އިޒްރޭލުން ފަލަސްތީނުގެ ރެފިއުޖީ ކޭމްޕެއްގައި ހުރި 25 ގެ ތަޅާލަން ފަށައިފި

އިޒްރޭލުން ހިފާފައިވާ ފަލަސްތީނުގެ ވެސްޓް ބޭންކް (ހުޅަނގު އައްސޭރި) ގެ އުތުރުގެ ސަރަހައްދުތަކުގައި ހަރަކާތްތެރިވާ ހަތިޔާރު އެޅި ޖަމާއަތްތައް ނައްތާލުމަށް ކުރާ މަސައްކަތެއް ކަމަށް ބުނެ، އިޒްރޭލުގެ ބުލްޑޯޒަރުތަކުން ބުދަ ދުވަހު ފަލަސްތީނުގެ ރެފިއުޖީ ކޭމްޕެއްގައި ހުރި 25 އިމާރާތެއް ތަޅާލަން ފަށައިފިއެވެ.

ގާތްގަނޑަކަށް 100 އާއިލާ ދިރިއުޅޭ މި އިމާރާތްތައް ހުންނަނީ ނޫރު ޝަމްސް ކޭމްޕުގައެވެ. މިއީ ފަލަސްތީނުގެ މުޖާހިދުންނާއި އިޒްރޭލުގެ އިސްތިއުމާރީ ބާރުތަކާ ދެމެދު ގިނަ ކުރިމަތިލުންތައް ހިނގާ ސަރަހައްދެކެވެ.

އޭއެފްޕީގެ ނޫސްވެރިއަކު ރިޕޯޓްކޮށްފައިވާ ގޮތުގައި، ބުދަ ދުވަހުގެ ހެނދުނުގެ ވަގުތެއްގައި އިޒްރޭލުގެ އަސްކަރީ ބުލްޑޯޒަރުތަކާއި ކްރޭންތަކުން ވަނީ އެ އިމާރާތްތައް މުގުރާލައި ބިމާ ހަމަކޮށްލާފައެވެ. މި މަންޒަރު ބަލަން ގިނަ އަދަދެއްގެ އާންމުން ދުރުގައި ތިއްބެވެ.

އިޒްރޭލު ސިފައިން ބުނި ގޮތުގައި މިގޮތަށް އިމާރާތްތައް ތަޅާލުމަކީ ހަނގުރާމަވެރިންނާ ދެކޮޅަށް ހިންގާ އޮޕަރޭޝަނެއްގެ ބައެކެވެ. "ހުޅަނގު އައްސޭރީގެ އުތުރުގެ ނޫރު ޝަމްސް ސަރަހައްދުގައި އިޒްރޭލުގެ ސަލާމަތީ ބާރުތަކުން ހިންގަމުންދާ ހަރަކާތްތަކާ ގުޅިގެން، ސެންޓްރަލް ކޮމާންޑުގެ ކޮމާންޑަރު މޭޖަރ ޖެނެރަލް އަވީ ބްލޫތު ވަނީ އަސްކަރީ ބޭނުމަކަށްޓަކައި ބައެއް އިމާރާތްތައް ތަޅާލުމަށް އަމުރުކޮށްފައި،" އިޒްރޭލު ސިފައިން އޭއެފްޕީ އަށް ދީފައިވާ ބަޔާނެއްގައި ބުނެފައިވެއެވެ. 

މިއަހަރުގެ ކުރީކޮޅު ވެސް އިޒްރޭލުން ވަނީ ނޫރު ޝަމްސް، ތުލްކަރަމް އަދި ޖެނީން ފަދަ ކޭމްޕުތަކުގައި ހަރަކާތްތެރިވާ ފަލަސްތީނުގެ ހަތިޔާރު އެޅި ޖަމާއަތްތައް ނައްތާލުމަށް ކަމަށް ބުނެ އޮޕަރޭޝަނެއް ފަށާފައެވެ. އިޒްރޭލު ސިފައިން ބުދަ ދުވަހު ބުނި ގޮތުގައި، މި ސަރަހައްދުގައި އޮޕަރޭޝަންތައް ފެށިތާ އަހަރެއް ވީއިރު ވެސް، ސިފައިންނަށް ނުރައްކާވާ ފަދަ ގޮވާއެއްޗިއްސާއި ހަތިޔާރުތައް އެ ސަރަހައްދުތަކުން ފެންނަމުންދެ އެވެ.

މި މަހުގެ ކުރީކޮޅު އޭއެފްޕީން ރިޕޯޓްކޮށްފައިވާ ގޮތުގައި، ތަޅާލަން ކަނޑައަޅާފައިވާ އިމާރާތްތަކުގައި ދިރިއުޅޭ މީހުން ދިޔައީ އެމީހުން ގެންގުޅޭ ތަކެތި ހިފައިގެން ނިކުންނަމުންނެވެ. އޭގެ ތެރެއިން ގިނަ ބަޔަކު ބުނި ގޮތުގައި އެމީހުން ދާނެ އެހެން އެއްވެސް ތަނެއް ނެތެވެ.

މިގޮތަށް އިމާރާތްތައް ތަޅާލުމަކީ ހުޅަނގު އައްސޭރީގެ ތޮއްޖެހިފައިވާ ރެފިއުޖީ ކޭމްޕުތަކުގެ ތެރޭގައި އިޒްރޭލުގެ އަސްކަރީ އުޅަނދުތަކަށް ފަސޭހައިން ދަތުރުކުރެވޭނެ މަގުތައް ހެދުމަށް ގެންގުޅޭ ނުބައި ރޭވުމެއްގެ ބައެކެވެ. އިޒްރޭލުން ފަލަސްތީނުގެ ބިންތައް 1967 އިން ފެށިގެން ވަނީ އިސްތިއުމާރު ކޮށްފަ އެވެ.

ނޫރު ޝަމްސް ކޭމްޕަކީ 1948 ވަނަ އަހަރު އިޒްރޭލު އުފެއްދުމާ ގުޅިގެން ފަލަސްތީނުގެ އެތައް ހާސް ބަޔަކު އެމީހުންގެ ގެދޮރުން ބޭރުކޮށްލުމުން އުފެދުނު ރެފިއުޖީ ކޭމްޕުތަކުގެ ތެރެއިން ކޭމްޕެކެވެ. ދުވަސްތައް ފާއިތުވަމުން ދިޔަ ވަރަކަށް، މި ކޭމްޕުތައް ވަނީ ކައިރީގައި ހުރި ސިޓީތަކުގެ ބާރު ނުހިނގާ، ތޮއްޖެހިފައިވާ އަވަށްތަކަކަށް ބަދަލުވެފައެވެ. މިތަނުގައި ދިރިއުޅޭ މީހުން އެމީހުންގެ ރެފިއުޖީ ހައިސިއްޔަތު އެއް ޖީލުން އަނެއް ޖީލަށް އަންނަނީ ވާރުތަ ވަމުންނެވެ.

މި ސަރަހައްދުގައި ދިރިއުޅޭ ގިނަ ބަޔަކު ގަބޫލުކުރާ ގޮތުގައި، އިޒްރޭލުން މަސައްކަތް ކުރަނީ ކޭމްޕުތަކުގެ މަފްހޫމް ނައްތާލައި، އެތަންތަނަކީ ސިޓީތަކުގެ އާދައިގެ އަވަށްތަކަކަށް ބަދަލު ކުރުމަށެވެ. އެއީ ރެފިއުޖީންގެ މައްސަލަ މުޅިން ފޮހެލުމުގެ ބޭނުމުގައެވެ.