި އޭނާގެ އަނބިކަނބަލުން ސީލިއާ ފްލޮރޭސް ވަނީ ހޯމަ ދުވަހު ނިއުޔޯކުގެ ކޯޓެއްގައި އެމީހުންގެ މައްޗަށް ކުރެވޭ ތުހުމަތުތަކަށް އިންކާރުކޮށްފައެވެ.
