ވެނެޒުއެލާގެ ވަގުތީ ރައީސް އަކީ، ނައިބު ރައީސް ރޮޑްރިގޭޒް ކަމަށް ސުޕްރީމް ކޯޓުން އަމުރު ކޮށްފި

ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކުރުމާ ގުޅިގެން، އެ ޤައުމުގެ ވަގުތީ ރައީސް އަކީ މަދޫރޯގެ ނައިބު ރައީސް ޑެލްސީ ރޮޑްރިގޭޒް ކަމަށް، ވެނެޒުއެލާގެ ސުޕްރީމް ކޯޓުން އަމުރު ކޮށްފި އެވެ. 

އާދީއްތަ ދުވަހު ވެނެޒުއެލާގެ ސުޕްރީމް ކޯޓުގެ ކޮންސްޓިޓިއުޝަނަލް ޗެމްބަރުން ނެރެފައިވާ އަމުރުގައި ބުނެފައި ވަނީ، ވަގުތީ ގޮތުން ރައީސް ކަމުގެ މަގާމު ރޮޑްރިގޭޒް ފުރުއްވުމަށް އަމުރު ކުރައްވާ ކަމަށެވެ. 

ކޯޓުގެ އަމުރުގައި ބުނެފައި ވަނީ، ވެނެޒުއެލާގެ ރައީސް ކަމުގެ މަގާމު ރޮޑްރިގޭޒް ފުރުއްވަން ޖެހޭނީ އިދާރީ ކަންކަން ދެމެހެއްްޓުމަށާއި، ޤައުމުގެ ފުރިހަމަ ދިފާއު ކަށަވަރު ކުރެއްވުމަށް ކަމަށެވެ. 

މީގެ އިތުރުން ސުޕްރީމް ކޯޓުން ބުނެފައި ވަނީ ޤައުމުގެ ރައީސް ބާރުގައި ނުހުންނަވާ ޙާލަތުގައި، ދައުލަތުގެ ދެމެހެއްޓެނިވި ކަމަށާއި، ސަރުކާރުގެ އިދާރީ ކަންކަން އަދި ސިޔާދަތުގެ ދިފާއު ކަށަވަރު ކުރުމަށް ތަންފީޒު ކުރެވޭނެ ޤާނޫނީ އިމުގެ ހަމަތައް ކަނޑަ އެޅުމަށް، އެ ކޯޓުން މައްސަލައިގައި ބަހުސް ކުރާނެ ކަމަށެވެ. 

އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް މަދޫރޯ ހައްޔަރު ކުރުމާ އެކު، ވެނެޒުއެލާގެ ސިޔާސީ މަޝްރަހު ވަނީ ވަރަށް ބޮޑަށް ބަދަލުވެފަ އެވެ. އެމެރިކާގެ އަސްކަރިއްޔާ އިން މަދޫރޯ ހައްޔަރުކޮށް، އެ ޤައުމުގެ ބެލުމުގެ ދަށަށް ގެންގޮސްފައިވާއިރު، ވެނެޒުއެލާގެ ސަރުކާރުގެ މުސްތަޤުބަލާ މެދު ވަނީ ސުވާލު ތަކެއް އުފެދިފަ އެވެ. 

ވެނެޒުއެލާގެ ސުޕްރީމް ކޯޓުން ނިންމާފައިވާ މި ނިންމުމަކީ، އެ ޤައުމުގެ ޤާނޫނު އަސާސީގެ ދަށުން ނައިބު ރައީސް އަށް ލިބިދޭ ބާރުތަކާ އެއް ގޮތަށް ނިންމާފައިވާ ނިންމުމެކެވެ. ޤައުމުގައި ރައީސް ނެތް ޙާލަތެއް މެދުވެރިވެއްޖެ ނަަމަ، ނުވަތަ ރައީސް ކަމުގެ ވާޖިބު އަދާ ކުރުމަށް ރައީސް ނުކުޅެދޭ ޙާލަތެއް އަތުވެއްޖެ ނަމަ، ވަގުތީ ގޮތުން ރައީސްގެ މަސްއޫލިއްޔަތު އަދާ ކުރައްވަން ވާނީ ނައިބު ރައީސް ކަަމަށް ޤާނޫނު އަސާސީގައި ވަނީ ބަޔާން ކޮށްފައި އެވެ. 

ރޮޑްރިގޭޒް އަކީ ވެނެޒުއެލާގެ ސިޔާސީ މައިދާނުގައި ވަރަށް ބާރުގަދަ ބޭފުޅެއް ކަމަށްވާއިރު، މަދޫރޯގެ ސަރުކާރުގައި އެންމެ އިސް ދައުރެއް އަދާ ކުރައްވާފައި ވަނީ ވެސް އެކަމަނާ އެވެ. ނަމަވެސް، ރައީސް ކަމުގެ މަސްއޫލިއްޔަތުތައް ވަގުތީ ގޮތުން ނައިބު ރައީސް އަދާ ކުރެއްވުމަށް ސުޕްރީމް ކޯޓުން އަމުރު ކުރެއްވުމާ އެކު، ވެނެޒުއެލާގެ ސިޔާސީ ލީޑަރުން އަދި ބައިނަލްއަޤުވާމީ މުޖުތަމައުން އަންނަނީ ކަންބޮޑުވުން ވެސް ފާޅު ކުރަމުންނެވެ. 

މަދޫރޯ ހައްޔަރު ކުރުމާ ގުޅިގެން މީގެ ކުރިން ރޮޑްރިގޭޒް ވަނީ، ވެނެޒުއެލާގެ ހަމައެކަނި ރައީސް އަކީ މަދޫރޯ ކަމަށް ވިދާޅުވެފަ އެވެ. އަދި މަދޫރޯ އާއި އޭނާ ގެ އަނބިކަނބަލުން ވަގުތު މިނިވަން ކުރުމަށް ވެސް އޭނާ ވަނީ ގޮވާލައްވައިފަ އެވެ.