ވެނެޒުއޭލާގެ ރައީސް މަދޫރޯ ހައްޔަރު ކުރަން އެމެރިކާ އިން ހިންގި އޮޕަރޭޝަން ގެ ތަފްސީލު މި އޮތީ!

އެމެރިކާގެ ޖޮއިންޓް ޗީފްސް އޮފް ސްޓާފްގެ ޗެއާމަން ޑޭން ކޭން "އެބްސޮލިއުޓް ރިޒޯލްވް" ގެ ނަމުގައި މަދޫރޯ ހައްޔަރުކުރުމަށް އެމެރިކާ ހިންގި އަސްކަރީ އޮޕަރޭޝަންގެ ތަފްސީލުތައް ހިއްސާކުރައްވައިފި އެވެ.

ރައީސް ޑޮނަލްޑް ޓްރަމްޕް އާއި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި އެމެރިކާގެ ސެކްރެޓަރީ އޮފް ވޯ ޕީޓް ހެގްސެތު ވެސް ބައިވެރިވިވެޑައިގެންނެވި ނޫސްވެރިންގެ ބައްދަލުވުމެއްގައި މުޅި އޮޕަރޭޝަން ހިންގަމުން ދިޔަ ގޮތް ވަނީ ތަފްސީލުކޮށް ކިޔައިދެއްވާފައެވެ.

ވައިޓް ހައުސް އިން ހާމަ ކޮށްފައިވާ ފޮޓޯ ތަކުން ހާމަވާ ގޮތުގައި ވެނެޒުއޭލާގެ ރައީސް ނިކޮލަސް މަދޫރޯ ހައްޔަރުކުރުމަށް އެމެރިކާގެ ސިފައިން ހިންގި ހާއްސަ އޮޕަރޭޝަން، ރައީސް ޑޮނަލްޑް ޓްރަމްޕް ބައްލަވަމުން ގެންދެވީ ފްލޮރިޑާގެ މާ-އަ-ލާގޯގައި ހުންނަވައިގެންނެވެ. ފޮޓޯތަކުން ފެންނަ ގޮތުގައި، ޓްރަމްޕް ގެންދެވީ ސޯޝަލް މީޑިއާގެ ޚަބަރުތަކާއި އޮޕަރޭޝަންގެ ލައިވް މަންޒަރުތައް ސްކްރީނަކުން ބައްލަވަމުންނެވެ. ފަހުން ފޮކްސް ނިއުސް އަށް ދެއްވި އިންޓަރވިއުއެއް ގައި ވެސް ޓްރަމްޕް ވަނީ އެ ވާހަކަ ވިދާޅުވެފަ އެވެ.

މަދޫރޯ އޮންނެވީ އަނބިކަނބަލުންނާ އެކު އަވަހާރަފުޅު ލައްޕަވަން

ކަރަކާސް ގައި ހުންނަ މަދޫރޯގެ ގަނޑުވަރުގެ ތެރެއަށް އެމެރިކާގެ ތަމްރީނު ލިބިފައިވާ "ޑެލްޓާ ފޯސް" ގެ ސިފައިން ވަދެގަތްއިރު، މަދޫރޯ އޮންނެވީ އަނބިކަނބަލުން ސިލިއާ ފްލޯރެސްއާ އެކު އަވަހާރަފުޅުލައްޕަވާށެވެ. މަދޫރޯ ސަލާމަތްވުމަށްޓަކައި އޭނާގެ ރައްކާތެރި ކޮޓަރިއަށް ވަދެވަޑައިގަންނަވަން އުޅުއްވަނިކޮށް، ސިފައިން ވަނީ އޭނާ ހައްޔަރުކޮށްގެން ގެންގޮސްފައެވެ. އޭގެ ކުޑަވަގުތުކޮޅެއް ފަހުން، އެމެރިކާގެ ހެލިކޮޕްޓަރުތައް ވަނީ މަދޫރޯ ގޮވައިގެން ކަނޑު ހުރަސްކޮށް ދަތުރުކޮށްފައެވެ. ރައީސް ޓްރަމްޕް "ޓްރުތް ސޯޝަލް" ގައި ހިއްސާކުރެއްވި ފޮޓޯއަކުން ފެންނަ ގޮތުގައި، މަދޫރޯ ހުންނެވީ ބިޑިއަޅުވައި، ލޯ ނިވާކުރާ އައިނެއް އަޅުވައި، އަޅިކުލައިގެ ހެދުމެއްގައެވެ.

އެތައް މަސްތަކެއްގެ ރޭވުމެއް

މި އޮޕަރޭޝަން ރޭވުމުގައި އެންމެ އިސްކޮށް އުޅުއްވީ އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި ސީނިއާ އެޑްވައިޒަރު ސްޓެފަން މިލާ އެވެ. މި އޮޕަރޭޝަންގެ ތައްޔާރީތައް ޑިސެމްބަރު މަހުގެ މެދުތެރޭގައި ފެށި ނަމަވެސް، މަދޫރޯ ވެރިކަމުން ދުރުކުރުމުގެ ރޭވުންތައް މީގެ މަސްތަކެއް ކުރިން ވަނީ ފަށާފައިވާ ކަމަށް ސީއެންއެން އިން ރިޕޯޓުކޮށްފައިވެ އެވެ. އެ ގޮތުން ސީ.އައި.އޭ  އިން ވަނީ ސިއްރު ގޮތެއްގައި ޓީމެއް ވެނެޒުއޭލާ އަށް ފޮނުވައި، މަދޫރޯގެ ހަރަކާތްތަކާއި، އޭނާ އުޅުއްވާ ތަންތަނާއި، ކައިބޮއި އުޅޭ ގޮތް އަދި އޭނާ ގެންގުޅުއްވާ ޖަނަވާރުތަކުގެ މައުލޫމާތު ވެސް ހޯދާފައި ކަމަށް ނޫސްވެރިންގެ ބައްދަލުވުމުގެ ކޭން ވިދާޅުވި އެވެ.

މީގެ އިތުރުން ވެނެޒުއޭލާ ސަރުކާރުގެ ތެރޭގައި އުޅޭ ސީ.އައި.އޭގެ އެޖެންޓަކު ވެސް ވަނީ މަދޫރޯ ހުންނެވި ތަނުގެ ސީދާ މައުލޫމާތު އެމެރިކާ އަށް ފޯރުކޮށްދީފައެވެ.

މި އޮޕަރޭޝަނާ ގުޅޭ ތަފްސީލުތައް ހާމަވުމާއެކު، އެމެރިކާގެ ގާނޫނު ހަދާ މަޖިލިހުގެ ބައެއް ޑިމޮކްރެޓިކް މެންބަރުން ވަނީ ސަރުކާރުގެ އިސް އޮފިޝަލުން ކޮންގްރެސް އަށް އިތުރުފުޅު ހެއްދެވި ކަމަށް ތުހުމަތުކޮށްފައެވެ. ސަބަބަކީ މަދޫރޯގެ ވެރިކަން ބަދަލުކުރުމުގެ ވިސްނުމެއް ނެތް ކަމަށް މީގެ ކުރިން އޮފިޝަލުން ކޮންގްރެސް އަށް ވިދާޅުވެފައިވާތީއެވެ.

އޮޕަރޭޝަން ހިންގި ގޮތް

މަސްތަކެއް ވަންދެން ތައްޔާރުވަމުންދިޔަ މި އޮޕަރޭޝަން ކުރިއަށް ގެންދިއުމަށް ޓްރަޕްމް އަމުރުކުރެއްވީ ޖެނުއަރީ 2 ވަނަ ދުވަހުގެ ރޭގަނޑު 10:46 ގައި (ޖީ.އެމް.ޓީ އިން ޖެނުއަރީ 3 ގެ 03:46 ގައި) ގަ އެވެ.

ވެނެޒުއޭލާގެ ވެރިރަށް ކަރާކަސް ގައި "އޮޕަރޭޝަން އެބްސޮލިއުޓް ރިޒޯލްވް" ގެ ނަމުގައި ހިންގި މި އޮޕަރޭޝަނުގައި 150 މަތިންދާބޯޓާއި ގިނަ އަދަދެއްގެ ސިފައިން ބައިވެރިވިއެވެ. މޫސުން ގޯސްވުމާއި އެހެނިހެން ސަބަބުތަކާ ހުރެ އޮޕަރޭޝަން ފެށުން ލަސްވި ނަމަވެސް، ރައީސް ޓްރަމްޕް ހުއްދަ ދެއްވުމާއެކު އެމެރިކާގެ 20 ބޭހަކުން މަތިންދާބޯޓުތައް އުދުއްސާލިއެވެ.

މި މަތިންދާބޯޓުތަކުން ވަނީ ވެނެޒުއޭލާގެ ވައިގެ ދިފާއީ ނިޒާމުތަކަށް ހަމަލާދީ، ހެލިކޮޕްޓަރުތަކަށް މަގު ފަހިކޮށްދިނުމުގެ ގޮތުން ސައިބަރ ހަމަލާތައް ވެސް ދީފައެވެ. އެމެރިކާގެ ގާނޫނު ތަންފީޒުކުރާ އިދާރާތަކާއި އަސްކަރީ އޮފިޝަލުން ހިމެނޭ ފައުޖުން، ކަރާކަސް ގައި ހުންނަ މަދޫރޯގެ ގަނޑުވަރަށް ފޭބީ މެންދަމު 2:01 ގައެވެ.  ސިފައިން މަދޫރޯގެ ގަނޑުވަރަށް ދިޔަ ވަގުތު ބަޑީގެ ހަމަލާތަކެއް ބަދަލުކުރެވުނު ކަމަށާއި، އެމެރިކާގެ އެއް ހެލިކޮޕްޓަރަށް ގެއްލުންވި ކަމަށް ވެސް ޓްރަމްޕް ވިދާޅުވި އެވެ. އެހެން ނަމަވެސް އެ ހެލިކޮޕްޓަރު އޮތީ ދަތުރުކުރެވޭ ހާލާތުގައި ކަމަށާއި އެހެން ކަމުން އަނބުރާ ބޭސް އަށް އެ ހެލިކޮޕްޓަރު ވަނީ އައިސްފައި ކަމަށް ޖޮއިންޓް ޗީފްސް އޮފް ސްޓާފްގެ ޗެއާމަން ނޫސްވެރިންނަށް ވިދާޅުވި އެވެ.

އެމެރިކާގެ ސިފައިން ހިންގި އޮޕަރޭޝަންގެ ތެރޭގައި މަދޫރޯ މަރުވުމުގެ ފުރުސަތު އޮތްތޯ ސުވާލުކުރުމުން، ޓްރަމްޕް ވިދާޅުވީ އެފަދަ ކަމެއް ހިނގުން އެކަށީގެންވާ ކަމަށާއި، އޭނާ (މަދޫރޯ) މަސައްކަތް ކުރަމުންދިޔައީ ރައްކާތެރި ތަނަކަށް ވަދެ ފިއްލެވުމަށް ކަމަށެވެ.

"އެ ވަގުތު ވަރަށް ގިނައިން ބަޑީގެ ހަމަލާތައް ބަދަލުކުރެވެމުންދިޔަ... އޭނާ ރައްކާތެރި ތަނަކަށް ދާން މަސައްކަތް ކުރި ނަމަވެސް، އެއީ ރައްކާތެރި ތަނެއް ނޫން. އެއީ އަހަރެމެން އެތަނުގެ ދޮރު ގޮއްވާލަން ތައްޔާރަށް ތިބީމަ،" ޓްރަމްޕް ވިދާޅުވިއެވެ. "އޭނާ ދޮރާ ހަމައަށް ދިޔަ، ނަމަވެސް ދޮރު ލެއްޕޭގޮތެއް ނުވި.

"ދައުވާ އުފުލާފައިވާ މަދޫރޯ އާއި އޭނާގެ އަނބިކަނބަލުން އަމާންދިނުމުން، އެމެރިކާގެ ޑިޕާޓްމަންޓް އޮފް ޖަސްޓިސްގެ ބެލުމުގެ ދަށަށް އެމީހުން ގެނެވުނު،" ކޭން ވިދާޅުވިއެވެ. އަދި އެ ސަރަހައްދުން ނުކުތް ވަގުތު ހަމަލާތަކެއް ކުރިމަތިވި ނަމަވެސް، އެމެރިކާގެ އެއްވެސް ސިފައިންގެ މީހަކަށް ގެއްލުމެއް ލިބިފައިނުވާކަން އޭނާ ފާހަގަކުރެއްވިއެވެ.

ފަތިހު 4:29 ހާއިރު މަދޫރޯ ގޮވައިގެން ސިފައިން ކަނޑުމައްޗަށް އަރާ، އެމެރިކާގެ މަނަވަރު "ޔޫ.އެސް.އެސް އައިވޯ ޖިމާ" އަށް އޭނާ ގެންދެވުނެވެ.

މަދޫރޯ އާއި އޭނާގެ އަނބިކަނބަލުން އެމެރިކާ ސިފައިންނާ ހަވާލުވުމުން، އެމީހުން ފުރަތަމަ ގެންދެވުނީ ކިއުބާގައި ހުންނަ އެމެރިކާގެ އަސްކަރީ މަރުކަޒު "ގުއަންޓަނާމޯ ބޭ" އަށެވެ. އަދި އޭގެ ފަހުން ހޮނިހިރު ދުވަހުގެ ރޭ ނިއުޔޯކަށް ގެންގޮސްފައިވާ ކަމަށް ރިޕޯޓުކޮށްފައިވެ އެވެ.

މި މުޅި އޮޕަރޭޝަން ރައީސް ޓްރަމްޕް ބައްލަވަމުން ގެންދެވީ އަސްކަރީ ޖެނެރަލުންނާ އެކު  އޭނާގެ އަމިއްލަފުޅު ރިސޯޓު މާ-އަ-ލާގޯގައި ތިއްބަވައިގެންނެވެ.