އިޒްރޭލުގެ ބުލްޑޯޒަރުތަކުން އިރުމަތީ ގުދުސްގައި ހަތަރު ބުރީގެ އިމާރާތެއް ތަޅާލާ ފަލަސްތީނުގެ އެތައް ބަޔަކު މަގުމަތި ކޮށްފި
އިޒްރޭލުން ހޯމަ ދުވަހު ގުދުސްގެ ކައިރީގައިވާ ސިލްވާން އަވަށުގައި ހުންނަ ހަތަރު ބުރީގެ އިމާރާތެއް ތަޅާލާ، އެތަނުގައި ދިރިއުޅުނު 100 މީހުން ވަނީ މަގުމަތި ކޮށްފައި.
އިޒްރޭލު ސިފައިން އިރުމަތީ ގުދުސް ގެ ވާދީ ޤައްދޫމު ގައި ފަލަސްތީނު މީހެއްގެ އިމާރާތެއް ތަޅާލަނީ - ޑިސެމްބަރު 22، 2025.
އިޒްރޭލުގެ ބުލްޑޯޒަރުތަކުން ހޯމަ ދުވަހު އިރުމަތީ ގުދުސްގައި ހަތަރު ބުރީގެ މީހުން ދިރިއުޅޭ އިމާރާތެއް ތަޅާލާ ފަލަސްތީނުގެ އެތައް ބަޔަކު މަގުމަތި ކޮށްފި އެވެ.
މިއީ މި އަހަރު އެ ސަރަހައްދުގައި ހިންގުނު އެންމެ ބޮޑު މިފަދަ އަމަލު ކަމަށް އެ ސަރަަހައްދުގެ މީހުން ބުނެފައިވެއެވެ.
ގުދުސްގެ ކައިރީގައިވާ ސިލްވާން އަވަށުގައި ހުންނަ އެ އިމާރާތުގައި ގާތްގަނޑަކަށް 100 މީހުން ދިރިއުޅެމުން ދިޔަ ބާރަ އެޕާޓްމަންޓް ހުއްޓެވެ. ދިރިއުޅުނު މީހުންގެ ތެރޭގައި ގިނައީ އަންހެނުންނާއި ކުޑަކުދިންނާއި ދޮށީ އުމުރުގެ މީހުންނެވެ.
އިޒްރޭލުން ހިސޯރު ކޮށްފައިވާ އިރުމަތީ ގުދުސް ގެ އިމާރާތްތައް ތަޅާ ބަހަނާ އަކަށް އިޒްރޭލުގެ އޮފިޝަލުން ބުނަމުން އައިސްފައި ވަނީ ހުއްދަ ނުނަގާ ހަދާފައިވާ އިމާރާތްތަކަށް ވާތީ ކަމަށެވެ.
އެ އިމާރާތް ތަޅާލަން އިޒްރޭލު މީހުން ބުލްޑޯޒަރުތަކުގައި އައީ މީހުން ނިދާފައި ތިއްބާ ކަމަށާއި އެމީހުންނަށް ދިނީ ހަމަ އެކަނި މުހިންމު ލިޔެ ކިޔުންތައް ނަގާނެ ވަގުތު ކޮޅެއް ކަމަށް އިމާރާތުގައި ދިރިއުޅޭ މީހުން ބުނެފައިވެ އެވެ.
އިމާރާތުގައި ދިރިއުޅޭ އާއިލާ އަކުން އޭއެފްޕީ ގެ ރިޕޯޓަރަށް ކިޔައިދިން ގޮތުގައި އެމީހުން ދާނެ އިތުރު ތަނެއް ނެތުމާއެކު ނިދަން ޖެހޭނީ އާއިލާގެ ކާރުގެ ތެރޭގަ އެވެ.
ހޯމަ ދުވަހުގެ ފަތިހު ތިން ބުލްޑޯޒަރުން އިމާރާތް ތަޅާލަން ފެށިއިރު، އެއޭއެފްޕީގެ ނޫސްވެރިއަކަށް ފެނުނު ގޮތުގައި، އިމާރާތުގައި ދިރިއުޅޭ މީހުންގެ ހެދުންތަކާއި ގެންގުޅޭ ސާމާނު ވަނީ މަގުމައްޗަށް އުކާލާފަ އެވެ.
އިޒްރޭލުގެ ފުލުހުން ވަށައިގެންވާ މަގުތައް ބަންދުކޮށް، ސަލާމަތީ ބާރުތައް އެ ސަރަހައްދުގެ، ކައިރީގައި ހުރި ގޭގޭގެ ފުރާޅުމަތީގައި ވެސް ހަރަކާތްތެރިވެފައިވެ އެވެ.
އިޒްރޭލު ސަރުކާރުގެ ފިއްތުންތަކުގެ ސަބަބުން، އިމާރާތް ކުރުމުގެ ހުއްދަ ހޯދުމަށް ފަލަސްތީނުގެ ރައްޔިތުންނަށް ގިނަ ގޮންޖެހުންތަކެއް ކުރިމަތިވެއެވެ. މިކަމަކީ އިރުމަތީ ގުދުސްގައި ވެސް އަދި ހުޅަނގު އައްސޭރީ ގައި ވެސް ޒަމާނުއްސުރެ ފަލަސްތީނު ރައްޔިތުންނަށް ކުރިމަތިވެފައިވާ ގޮންޖެހުމެއް ކަމަށް ރިޕޯޓުތައް ބުނެ އެވެ.
