ވެނެޒުއެލާގެ ރައީސް މަދޫރޯ ހައްޔަރު ކުރި މައްސަލައިގައި ދިވެހި ސަރުކާރުގެ ބަހެއް ނެތް، ފޮރިން މިނިސްޓަރު ޖަވާބެއް ނުދެއްވި
5 ޖެނުއަރީ 2026 | ހޯމަ 05:01އެމެރިކާއިން ވެނެޒުއެލާގެ ރައީސް ނިކޮލަސް މަދޫރޯ އާއި އޭނާގެ އަނބިކަނބަލުން ހައްޔަރުކޮށް އެގައުމުން ބޭރަށް ވަނީ ގެންގޮސްފައި. މިކަމާއި ގުޅިގެން ކޮލަމްބިއާ، ކިއުބާ، ޗިލީ، މެކްސިކޯ، ބްރެޒިލް، ރަޝިއާ، ޗައިނާ އަދި އިންޑޮނޭޝިއާ ފަދަ ދުނިޔޭގެ އެތައް ގައުމަކުން އެމެރިކާގެ މި އަމަލު ހަރުކަށި އިބާރާތުން ކުށްވެރިކުރި. މިނިވަން ހާރިޖީ ސިޔާސަތަކަށް ދައުވާކުރާ ރާއްޖޭގެ ސަރުކާރުން މިކަމާއި ގުޅޭގޮތުން މިހާތަނަށް އެއްވެސް އެއްޗެއް ބުނެފައި ނުވާއިރު، ފޮރިން މިނިސްޓަރާއި ސުވާލު ކުރުމުން ޖަވާބެއް ވެސް ނުދެއްވާ.
ފޮރިން މިނިސްޓަރު ޑރ. އަބްދުﷲ ޚަލީލް
ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކުރި މައްސަލައިގައި ދުނިޔޭގެ އެކި ގައުމުތަކުން އެކަން ކުށްވެރިކުރަމުން އަންނަ އިރު މިނިވަން ހާރިޖީ ސިޔާސަތަކަށް ދައުވާ ކުރާ ދިވެހި ސަރުކާރުން އެކަމާއި ގުޅޭގޮތުން އެއްޗެއް ވިދާޅުނުވިތާގައި، ފޮރިން މިނިސްޓަރު އަބްދުﷲ ހަލީލު ޖަވާބެއް ނުދެއްވި އެވެ.
ވެނުޒެއެލާއަށް އެމެރިކާ އިން ހަމަލާދީ އެގައުމުގެ ރައީސް މަދޫރޯ އާއި އޭނާ ގެ އަނބިކަނބަލުން ހައްޔަރު ކުރީ 2 ޖެނުއަރީ 2026 ވީ ހުކުރު ދުވަހު އެވެ. އެމެރިކާގެ ރައީސް ޑޮނަލްޑް ޓްރަމްޕް އޭނާ ގެ ޓްރުތް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އެމެރިކާ އިން ވެނެޒުއެލާ އާއި އެ ޤައުމުގެ ރައީސް މަދޫރޯއާ ދެކޮޅަށް ބޮޑެތި ހަމަލާ ތަކެއް ކާމިޔާބު ކަމާ އެކު ދީފައިވާ ކަމަށެވެ. އެ ހަމަލާ ތަކުގައި މަދޫރޯ އާއި އޭނާ ގެ އަނބިކަނބަލުން ހައްޔަރުކޮށް، އެ ޤައުމުން ބޭރަށް ގެންގޮސްފައިވާ ކަމަށް ވެސް ޓްރަމްޕް ވިދާޅުވި އެވެ.
އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ވިދާޅުވީ އެމެރިކާއިން ވެނެޒުއެލާގެ ރައީސް ނިކޮލަސް މަދޫރޯ އަދި އެމަނިކުފާނުގެ އަނބިކަނބަލުން ހައްޔަރުކޮށް، އެ ގައުމުން ބޭރަށް ގެންގޮސްފައިވާ ކަމަށެވެ.
މިކަމާއި ގުޅިގެން ދުނިޔޭގެ އެކި ގައުމުތަކުން އަންނަނީ އެމެރިކާ އަދި ޓްރަމްޕުގެ މި އަމަލު ހަރުކަށި އިބާރާތުން ކުށްވެރި ކުރަމުންނެވެ. މިކަމާއި ގުޅިގެން ކޮލަމްބިއާ އިން ބުނެފައިވަނީ ވެނެޒުއޭލާ އާއި މުޅި ލެޓިން އެމެރިކާގެ މިނިވަންކަމާއި އިސްތިގުލާލަށް އަރައިގަތުމަށް ދިން ހަމަލާ ކޮލަމްބިއާ އިން ބަލައި ނުގަންނަ ކަމަށެވެ.
މިކަމާއި ގުޅިގެން ކިއުބާއިން ވަނީ ވޮޝިންޓަނުން ވެނެޒުއޭލާ އާ ދެކޮޅަށް ހިންގީ "ޖިނާއީ އުދުވާނެއް" ކަމަށާއި، ބައިނަލްއަގުވާމީ މުޖުތަމައުން މީގެ ރައްދު އަވަހަށް ދޭންޖެހޭނެ ކަމަށް ބުނެފައެވެ. އަދި ޗިލީ އިން ބުނެފައިވަނީ ވެނެޒުއޭލާ ގައި އެމެރިކާ އިން ހިންގި އަސްކަރީ ހަރަކާތްތަކާ މެދު ކަންބޮޑުވުން ފާޅުކޮށް، އެކަން ކުށްވެރިކުރާ ކަމަށެވެ.
މީގެ އިތުރުން ވެސް މެކްސިކޯ، ބްރެޒިލް، ޓްރިނިޑާޑް އެންޑް ޓޮބޭގޯ، އިރާން، ރަޝިއާ، އިނގިރޭސީވިލާތް، ޔޫރަޕިއަން ޔޫނިއަން, ޗައިނާ އަދި އިންޑޮނޭޝިއާ އިން ވަނީ މިކަން ކުށްވެރިކޮށްފަ އެވެ.
ރާއްޖޭގައި މިހާރު އޮތް ރައީސް ޑރ. މުހައްމަދު މުއިއްޒުގެ ސަރުކާރުގެ ހާރިޖީ ސިޔާސަތަކީ މިނިވަން ހާރިޖީ ސިޔާސަތެއް ކަމަށް ބުނަމުން އައި ނަމަވެސް، ވެނެޒުއެލާގެ ރައީސް ހައްޔަރު ކުރި މައްސަލައިގައި މިހާތަނަށް ސަރުކާރުން އެއްވެސް އެއްޗެއް ބުނެފައި ނުވެ އެވެ. އަދި މިކަމާއި ގުޅޭގޮތުން ފޮރިން މިނިސްޓަރ ޑރ. އަބްދުﷲ ހަލީލާއި ސުވާލު ކުރުމުން ވެސް އެއްވެސް އެއްޗެއް ވިދާޅުވެފައި ނުވާ އިރު، ފޯނަށް ގުޅުމުން ޖަވާބެއް ވެސް ނުދެއްވަ އެވެ. އަދި ސަރުކާރުގެ ސްޓޭންޑަކީ މިކަމުގައި ކޮބައިތޯ ވެސް ސާފުކޮށްދީފައި ނުވެ އެވެ.
