ވެނެޒުއެލާގެ ވަގުތީ ރައީސް ކަމުގެ ހުވާ ޑެލްސީ ރޮޑްރިގޭޒް ކުރައްވައިފި

ވެނެޒުއެލާގެ ވަގުތީ ރައީސް ކަމުގެ ހުވާ، އެ ޤައުމުގެ ނައިބު ރައީސް ޑެލްސީ ރޮޑްރިގޭޒް ކުރައްވައިފި އެވެ. 

ހޯމަ ދުވަހު ޑެލްސީ ރޮޑްރިގޭޒް ވަނީ ވެނެޒުއެލާގެ ވަގުތީ ރައީސް ކަމުގެ ހުވާ ކުރައްވައިފަ އެވެ. އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް އެ ޤައުމުގެ އަސްކަރިއްޔާ އިން ވަނީ ވެެނެޒުއެލާގެ ރައީސް ނިކޮލަސް މަދޫރޯ ހައްޔަރު ކޮށްފަ އެވެ. އެއާ އެކު، ވެނެޒުއެލާގެ ސުޕްރީމް ކޯޓުން އަމުރު ކޮށްފައި ވަނީ، އެ ޤައުމުގެ ވަގުތީ ރައީސް އަކީ ޑެލްސީ ރޮޑްރިގޭޒް ކަމަށެވެ. 

އުމުރުފުޅުން 56 އަހަރުގެ ޑެލްސީ ރޮޑްރިގޭޒް އަކީ ޤާނޫނީ ވަކީލެކެވެ. އެކަމަނާ އަކީ ވެނެޒުއެލާގެ ޕްރައިވެޓް ސެކްޓާއާ ވަރަށް ގާތް ގުޅުމެއް އޮންނަ ފަރާތަކަށް ވާއިރު، ވެރިކަން ކުރާ ޔުނައިޓެޑު ސޯޝަލިސްޓް ޕާޓީ އަށް ވެސް ވަރަށް ވަފާތެރި ފަރާތެކެވެ. ޑެލްސީ ރޮޑްރިގޭޒް އަށް ވަގުތީ ރައީސް ކަމުގެ ހުވާ ލައިދެއްވީ، ވެނެޒުއެލާގެ ޤާނޫނު ހަދާ މަޖިލީހުގެ ރައީސް ޖޯޖް ރޮޑްރިގޭޒް އެވެ. ޖޯޖް އަކީ ޑެލްސީގެ ބޭބެ އެވެ. 

ހޯމަ ދުވަހު ހުވާ ކުރެއްވި ބޭފުޅުންގެ ތެރޭގައި މިދިޔަ އަހަރުގެ މެއި މަހުގެ ތެރޭގައި އިންތިޚާބު ކުރެވުނު 283 މަޖިލިސް މެމްބަރުން ވެސް ހިމެނެ އެވެ. އެ މެމްބަރުންގެ ތެރޭގައި އިދިކޮޅު މެމްބަރުންގެ އަދަދު ވަރަށް މަދެވެ. ސަބަބަކީ ނޯބެލް ސުލްހައިގެ އިނާމު ލިބިވަޑައިގެންފައިވާ  މަރީއާ ކޮރީނާ މަޗާޑޯ އަށް ތާއީދު ކުރައްވާ ބައެއް ފަރާތްތަކުން އިންތިޚާބު ބޮއިކޮޓް ކޮށްފައިވާތީ އެވެ. 

ހުވާ ކުރުމުގެ ރަސްމިއްޔާތުގައި ބައިވެރިވެ ވަޑައި ނުގެންނެވި ހަމައެކަނި މަޖިލިސް މެމްބަރަކީ، މަދޫރޯގެ އަނބިކަނބަލުން ސިލިއާ ފްލޯރެސް އެވެ. ވެނެޒުއެލާގެ ފަސްޓް ލޭޑީގެ އިތުރުން، އޭނާ އަކީ ވެނެޒުއެލާގެ ކޮންސްޓިޓިއުއެންޓް ނެޝަނަލް އެސެމްބްލީގެ މެމްބަރެކެވެ. އޭނާ ވެސް ހުންނެވީ އެމެރިކާގެ އަސްކަރިއްޔާ އިން ހައްޔަރު ކޮށްފަ އެވެ. 

ވެނެޒުއެލާގެ ވަގުތީ ރައީސްގެ ހުވާ ޑެލްސީ ރޮޑްރިގޭޒް ކުރައްވާފައިވާއިރު، އަދި ވެސް އެ ޤައުމުގެ ސިޔާސީ މުސްތަޤުބަލު އޮތީ ސުވާލެއްގެ ތެރޭގަ އެވެ. ވެނެޒުއެލާއާ ދެކޮޅަށް އެމެރިކާ އިން ހިންގާފައިވާ އަމަލުތަކާ ގުޅިގެން، ބައިނަލްއަޤުވާމީ މުޖުތަމައުން ވަނީ އެމެރިކާ އަށް އިންތިހާ އަށް ނުރުހުން އަމާޒުކޮށްފަ އެވެ.