މަދޫރޯ ވަގުތުން މިނިވަން ކުރުމަށް ޗައިނާ އިން އެމެރިކާ އަށް ގޮވާލައިފި

އެމެރިކާގެ އަސްކަރިއްޔާއިން ވެނެޒުއޭލާގެ ވެރިރަށް ކަރަކަަސް އާއި އެހެނިހެން ސަރަހައްދުތަކަށް ވަރުގަދަ ހަމަލާތަކެއް ދީ، އެގައުމުގެ ރައީސް ނިކޮލަސް މަދޫރޯ ހައްޔަރުކޮށްގެން ގެންދިޔަ މައްސަލައިގައި، އޭނާ ވަގުތުން މިނިވަންކުރުމަށް ޗައިނާއިން ގޮވާލައިފިއެވެ.

އާދީއްތަ ދުވަހު ބެއިޖިންގް އިން ނެރުނު ބަޔާނެއްގައި، ރައީސް މަދޫރޯ އާއި އޭނާގެ އަނބިކަނބަލުން ސީލިއާ ފްލޮރެސްގެ ސަލާމަތާއި ރައްކާތެރިކަމަށް އިސްކަންދިނުމަށް ބާރުއަޅައި، ވެނެޒުއޭލާގެ ސަރުކާރު ވައްޓާލުމަށް އެމެރިކާއިން ކުރަމުންދާ މަސައްކަތްތައް ހުއްޓާލުމަށް ވަނީ ގޮވާލާފައެވެ. އަދި އެމެރިކާގެ މި އަމަލަކީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު އަމަލެއްގެ ގޮތުގައި ޗައިނާއިން ސިފަކުރިއެވެ.

މިއީ އެމެރިކާގެ ރައީސް ޑޮނަލްޑް ޓްރަމްޕް، މަދޫރޯ އާއި އޭނާގެ އަނބިކަނބަލުން ހައްޔަރުކޮށްގެން ގައުމުން ބޭރަށް ގެންގޮސްފައިވާ ކަމަށް އިއުލާނު ކުރެއްވި ފަހުން، ހޮނިހިރު ދުވަހުގެ ފަހުން ޗައިނާއިން މި މައްސަލައިގައި ނެރުނު ދެވަނަ ބަޔާނެވެ. ހޮނިހިރު ދުވަހު ޗައިނާއިން ވަނީ އެމެރިކާގެ މި "އިސްތިއުމާރީ އަމަލުތަކާއި" ބާރުގެ ބޭނުން ނަހަމަގޮތުގައި ހިފުން ކުށްވެރިކޮށް، އދ. ގެ ޗާޓަރަށް އިހުތިރާމްކުރުމަށް އެމެރިކާއަށް ގޮވާލާފައެވެ.

ސެންޓަރ ފޯ ޗައިނާ އެންޑް ގްލޯބަލައިޒޭޝަންގެ ސީނިއަރ ރިސާޗް ފެލޯ، އެންޑީ މޯކް ވިދާޅުވި ގޮތުގައި ޗައިނާއިން ދަނީ ވެނެޒުއޭލާގެ މަޝްރަހު ވަރަށް ގާތުން ބަލަމުންނެވެ. އަލްޖަޒީރާ އަށް މައުލޫމާތު ދެއްވަމުން އޭނާ ވިދާޅުވީ، އެމެރިކާގެ މި ހަރަކާތް ފެށުމުގެ މަދު ގަޑިއިރުތަކެއް ކުރިން ޗައިނާގެ ވަފުދެއް ވެނެޒުއޭލާގެ އިސްވެރިންނާ ބައްދަލުކޮށްފައިވާ ކަމަށެވެ. 

މޯކް އިތުރަށް ވިދާޅުވި ގޮތުގައި، ޗައިނާ އަކީ ވެނެޒުއޭލާގެ ތެޔޮ އެންމެ ގިނައިން ގަންނަ ގައުމެވެ. ހަކަތައިގެ އިތުރުން ލެޓިން އެމެރިކާގެ ސަރަހައްދުގައި ޗައިނާގެ ވިޔަފާރި އާއި އިންވެސްޓްމަންޓްތައް ފުޅާވަމުންދާތީ، އެ ސަރަހައްދަށް އަންނަ ސިޔާސީ ބަދަލުތަކަށް ބެއިޖިންގް އިން ވަރަށް ބޮޑަށް ސަމާލުކަންދެއެވެ.

ނަމަވެސް، ޗައިނާގައި ހުންނަވާ އެނަލިސްޓް ޝޯން ރެއިން އަލް ޖަޒީރާ އަށް ވިދާޅުވި ގޮތުގައި، ޗައިނާ އިން މިކަމަށް ރައްދު ދޭނީ އަސްކަރީ ބާރުގެ ބަދަލުގައި ހަމައެކަނި ޑިޕްލޮމެޓިކް އުސޫލުތަކުގެ ތެރެއިންނެވެ. ޗައިނާ މާކެޓް ރިސާޗް ގްރޫޕްގެ ބާނީ ރެއިން ވިދާޅުވީ، ޗައިނާ އިން އެމެރިކާގެ އަމަލުތައް ހަރުކަށި އިބާރާތުން ކުށްވެރިކުރި ނަމަވެސް، އެމެރިކާއާ ދެކޮޅަށް އަސްކަރީ ގޮތުން ނުވަތަ އިގްތިސާދީ ދަތިކުރުމުގެ ފިޔަވަޅުތަކެއް އެޅުމުގެ ފުރުސަތު ކުޑަ ކަމަށެވެ. އެއީ ޗައިނާގެ އަސްކަރީ ބާރު އެމެރިކާއާ އަޅާބަލާއިރު ކުޑަވުމާއި، ތާރީޚީ ގޮތުން ޗައިނާ އަކީ ހަނގުރާމަ އަށް ލޯބިކުރާ ގައުމަކަށް ނުވާތީ ކަމަށް އޭނާ ފާހަގަކުރެއްވިއެވެ.