ވެނެޒުއޭލާގެ ހަމައެކަނި ރައީސަކީ ނިކޮލަސް މަދޫރޯ ކަމަށް އެ ގައުމުގެ ނައިބު ރައީސް ޑެލްސީ ރޮޑްރިގޭޒް ވިދާޅުވެއްޖެ

ވެނެޒުއޭލާގެ ހަމައެކަނި ރައީސަކީ ނިކޮލަސް މަދޫރޯ ކަމަށް އެ ގައުމުގެ ނައިބު ރައީސް ޑެލްސީ ރޮޑްރިގޭޒް ހޮނިހިރު ދުވަހު ވިދާޅުވެއްޖެއެވެ. އަދި އަސްކަރީ އޮޕަރޭޝަނެއްގެ ތެރެއިން ހައްޔަރުކުރި އެ ގައުމުގެ ލީޑަރު މިނިވަންކުރުމަށް އޭނާ ވަނީ އެމެރިކާ އަށް ގޮވާލައްވާފައެވެ.

ޓީވީ މެދުވެރިކޮށް ވަގުތުން ދެއްވި ބަޔާނެއްގައި ރޮޑްރިގޭޒް ވިދާޅުވީ، ރައީސް ނިކޮލަސް މަދޫރޯ އާއި އެމަނިކުފާނުގެ އަނބިކަނބަލުން ސިލިއާ ފްލޮރެސް ވަގުތުން މިނިވަންކުރަން ޖެހޭނެ ކަމަށެވެ. އަދި ވެނެޒުއޭލާގެ ހަމައެކަނި ރައީސަކީ މަދޫރޯ ކަމަށް އޭނާ ތަކުރާރުކުރެއްވި އެވެ. މީގެ އިތުރުން، ގައުމު ދިފާޢުކުރުމަށް ސަރުކާރު އޮތީ ފުރިހަމަ އަށް ތައްޔާރަށް ކަމަށްވެސް ރޮޑްރިގޭޒް ވިދާޅުވި އެވެ.

މަދޫރޯ އަށް ފަހު ވެރިކަމާ ހަވާލުވުމަށް ދެން ހުންނެވި ރޮޑްރިގޭޒް އިތުރަށް ވިދާޅުވީ، "އަޅުގަނޑުމެން މިތިބީ ވެނެޒުއޭލާ ދިފާޢުކުރަން ތައްޔާރަށް؛ އަޅުގަނޑުމެން މިތިބީ ގައުމުގެ ގުދުރަތީ ވަސީލަތްތައް ހިމާޔަތްކުރަން ތައްޔާރަށް،" ކަމަށެވެ. އޭނާ މިހެން ވިދާޅުވީ، ކެރީބިއަން ސަރަހައްދުގެ މި ގައުމު އެމެރިކާގެ ބާރުގެ ދަށަށް ގެނެސް، އެ ގައުމުގެ ތެލުގެ ބޮޑު ރިޒާވްގެ ބޭނުން ހިފުމުގެ ވިސްނުން ގެންގުޅުއްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެންނެވެ.