މަދޫރޯ ހައްޔަރު ކުރީ އިންސާފުގެ ކުރި މައްޗަށް ގެންނަން ކަމަށް ރޫބިއޯ ވިދާޅުވި ކަމަށް، އެމެރިކާގެ ސެނެޓު މެމްބަރަކު ހާމަ ކުރައްވައިފި
4 ޖެނުއަރީ 2026 | އާދީއްތަ 06:44ސެނެޓަރު ލީ ވިދާޅުވެފައި ވަނީ، އެމެރިކާ އިން މަދޫރޯ ހައްޔަރު ކޮށްފައި ވަނީ އޭނާގެ މައްޗަށް ކުރެވޭ ތުހުމަތު ތަކުގައި އިންސާފުގެ ކުރި މައްޗަށް ޙާޒިރު ކުރުމަށް ކަމަށް ވެސް، ރޫބިއޯ ވިދާޅުވެފައިވާ ކަމަށް. އަދި އެކަމުގެ މައުލޫމާތު ރޫބިއޯ ސެނެޓު މެމްބަރުންނާ ހިއްސާ ކުރެއްވި ކަމަށް ވެސް އޭނާ ވިދާޅުވެފައިވޭ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ، ކެރީބިއަން ކަނޑުގައި ބޯޓު ފަހަރަށް ދެމުން އަންނަ ހަމަލާ ތަކުގެ މައުލޫމާތު ކޮންގްރެސްއާ ހިއްސާ ކުރެއްވުމަށް ވަޑައިގެންނެވުމުގެ ތެރެއިން
ވެނެޒުއެލާގެ ރައީސް ނިކޮލަސް މަދޫރޯ ހައްޔަރުކޮށް، އެމެރިކާގެ ބެލުމުގެ ދަށަށް ގެނެސްފައި ވަނީ އިންސާފުގެ ކުރި މައްޗަށް ގެނައުމަށް ކަަމަށް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ކަމަށް އެ ޤައުމުގެ ސެނެޓު މެމްބަރަކު ހާމަ ކުރައްވައިފި އެވެ.
އެކަން ހާމަ ކުރައްވާފައި ވަނީ ވެރިކަން ކުރާ ރިޕަބްލިކަން ޕާޓީގެ ސެނެޓަރު މައިކް ލީ އެވެ. ހޮނިހިރު ދުވަހު ލީ އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ، އެމެރިކާގެ ބެލުމުގެ ދަށަށް މަދޫރޯ ގެނެސްފައިވާތީ، ވެނެޒުއެލާގައި އިތުރު ފިޔަވަޅެއް އަޅަން ނުޖެހޭނެ ކަމށް ލަފާ ކުރެވޭ ކަމަށެވެ.
އިތުރަށް ސެނެޓަރު ލީ ވިދާޅުވެފައި ވަނީ، އެމެރިކާ އިން މަދޫރޯ ހައްޔަރު ކޮށްފައި ވަނީ އޭނާ ގެ މައްޗަށް ކުރެވޭ ތުހުމަތު ތަކުގައި އިންސާފުގެ ކުރި މައްޗަށް ޙާޒިރު ކުރުމަށް ކަމަށް ވެސް، ރޫބިއޯ ވިދާޅުވެފައިވާ ކަމަށެވެ. އަދި އެކަމުގެ މައުލޫމާތު ރޫބިއޯ ސެނެޓު މެމްބަރުންނާ ހިއްސާ ކުރެއްވި ކަމަށް ވެސް އޭނާ ވިދާޅުވެފައިވެ އެވެ.
އެމެރިކާގެ ރައީސް ޑޮނަލްޑް ޓްރަމްޕް ނިސްބަތްވެ ވަޑައިގަންނަވާ ރިޕަބްލިކަން ޕާޓީގެ ސެނެޓަރު ލީގެ މި ވާހަކަ ތަކަށް ބައިނަލްއަޤުވާމީ މުޖުތަމައުގެ ސަމާލުކަން ވަނީ ލިބިގެން ގޮސްފަ އެވެ. މަދޫރޯ ހައްޔަރު ކުރުމަށް އެމެރިކާ އިން ކުރިއަށް ގެންގޮސްފައި ވަނީ ވަރަށް ވަރުގަދަ އަދި ރޭވުންތެރި އޮޕަރޭޝަނެއް ކަމަށް ވަނީ ފާހަގަ ކޮށްފަ އެވެ.
ވެނެޒުއެލާގައި މަދޫރޯ ވެރިކަން ކުރަމުން އަންނަ ގޮތާ މެދު، އެމެރިކާ އިން ވަނީ އެތައް ފަހަރެއްގެ މަތިން ފާޑު ކިޔައިފަ އެވެ. އެގޮތުން އެމެރިކާ އިން ވަނީ ވެނެޒުއެލާއާ ދެކޮޅަށް ދަތި ކުރުމުގެ އެތައް ފިޔަވަޅު ތަކެއް ވެސް އަޅައިފަ އެވެ. އަދި މަދޫރޯ އާއި، އޭނާ ގެ އާއިލާއާ ދެކޮޅަށް ވެސް އެމެރިކާ އިން ފިޔަވަޅު ތަކެއް އަޅާފައިވެ އެވެ.
ވެނެޒުއެލާގެ ރައްޔިތުންނަށް އިޤްތިޞާދީ ގޮތުން ދަތި ދުވަސް ތަކަކާ ކުރިމަތިލާން ޖެހިފައިވާއިރު، އޭނާގެ ވެރި ކަމުގައި ވެނެޒުއެލާގެ ގިނަ ރައްޔިތުން ވަނީ ޤައުމު ދޫކޮށް އެހެން ތަންތަނަށް ހިޖުރަ ކޮށްފަ އެވެ. މަދޫރޯގެ ވެރި ކަމަކީ އެމެރިކާ އިން ބަލައި ގަންނަ ވެރި ކަމަަކަށް ނުވާއިރު، ޓްރަމްޕް ވިދާޅުވެފައި ވަނީ އެއީ ޣައިރު ޤާނޫނީ ވެރި ކަމެއް ކަމަށެވެ.
މަދޫރޯ ހައްޔަރު ކުރުމާ ގުޅިގެން ވެނެޒުއެލާގެ ބައެއް ރައްޔިތުން ކަންބޮޑުވުން ފާޅު ކުރަމުން އަންނައިރު، އެކަމުގެ އުފާ ފާޅު ކުރާ ރައްޔިތުން ވެސް އެބަ ތިއްބެވެ.
